Tau ntau txhiab xyoo, tsis muaj leejtwg paub vim li cas thiaj muaj tej mob uas ua rau tibneeg tuag coob heev. Tsis ntev tom qab no, cov neeg tshawb txujci mam li paub qhov tseeb tias twb yog muaj tej kab mob me me uas huam thoob plaws lub cev thiaj ua rau tus neeg tsis xis neej. Qhov tseeb no pab tau kom tibneeg nrhiav tshuaj los tua tej kab mob no. Yog li ntawd, tibneeg thiaj ua neej nyob ntev zog thiab tsis tshua muaj mob lawm.

Puas muaj tej yam tseem ceeb uas tibneeg xav paub ntxiv? Koj yuav xav li cas thaum koj paub qhov tseeb txog cov lus nug no?

• Vajtswv yog leejtwg?

• Yexus Khetos yog leejtwg?

• Vajtswv lub Nceeg Vaj yog dabtsi?

• Yav tom hauv ntej yuav zoo li cas?

Thaum coob leej paub qhov tseeb txog 4 yam no, lawv lub neej zoo lawm hov ntau. Kuj yuav pab tau koj lub neej thiab.

Tej zaum koj yuav xav tias, ‘Puas yuav nrhiav tau qhov tseeb txog ib yam dabtsi li?’ Vim li cas thiaj nyuaj ua luaj rau tibneeg tshawb nrhiav kom tau qhov tseeb?

Coob leej neeg tsis tso siab rau tej nom tswv, kev lag kev luam, lossis xov xwm hauv this vis, hauv xov tooj cua, thiab hauv Is Taws Nej. Lawv tsis paub seb tej uas lwm tus qhia yog hais dag los hais tiag, lossis yog qhia raws li lawv pom zoo xwb. Vim muaj tej yam zoo li no, tibneeg thiaj tsis paub seb qhovtwg yog qhov tseeb thiab tsis paub ntseeg leejtwg li lawm.

Txawm muaj li no los peb tseem nrhiav tau qhov tseeb txog tej yam tseem ceeb, yog tias peb ua tib zoo tshawb nrhiav. Tej zaum yuav tsis nyuaj npaum li peb xav.

Txhua hnub, txawm yog dabtsi los peb yeej xav paub seb puas muaj tseeb. Muaj ib leej niam hu ua Ntsexika (Jessica). Nws tus ntxhais noj tsis tau txiv laum huab xeeb vim ua rau nws muaj mob. Yog tias nws tus ntxhais noj ib qho nyuag xwb, yuav ua rau nws tus ntxhais tuag los tau. Thaum Ntsexika mus yuav khoom noj, nws yuav tau ua tib zoo nyeem seb puas muaj txiv laum huab xeeb nyob rau hauv tso. Nws kuj hu rau tej tsev ua cov khoom noj ntawd seb lawv puas muaj txiv laum huab xeeb txuam rau hauv. Tsis tas li ntawd xwb, nws tshawb nrhiav hauv Is Taws Nej seb lwm tus hais li cas txog tej tsev ua khoom noj ntawd.

Tej zaum txhua hnub tej uas peb tshawb nrhiav tsis tseem ceeb npaum li qhov Ntsexika nrhiav. Tiamsis peb yuav tau xyaum ib yam li nws, thiaj nrhiav tau qhov tseeb txog tej yam peb xav paub. Peb xyaum li no los tau:

• Saib seb muaj li cas tiag.

• Tshawb nrhiav ntxiv.

• Saib seb tus uas qhia koj ntawd puas hais qhov tseeb.

Yog peb ua li no, peb yuav nrhiav tau cov lus teb rau tej lus nug tseem ceeb hauv peb lub neej.

Thaum Ntsexika nrhiav qhov tseeb hauv phau Vajlugkub, nws nrhiav ib yam li thaum nws tshawb nrhiav txog khoom noj rau nws tus ntxhais. Ntsexika hais tias nws yuav tau ua tib zoo nyeem thiab tshawb ntxiv nws thiaj paub qhov tseeb hauv phau Vajlugkub seb yog li cas tiag. Yog tibneeg tshawb nrhiav ib yam li Ntsexika ces lawv kuj yuav paub qhov tseeb txog tej lus nug no:

• Ua cas ho muaj tibneeg?

• Ua li cas rau tibneeg tom qab lawv tuag?

• Vim li cas thiaj muaj kev txom nyem?

• Vajtswv yuav ua li cas thiaj tsis muaj kev txom nyem lawm?

• Yuav ua li cas tsev neeg thiaj muaj kev zoo siab?

Thaum koj nyeem phau Vajlugkub thiab mus tshawb nrhiav hauv lub vej xaij www.pr418.com/hmn, koj yuav teb tau cov lus nug no.