Na owhe fọtọ́n susu, mẹde ma yọ́n gblọndo kanbiọ enẹ tọn. Ehe zọ́n bọ to ojlẹ enẹ mẹ, azọ̀n ylankan lẹ ko hù gbẹtọ livi susu. Amọ́ todin, wesetọ lẹ ko mọdona nugbo lọ. Yé wá mọdọ nuvikun flinflin lẹ, yèdọ bactérie po virus lẹ po wẹ nọ bẹ azọ̀n lẹ plamẹ. Nugbo dopo gee enẹ yinyọnẹn ko gọalọ nado dapana kavi mọ amasin na azọ̀n susu, bọ gbẹtọ liva lẹ nọ nọ̀ gángán bo nọ dọ́jì dogọ.

Etẹwẹ dogbọn kanbiọ titengbe devo lẹ dali? To linlẹn towe mẹ, nawẹ gblọndo dindin na kanbiọ he bọdego lẹ na wà dagbe na we gbọn?

• Mẹnu wẹ Jiwheyẹwhe?

• Mẹnu wẹ Jesu Klisti?

• Etẹwẹ Ahọluduta Jiwheyẹwhe tọn yin?

• Etẹwẹ sọgodo na hẹnwa?

Gbẹtọ livi susu lẹ ko mọ gblọndo na kanbiọ enẹlẹ bọ e ko hẹn gbẹzan yetọn pọnte taun. Gblọndo kanbiọ enẹlẹ tọn gán wà dagbe na hiẹ lọsu.

E gán paṣa we dọ, ‘Nawẹ yè gán mọ nugbo lọ gando nudepope go gbọn?’ Na e to awuvẹ dogọ todin nado yọ́n nugbo lọ gando nususu go. Etẹwutu?

Na mẹsusu masọ nọ dejido gandutọ lẹ, ajọwatọ lẹ, po mẹhe nọ namẹ linlin lẹ po go. E nọ vẹawu nado yọ́n nuhe yin nugbo lọ dovo na linlẹn mẹdetiti tọn yetọn, nugbo daa lẹ, po lalo gànna-gànna lẹ po. Ehe zọ́n bọ gbẹtọ lẹ ma nọ kọngbedopọ gando nuhe yin nugbo po kọdetọn etọn lẹ po go ba.

Mahopọnna ehe, mí gán gbẹ́ yọ́n gblọndo he sọgbe lẹ na kanbiọ titengbe hugan gbẹ̀mẹ tọn lẹ. Gbọnna? Gbọn ayiha he mí nọ kàn egbesọegbesọ nado yọ́n onú paa he yin nugbo lẹ zinzan dali.

Mímẹpo wẹ nọ tẹnpọn egbesọegbesọ nado yọ́n nudelẹ he yin nugbo. Pọ́n apajlẹ yọnnu de he nọ yin Jessica tọn. E dọmọ: “Azín nọ doazọ̀n viyọnnu ṣie sinsinyẹn.” E yidogọ dọ “eyin nuhe tọ́n sọn azín mẹ pẹvide tlẹ tọ́n to núdùdù etọn mẹ, e gán hẹn okú wá na ẹn.” Enẹwutu, Jessica dona mọdọ núdùdù depope he e họ̀ ma na doazọ̀n viyọnnu etọn. E dọ dọ: “Onú tintan he n’nọ wà wẹ nado hia nuhe yin kinkan do núdùdù lẹ go ganji whẹpo do họ̀. Enẹgodo, n’nọ basi dodinnanu do e ji bo tlẹ nọ ylọ azọ́nwhé lọ nado dindona eyin nudepope ma yin dido nulọ mẹ he gán doazọ̀n viyọnnu ṣie. Humọ, n’nọ pọ́n nuhe mẹdevo lẹ ko dọ gando azọ́nwhé lọ go nado yọnẹn eyin yé tindo yinkọ dagbe.”

Nuhe yin nugbo lẹ dindin egbesọegbesọ gán nọma biọ nususu to asi we dile e yin do na Jessica, amọ́ nado mọ gblọndo na kanbiọ towe lẹ, a gán nọ yinuwa di Jessica:

• Yọ́n nuhe yin nugbo lẹ.

• Basi dodinnanu lẹ dogọ.

• Mọdọ fie a to dodinnanu sọn lẹ nọ dọ nugbo.

Afọdide ehelẹ gán gọalọna we nado mọ gblọndo he sọgbe lẹ na kanbiọ titengbe hugan gbẹ̀mẹ tọn lẹ. Gbọnna?

Whenue Jessica to dodinna nugbo Biblu tọn, afọdide he nkọ e nọ zan nado dindona núdùdù he ma na doazọ̀n viyọnnu etọn lẹ wẹ e zan. E dọmọ, “Sọwhiwhe yíyí do hianu bo basi dodinnanu ganji ko gọalọna mi nado mọ nugbo Biblu tọn.” Taidi Jessica, gbẹtọ livi susu wẹ ko plọn nuhe Biblu dọ gando kanbiọ he bọdego lẹ go:

• Naegbọn mí do togbẹ̀?

• Etẹwẹ nọ jọ to okú godo?

• Naegbọn mí do nọ jiya?

• Etẹwẹ Jiwheyẹwhe to wiwà nado doalọtena yajiji lẹpo?

• Nawẹ mí gán wagbọn bo tindo whẹndo ayajẹnọ?

A sọgan mọ gblọndo he sọgbe lẹ na kanbiọ ehelẹ po devo lẹ po eyin a nọ hia Biblu bo nọ basi dodinnanu dogọ to www.pr418.com ji.