Beribu taun ti udah, nadai orang tetemuka saut ngagai tanya tu, lalu penyakit nya mega udah munuh bejuta iku nyawa. Nyau kelama, baru meh bala saintis tetemuka saut iya. Sida madahka penyakit suah nyadi ketegal kuman, tauka mikrooganisma, baka bakteria tauka virus. Pengudah nemu pemendar nya, ulih nulung orang nyeliah sereta ngubat mayuh macham penyakit. Asil iya, tu ulih ngasuh bejuta-juta orang idup panjai agi enggau bisi pengerai ti manah.

Baka ni enggau tanya bukai ke beguna agi? Ba runding nuan, nama penguntung iya nemu pemendar ngagai sekeda tanya tu?

• Sapa Petara?

• Sapa Jesus Kristus?

• Nama reti Perintah Petara?

• Nama deka nyadi jemah ila?

Bejuta iku orang ke tetemuka saut tu udah ngaga ubah ti manah ba pengidup sida. Nuan mega deka bulih penguntung ari semua saut tu.

Nuan engka nanya, “Kati aku ulih tetemuka pemendar pasal semua utai?” Diatu, ngiga pemendar pasal semua utai nyau majak tusah. Nama kebuah?

Mayuh orang enda pechayaka pemerintah, kompeni, tauka media massa ke madahka utai ngagai sida. Sida tusah deka ngelala bida entara fakta enggau runding, utai ti setengah betul, tauka penerang ti pelesu. Ketegal penerang ti salah sereta enda ulih dikearapka, mayuh orang enda sepenemu pasal ni bagi fakta ti betul enggau baka ni sida patut nemu pasal fakta nya.

Taja pia, nuan agi ulih tetemuka saut ngagai tanya ke pemadu beguna ba pengidup. Baka ni?

Ke bendar iya, ninting hari nuan mega ngiga pemendar dalam pengidup. Peratika utai ke nyadi ngagai Jessica. Iya madahka, “Anak indu aku bisi alergi ti balat ngagai kachang. Indah mimit aja kachang diempa iya, pan ulih nganu nyawa iya.” Jessica patut nentuka pemakai ke dibeli iya nadai ngundan kachang. “Keterubah, aku macha penerang pemakai nya, lalu meresa nama utai ke dichampur dalam pemakai nya. Udah nya aku ngiga pansik baru pasal dini alai ngaga, sereta lumur talipun sida, kena nentuka pemakai nya amat nadai ngundan kachang maya iya digaga ba kilang. Aku mega bisi ngiga sekeda pansik bukai ke ulih dipechaya, ngambika aku andal kompeni nya bisi standard ti tinggi kena nyaga pemakai sida.”

Utai ke digiga nuan ninting hari, engka kurang agi beguna ari utai ke digiga Jessica. Tang baka Jessica, nuan ulih ngena chara tu kena ngiga utai ti bendar:

• Belajar pasal fakta.

• Ngiga pansik.

• Tentuka penerang nya betul sereta ulih dipechaya.

Chara tu mega ulih nulung nuan tetemuka saut ti betul pasal pengidup. Baka ni?

Maya ngiga utai ti bendar dalam Bup Kudus, Jessica ngena chara ti sama baka chara iya ngiga pansik pasal alergi anak indu iya. Iya madahka, “Aku macha sereta bebendar mansik, nya nulung aku nemu pemendar ke bisi dalam Bup Kudus.” Baka Jessica, bejuta iku orang udah belajarka Bup Kudus tetemuka saut ngagai tanya tu:

• Nama tuju idup kitai?

• Nama nyadi ngagai orang ke udah mati?

• Nama kebuah mensia merinsa?

• Nama deka digaga Petara kena ngujungka pemerinsa?

• Baka ni ruang bilik kitai ulih idup lantang?

Nuan ulih nemu saut iya enggau tanya bukai ari macha Bup Kudus sereta ngiga pansik ba laman web www.pr418.com.