Afii akpei abɔ ho ni mɔ ko mɔ ko leee nakai sanebimɔ lɛ hetoo. Yɛ bei nɛɛ amli fɛɛ lɛ, helai komɛi gbɛ shwã oyayaayai, ni egbe mɛi akpekpei abɔ. Naagbee lɛ, jeŋ shikpalɔi ná amɛle nɔ hewɔ. Amɛbana akɛ, muawai (bacteria loo virus) ji nɔ titri ni hãa helai mɔmɔɔ wɔ. Anɔkwale nɛɛ ni aná ale lɛ hewɔ lɛ, anyɛ atsĩ helai anaa ni atsa babaoo hu, ni enɛ ehã mɛi akpekpei akpei abɔ awala sɛɛ tsɛɔ, ni amɛnáa gbɔmɔtsoŋ hewalɛ kpakpa fe be ko ni eho.

Ni sanebimɔi krokomɛi ni he hiaa lɛ hu? Kɛ́ oná ole sanebimɔi ni nyiɛ sɛɛ nɛɛ ahetoo lɛ, kɛ́ okwɛ lɛ, mɛɛ gbɛ nɔ ebaaná oshihilɛ nɔ hewalɛ?

• Namɔ ji Nyɔŋmɔ?

• Namɔ ji Yesu Kristo?

• Mɛni ji Nyɔŋmɔ Maŋtsɛyeli lɛ?

• Mɛni baaba wɔsɛɛ?

Mɛi akpekpei abɔ ená amɛle sanebimɔi nɛɛ ahetoo, ni no ehã amɛshihilɛ ehi fe tsutsu lɛ. Bo hu obaanyɛ oná sanebimɔi nɛɛ ahetoo lɛ he sɛɛ.

Ekolɛ obaabi ohe akɛ, ‘Ani abaanyɛ ale anɔkwalei ni kɔɔ nibii ahe lɛɛlɛŋ?’ Anɔkwa, gbii etɛ nɛɛ, ewa waa akɛ abaale anɔkwale ni kɔɔ nibii babaoo ahe. Mɛni hewɔ?

Mɛi pii heee amralofoi, nitsumɔhei, loo adafitswalɔi amɛyeee. Ewa hã mɛi akɛ amɛaale kɛji nɔ ni amɛnuɔ lɛ ji anɔkwale loo mɛi miitsɔɔ amɛsusumɔ kɛkɛ, amɛkɛ nɔ ko miitee amɛ, loo aamale amɛ po. Bɔ ni aheee mɛi ayeee dɔŋŋ hewɔ lɛ, jeee anɔkwale ni kɔɔ sane ko he lɛ kɛkɛ he ŋwane ajeɔ, ajeɔ nɔ ni ebiɔ ni afee lɛ hu he ŋwane.

Enɛ fɛɛ sɛɛ lɛ, obaanyɛ oná shihilɛ mli sanebimɔi ni he hiaa waa lɛ ahetoo ni ja. Mɛɛ gbɛ nɔ? Kɛtsɔ gbɛi ni otsɔɔ nɔ otaoɔ anɔkwalei ni kɔɔ saji ni he ehiaaa tsɔ lɛ ahe lɛ nɔŋŋ nɔ.

Yɛ gbɛ ko nɔ lɛ, daa gbi lɛ otaoɔ anɔkwale. Susumɔ Jessica sane lɛ he okwɛ. Ewie akɛ: “Ŋkatiɛ kɛ mibiyoo lɛ yeee aahu akɛ, kɛ́ fioo po bote emli lɛ, ebaanyɛ egbe lɛ.” Jessica kwɛɔ jogbaŋŋ koni ekahé niyenii ko ni ŋkatiɛ yɛ mli ehã ebiyoo lɛ. Ewie akɛ: “Klɛŋklɛŋ lɛ, mikaneɔ nɔ ni aŋma yɛ niyenii lɛ he lɛ jogbaŋŋ koni male nibii ni akɛfee. No sɛɛ lɛ, mitaoɔ nii amli lolo, ni mibiɔ mɛi ni fee lɛ koni mana kɛji aleenɔ, gbɛ ni amɛtsɔɔ nɔ amɛfeɔ niyenii lɛ hewɔ lɛ, amɛbaanyɛ amɛkɛ ŋkatiɛ afutu mli ni amɛleee lo. Miyaa nɔ mitaoɔ nii amli yɛ mɛi krokomɛi ni abaanyɛ amu afɔ̃ amɛnɔ lɛ adɛŋ, bɔ ni afee ni maná nɔmimaa akɛ sane ko bɛ gbɛ ni nakai nitsumɔhe lɛ tsɔɔ nɔ efeɔ niyenii lɛ he.”

Ekolɛ, saji ni daa gbi lɛ otaoɔ amɛhe anɔkwale lɛ bɛ hiɛdɔɔ tamɔ Jessica nɔ lɛ, shi obaanyɛ okase lɛ ni otsɔ gbɛi ni nyiɛ sɛɛ nɛɛ anɔ otao sanebimɔi ni gbaa onaa lɛ ahetoo:

• Le anɔkwalei lɛ.

• Taomɔ nii amli lolo.

• Kwɛmɔ akɛ abaanyɛ amu afɔ̃ mɛi ni ŋmala saji lɛ anɔ lo.

Obaanyɛ otsɔ gbɛi nɛɛ nɔŋŋ anɔ oná hetoi ni ja ohã shihilɛ mli sanebimɔi ni he hiaa lɛ. Mɛɛ gbɛ nɔ?

Jessica tsɔ gbɛ ni tamɔ nɔ ni etsɔɔ nɔ etaoɔ niyenii ni kɛ ebiyoo lɛ yeee lɛ ahe saji lɛ nɔŋŋ nɔ etao Biblia mli anɔkwalei lɛ. Ekɛɛ akɛ, “Mikane nii waa ni mitao nii amli jogbaŋŋ, dani mibale anɔkwale ni yɔɔ Biblia lɛ mli lɛ.” Mɛi akpekpei abɔ, ni Jessica hu fata he lɛ, ekase nɔ ni Biblia lɛ tsɔɔ yɛ sanebimɔi ni nyiɛ sɛɛ nɛɛ ahe:

• Mɛni hewɔ wɔyɔɔ wala mli?

• Mɛɛ shihilɛ mli gbohii lɛ yɔɔ?

• Mɛni hewɔ wɔnaa nɔ?

• Mɛni Nyɔŋmɔ baafee kɛfo nɔnaa fɛɛ sɛɛ?

• Mɛni baahã miishɛɛ ahi wɔweku shihilɛ mli?

Kɛ́ okane Biblia lɛ, ni otao nii amli hu yɛ www.pr418.com lɛ nɔ lɛ, obaanyɛ oná sanebimɔi nɛɛ kɛ ekrokomɛi ahetoo ni ja.