Oure wozombura ozengi, kape nomundu nga tjiwa eziriro kepuriro ndo. Mena ranao ovandu ovengi aave ṱu i omitjise. Kombunda yoruveze, ovanongonone va muna ondjivisiro yatjiri ohunga nomitjise mbyo. Owo va muna kutja omitjise potuingi vi etwa i oupuka ouṱiṱi mbu isanewa germs, bacteria poo o virus. Ondjivisiro yatjiri ndjo ya vatera ovandu okuritjevera komitjise omingi nokuripangisa. Otjiṋa ho tja tjita kutja ovandu ovengi ve yenene okuhupa orure nokurira ovaveruke.

Hapo tjike ohunga nomapuriro yarwe omanahepero? Momunu kutja omazirio komapuriro omananḓengu ngu maye kongorere kehi mba, maye ku ṱunu vi?

• Hapo Mukuru omungendu?

• Hapo Jesus Kristus omungendu?

• Ouhona wa Mukuru otjikeṋa?

• Oruyaveze maru kakara vi?

Ovandu ovengi va muna omaziriro komapuriro ngo nu nai ve yorokera ehupo rawo. Ove wina mo yenene okumuna ouwa okuza komaziriro komapuriro ngo.

Mape ya oripura kutja, ‘Hapo me yenene vi okumuna ondjivisiro yatjiri?’ Otjingaperi kutja, iririra ko ouzeu okumuna ondjivisiro yatjiri ohunga noviṋa ovingi. Ongwaye tji pe ri nao?

Ovandu ovengi kave nongamburiro mozohoromende, ozongetjefa, ozongoramambo tjimuna oradio poo otivii okuvepa ondjivisiro yatjiri. Ovandu kave yenene okutjiwa kutja mave raerwa omambo, ovizeze poo mave raerwa oumune wovandu varwe uriri. Mena rokutja ovandu kave nongamburiro mu varwe nu ve muna ondjivisiro yoposyo, ovandu ovengi kave yenene okuhaṋa pokati kondjivisiro yatjiri nondjivisiro yoposyo.

Nandarire kutja tu nouzeu otja imbo, matu yenene okumuna omaziriro nge heri yoposyo ohunga nomapuriro omananḓengu tjinene. Omomuano uṋe? Mo yenene okutjita nao indu tjiwa tjiti oviṋa tjiva mbi u tjita kutja u mune omaziriro komapuriro nge heri omananḓengu tjinene.

Otjingaperi kutja u paha ondjivisiro yatjiri eyuva arihe. Ngatu tare kotjihorera tja Jessica. Eye wa tja: “Omuatje wandje omukazona u verisiwa i ozosukwa. Nandarire kutja wa ri okasukwa okaṱiṱi eye mape ya a ṱu.” Jessica u sokutjiwa kutja, ovikurya mbi ma randa oviveruke komuatje we poo indee. Eye wa tja: “Rutenga mbi lesa kombanda okutara kutja oviungurisiwa viṋe mbi vya ungurisiwa motjikurya ho. Okuzambo mbi tjita omakonḓononeno nu ee tonene ongetjefa ndja ungura otjikurya ho okukonḓonona kutja kamuna ozosukwa oparukaze motjikurya ho. Ami wina mbi tjita omakonḓononeno warwe okumuna kutja ongetjefa ndjo i ungura otjikurya ho momuano omuwa nomuveruke.”

Omaziriro komapuriro ngu u kondja okumuna eyuva arihe mape ya aye ha rire omananḓengu tjinene tjimuna ya Jessica, posi yokutja tjimuna Jessica, ove mo yenene okuungurisa omiano mbi mavi kongorere kehi mba okumuna omaziriro komapuriro woye:

• Muna ondjivisiro yatjiri ohunga notjiṋa tji mo vanga okutjiwa.

• Kondja okutjita omakonḓononeno okuweza ku imbi mbi motjiwa rukuru.

• Kondja okutjiwa kutja ondjivisiro ndji u na yo i nouatjiri poo indee.

Okuungurisa omiano mbi, maku ku vatere okumuna omaziriro nge heri yoposyo komapuriro omanahepero mehupo. Omomuano uṋe?

Jessica tjaa paha ouatjiri wOmbeibela, eye wa ungurisa omiano eye mbye ungurisa tji ma konḓonona ovikurya oviveruke komuatje we omukazona ngu ha ri ozosukwa. Eye wa tja: “Okulesa nokutjita omakonḓononeno omawa nomakoto kwe ndji vatera okumuna ouatjiri mOmbeibela.” Tjimuna Jessica, ovandu ovengi ve rihonga ouatjiri mOmbeibela ohunga nomapuriro nga:

• Ongwaye tji tu nomuinyo?

• Pe tjitwa tjike omundu tja ṱu?

• Ongwaye tji tu muna omauzeu?

• Mukuru u tjita tjike okuisapo omauzeu aehe?

• Matu yenene vi okukara nouṋingandu meṱunḓu?

Mo yenene okumuna omaziriro nge he ri woposyo komapuriro nga na yarwe mokulesa Ombeibela nokuungura omakonḓononeno wokomurungu morungovi ndwi www.pr418.com.