Ta rinivu nga dagun, awan tu makannammu ta tabbag tatun nga pakkiavu. Minillion ngana i natay megafu ta epidemia ira. Ta pappasa na tiempo, nadiskubre gabbalaman na sientista ira i kurug. Nadiskubreda nga i taki ira ay maruddu nga resulta na mikrobio ira gitta na bakteria onu virus. Megafu tatun nga kinakurug, nalisian anna noru i aru nga taki, nga narresulta ta mas apaddu anna magawa-gawayyan nga pattolay na binillion nga totolay.

Kunnasi gapa i tanakuan ira nga importante nga pakkiavu? Anni tamma i efekto nikaw na pagaleg ta tabbag taw ira nga pakkiavu?

• Sinni i Dios?

• Sinni si Jesu-Cristo?

• Anni i Pappatulan na Dios?

• Anni i mesimmu ta mappange?

Minillion nga totolay i nakaleg ta tabbag tatun ira nga pakkiavu anna nakkasta i pattoleda. Pammakapianammu gapa i tabbag tatun ira.

Baka iyavu mu, ‘Posible kari nga malegan i kinakurug meyannung ta maski anni nga gannug?’ Gittana mas mariga ngana garay nga malegan i kinakurug ta aru nga gannug. Ngatta?

Aru nga totolay i ari mattalo nu kurug kari i kakkagian na gobiernu, kompania, onu na balita ira. Marigatan ira nga masingan nu kurug onu opinion laman i tadday nga gannug, nu kumpleto kari i informasion, onu nu kinaladdug paga lagu yatun. Megafu ta awan tu pattalo na totolay ta kataggi-tadday anna aru nga informasion i falsu, makkorontra i totolay nu anni talaga i kurug anna nu anni i kebalinan natun.

Maski nu kunnatun, posible lagapa nga malegan i fustu ira nga tabbag ta importante ira nga pakkiavu ta pattolay. Kunnasi? Kuammu i gittana kukukuammu nu magaleg ka tu tabbag ta simple ira nga gannug.

I kurug, kada aggaw ka nga magala-aleg tu kinakurug. Ikonsidera i situasion ni Jessica. “Grabe i allergy ta mani na ana ku nga babay,” kunna, “nga awayyana nga ipatay maski nu baddi laman i makanna tatun.” Mawag nga ammuan ni Jessica nu puede ta anana i makan nga gatanganna. “Innakku labbi tu mapia i ingredient ira na makan. Tapus mar-research ngà anna kontakakku paga lagu i kompania tapenu siguraduan nga awan tu nekivu nga mani tatun. Maningan ngà gapa tu mapattalakkan ira nga referensia tapenu masiguradù nga memmugug i kompania ta pappreparada tu produkto.”

Awayyana nga ari tu kunnari kakomplikadu i inaggaw nga pagaleg mu ta kinakurug, ngem gitta ni Jessica, awayyam kuan i tumunug ira tapenu malegammu i tabbag ta pakkiavu mu ira:

• Ammuan i fustu ira nga detalye.

• Mar-research paga.

• Siguraduan nga mapattalakkan i referensiam ira.

Nu kuammu danaw, malegammu gapa i fustu ira nga tabbag ta importante ira nga pakkiavu. Kunnasi?

Ta paggigiammu ni Jessica ta Biblia, kingnguana gapa i gittana kukukuanna nga par-research ta allergy na anana ta makan. Kinagina, “Naduffunannà na pabbibbig tu Biblia anna par-research tu mapia tapenu malegan i kinakurug.” Kagitta ni Jessica, nagigiammu na minillion nga totolay i tabbag na Biblia taw ira nga pakkiavu:

• Ngatta naparatu ittam?

• Anni i mesimmu nu matay ittam?

• Ngatta mazziga-riga ittam?

• Anni i kukukuan na Dios tapenu mapawan i pazziga-riga?

• Kunnasi ittam mapeggan tu magayayya nga familia?

Malegammu i fustu nga tabbag taw ira nga pakkiavu anna ta karuan paga gukaban na pabbibbig tu Biblia anna par-research online ta www.pr418.com.