Ye we̱nge̱ lokoli la mbu, to̱ moto a si ta a bia nje ye njo̱m a nika; kańena maboa ma matombeye̱ ma bo lodun la bato. Nde bamabie̱ ba timbi so̱ nje e ta njo̱m. Ba so̱i ná no̱ki iwo̱ i mabelabe̱ na fre̱nsi ná bacterie na virus nde i matombe̱le̱ ma maboa. Nika ńongwane̱ bato o jeka na bo̱lise̱ jita la maboa, na nika e sunga longe̱ la lokoli la lodun la bato, e bola pe̱ ná longe̱ la bato di bate be̱ bwaba.

Di kwale pe̱ so̱ ná nje jombwea myuedi ma mweńa mipe̱pe̱ e? Mo̱ o mo̱nge̱le̱ ná so̱ la mbale̱ jombwea min myuedi le ná di wanea wa tombwane̱ e?

• Nja ńe Loba e?

• Nja ńe Yesu Kristo e?

• Janea la Loba le nde nje e?

• Ne̱ni longe̱ di me̱nde̱no̱ be̱ kie̱le̱ ni maye̱ e?

Lodun la bato lo so̱i malabe̱ ma mi myuedi na nika e tukwa longe̱ labu. Ma malabe̱ me pe̱ ná mongwane̱ wa.

We ná o baise̱ ná ‘Ne̱ni moto eno̱ ná a so̱ mbale̱ jombwea lambo e?’ Jangame̱n jemba ná ye ndutu jita o so̱ mbale̱ jombwea jita la mambo. Ońola nje e?

Bato jita ba si dube̱ pe̱ ná manea, bato ba ńunga, to̱ mibia ba malangwea babo̱ mbale̱. Ye babo̱ ndutu o jemba mbale̱ oteten a mo̱nge̱le̱ ma bato, mbale̱ i titi mususu to̱so̱ mambo mape̱pe̱ bato ba mabonde̱no̱ ka mbale̱ nde ke̱ me nde mpoṅ. Kana lakisane̱ di titino̱ pe̱ oteten a bato, na ná jita la mambo ma makwalabe̱ meno̱ nde mpoṅ, bato ba titi pe̱ jo̱nge̱le̱ diwo̱ jombwea nje ye mbale̱, to̱ jombwea nje nika e mawaneano̱ babo̱.

To̱ na nika ńe̱se̱, we te̱ nde ná a so̱ malabe̱ me mbale̱ jombwea myuedi ma mweńa ma longe̱. Ne̱ni e? Tongwea na bola mambo mō̱ mena o ko̱lo̱ngo̱nno̱ bola.

O nin mbadi to̱ nine̱, biso̱ be̱se̱ di mawasa mbale̱ buńa te̱. Jombweye te̱ bete̱medi ba Jessica. Mo̱ ná: “Ńol’a mun’am e si makasa ngo̱ndo̱ to̱ son. To̱ muse̱se̱le̱ ma ngo̱ndo̱ o da mwe ná mu bwa mo̱.” Jessica angame̱n so̱ bakise̱ ná da lena a mandano̱ di si me̱nde̱ wanea mun’ao mbeu a ńolo to̱ po̱. A mabata ná: “Na mabotea nde na langa ná pe̱ńe̱pe̱ńe̱ nje e tilabe̱ o ekwe̱m ná na bie nje di da di be̱nno̱. Denge̱ na mabele̱ dio di po̱ngi di da o bakise̱ ná di si pungwabe̱ na ngo̱ndo̱ to̱ son. Na mapo̱ngo̱ pe̱ muwaso o internet o be̱ mbaki ná ne ná na lakisane̱ di dio.”

Yen ebe o si mawase̱le̱ mambo ka Jessica, nde mbad’ao ńa bola ńe ná ńongwane̱ wa o so̱ malabe̱ ma myuedi o be̱nno̱:

• Wasa o no̱kise̱ mambo.

• Bata po̱ngo̱ muwaso.

• Be̱ mbaki ná bepolo bo̱ngo̱ ba muwaso be ńai moto eno̱ ná a lakisane̱.

Ni mbad’a bola ńe ná ńongwane̱ wa o so̱ malabe̱ me mbale̱ jombwea myuedi ma mweńa ma longe̱. Ne̱ni e?

Ponda Jessica a tano̱ a wasa mbale̱ ni maso̱be̱ o Bibe̱l, a boli nde ka nje te̱ a mabolano̱ o bia nga da la mun’ao le mbaki. Mo̱ ná: “No̱ngo̱ la ponda o langa, na po̱ngo̱ muwaso ná pe̱ńe̱pe̱ńe̱ bongwane̱ mba o so̱ mbale̱ o Bibe̱l.” Ka Jessica, lodun la bato loko nje Bibe̱l e makwalano̱ jombwea min myuedi:

• Ońola nje di wekabe̱no̱ e?

• Nje e matombe̱ ombusa kwedi e?

• Ońola nje di matakano̱ e?

• Nje Loba eno̱ bola ná a bo̱le̱ take e?

• Ne̱ni jeno̱ ná di be̱ne̱ longe̱ la mbia le bonam e?

We ná o so̱ malabe̱ me mbale̱ ma mi myuedi na mipe̱pe̱ ke̱ o langi Bibe̱l, na ke̱ o bati po̱ngo̱ muwaso o www.pr418.com.