Sa nagligad nga linibo ka tuig, wala gid sing may nakahibalo sang sabat sa sina nga pamangkot. Bilang resulta, ang makalalaton nga mga balatian kag epidemia nagpatay sang minilyon ka tawo. Sang ulihi, nadiskobrehan gid man sang mga scientist ang kamatuoran. Natun-an nila nga sa masami ang ginahalinan sang balatian amo ang kagaw—mga microorganism, pareho sang bakterya ukon virus. Ang paghibalo sinang isa lamang ka kamatuoran nagbulig sa mga tawo nga malikawan kag mabulong ang madamo nga balatian, gani naglawig kag nangin mas mapagros ang kabuhi sang binilyon ka tawo.

Kamusta naman ang iban pa nga importante nga mga pamangkot? Sa banta mo, ano ang mabenepisyo mo kon pangitaon mo ang kamatuoran parte sa sini nga mga pamangkot?

• Sin-o ang Dios?

• Sin-o si Jesucristo?

• Ano ang Ginharian sang Dios?

• Ano ang matabo sa palaabuton?

Minilyon ka tawo ang nakakita sang sabat sa sini nga mga pamangkot kag nag-uswag ang ila kabuhi. Makabenepisyo ka man sa sini nga mga sabat.

Mahimo mamangkot ka, ‘Posible gid bala nga makita ang kamatuoran parte sa tanan nga butang?’ Kay man, ang pagpangita sang kamatuoran daw mas nagabudlay na. Ngaa?

Madamo nga tawo ang wala na nagasalig nga makakuha sila sang kamatuoran sa gobierno, mga negosyante, ukon sa media. Nabudlayan ang mga tawo nga mabal-an kon bala ang ginahambal sa ila opinyon lamang ukon kamatuoran, kon bug-os ini nga matuod ukon kabutigan, kay ginapagua ini nga masaligan nga mga impormasyon. Bangod wala nagasalig ang mga tawo sa pareho nila kag kalabanan sa mga impormasyon indi man matuod, nagabinaisay sila kon ano gid ang kamatuoran kag ang kahulugan sini.

Bisan sini nga mga kabudlayan, posible gihapon nga makita ang matuod nga sabat sa importante nga mga pamangkot sa kabuhi. Paano? Pareho lang ini sa ginahimo mo para makita mo ang sabat sa mas simple nga mga pamangkot.

Nagapangita ka sang kamatuoran kada adlaw. Talupangda ang sitwasyon ni Jessica. “Ang bata ko nga babayi may malala nga allergy sa mani,” siling niya, “nga bisan gamay lang gid nga protina halin sa mani mahimo makapatay na sa iya.” Kinahanglan anay siguraduhon ni Jessica nga ang mga pagkaon nga iya ginabakal indi makahalit sa iya bata. “Ang una ko nga ginahimo, amo nga ginabasa ko anay ang mga putos ukon suludlan sang pagkaon para mabal-an ko ang mga ingrediente sini. Dayon, naga-research pa gid ako kag ginakontak pa gani ang manufacturer para masigurado nga wala gid sing bisan gamay lang nga protina halin sa mani ang pagkaon. Gina-research ko man ang iban pa nga masaligan nga impormasyon para masigurado ko nga ginasunod gid sina nga kompanya ang husto nga paagi sang paghanda sang pagkaon.”

Ang mga pamangkot nga gusto mo masabat sa imo adlaw-adlaw nga kabuhi mahimo indi pareho ka serioso sangsa sitwasyon ni Jessica, pero, para mabal-an ang sabat sa imo mga pamangkot, puede mo magamit ang masunod nga paagi:

• Hibalua ang mga impormasyon.

• Mag-research sing dugang pa.

• Siguraduha nga masaligan ang imo mga ginakuhaan sing impormasyon.

Ini nga paagi makabulig sa imo nga makita ang matuod nga sabat sa importante nga mga pamangkot sa kabuhi. Paano?

Kon nagapangita sing kamatuoran sa Biblia, ginagamit man ni Jessica ang paagi nga ginahimo niya kon naga-research parte sa allergy sang iya bata. Nagsiling sia, “Ang pagbasa kag pag-research sing maayo nakabulig sa akon nga makita ang kamatuoran sa Biblia.” Pareho kay Jessica, minilyon ka tawo ang nakatuon kon ano ang sabat sang Biblia sa sini nga mga pamangkot:

• Ngaa ari kita diri?

• Ano ang nagakatabo kon mapatay kita?

• Ngaa may pag-antos?

• Ano ang ginahimo sang Dios para madula ang tanan nga pag-antos?

• Paano mangin malipayon ang aton pamilya?

Makita mo ang matuod nga sabat sa sini nga mga pamangkot kag sa iban pa paagi sa pagbasa sang Biblia kag pag-research pa gid online sa www.pr418.com.