A omen dunsu yali langa sama á be sabi fa siki e paati, neen meke milyunmilyun sama be e dede fu di siki di e kii sama be e paati makiliki. Koniman meke moiti te den kon fusutan fa son siki e paati. Den kon fusutan taki a bacterie efuso virus e meke sama siki. A sabi di den kon sabi a sani ya, yeepi sama fu son siki á kisi den. A yeepi den tu fu sabi fa den mu deesi son siki. A sani ya meke milyunmilyun sama man libi moo langa.

Ma fa a de anga taa pelensipali akisi? Sowtu wini i si enke yu o fende te i sabi a piki fu den akisi ya?

• Sama a Gadu?

• Sama a Yesesi Kelestesi?

• San na a Kownukondee fu Gadu?

• Fa sani o waka aini a ten di e kon?

A omen wini milyunmilyun sama fende di den kon sabi a piki fu den akisi ya. Iseefi o fende wini tu te i sabi a piki fu den akisi ya.

Kande yu e pakisei taki: ’Fa wan sama o man sabi san na a tuu aini a ten ya?’ Nownow ai moo taanga fu sabi fa son toli de tuutuu. Saide?

Gaanse sama nai fitoow den sani di den tiiman, den bisnisman anga den nyunsuman e taki moo. Bika a taanga fu sabi sowtu wan fu den sani di den e taki a tuu. Son leisi te den e taki fa den e si wan toli, da a fasi fa den e taki e gei enke a so a toli de tuu. Son leisi den e gi wan pisi fu wan toli namo. Son leisi den nyunsu di den e paati a lei, ma toku den e taigi sama taki na a tuu den e taki. Neen meke sama nai fitoow taawan moo. Omen sama e fende taki denseefi sa luku efu wan sani a tuu. Den e si enke a ná abi wini fu booko den ede fu sabi a tuu.

Winsi fa a taanga fu sabi san na a tuu aini a ten ya, tokuso u sa fende a piki fu den moo pelensipali akisi fu a libi. Fa u sa du a sani ya? Efi i du aseefi sani di yu e du te i wani kon sabi taa sani aini a libi, a sani ya o yeepi i fu man sabi den piki fu den moo pelensipali akisi.

Efi i luku en fini, da na ala dei wi enke libisama e meke moiti fu sabi a tuu. Luku a toli fu wan uman den e kai Jessica. A taki: „A meisyo fu mi di abi 12 yali nai go anga pinda. Winsi a wan pikinso namo a nyan, a sani ya sa kii en.” Neen meke ala yuu Jessica e luku bun anga den nyanyan sani di ai bai. A taki: „Fosi mi bai wan sani, mi e leisi ala san sikiifi neen tapu fu sabi anga san den meke en. Baka dati mi e go ondoosuku ala den sani di de aini moo bun fu luku efu pinda á de aini. Mi e suku wan fasi tu fu akisi a bodeleifi di meke a sani fu sabi efu den á poti pikinso pinda aini. Boiti dati, mi e taki anga sama di mi e fitoow fu sabi efu mi sa fitoow a fasi fa a bodeleifi e meke den sani fi en.”

Kande i nai ondoosuku sani finifini enke Jessica, ma toku yu e wooko anga den dii sani di kai a ondoo ya te i wani sabi wan sani:

• Meke moiti fu sabi fa sani de tuutuu.

• Ondoosuku a toli luku efu a so a de.

• Luku bun pe yu e suku.

Efi i wani fende a piki fu den moo pelensipali akisi fu a libi, den sani di kai a tapu ya sa yeepi i tu. Fa i sa wooko anga den?

Di Jessica be wani sabi san Beibel e leli tuutuu, neen a du denseefi sani di a be du fu yeepi a pikin fi en di nai go anga pinda. Jessica taki: „Mi be e meke moiti fu fusutan den sani di mi e leisi. Mi be e ondoosuku sani tu. A den sani ya yeepi mi fu sabi san Beibel e leli tuutuu.” Leti enke Jessica, a so miliyunmiliyun sama kon sabi den piki fu den akisi ya:

• Saide u de a goontapu?

• San e pasa anga wan sama te a dede?

• Saide sama e pina?

• San Gadu o du fu sama á pina moo?

• San i mu du fi yu osulibi waka bun?

Te yu e leisi Beibel anga te yu e ondoosuku sani a www.pr418.com, i sa fende a piki fu den akisi ya anga taa pelensipali akisi.