Evaọ idu ikpe buobu, ohwo ọvo ọ riẹ uyo onọ yena ha, yọ eyao nọ i re vo i je kpe ima ahwo buobu. Uwhremu na, egba-eriariẹ a tẹ te riẹ oware nọ o be whae ze. A kiẹ via inọ emera esese nọ ma rẹ sae rọ ubiẹro ruẹ hẹ e rẹ wha ẹyao ze​—ejọ rai họ enọ a re se bacteria gbe virus. Oware yena nọ egba-eriariẹ a kiẹ via na u fiobọhọ siwi uzuazọ ahwo buobu no jẹ whaha eyao buobu no. Onana u ru nọ ahwo buobu a be rọ rria kri je wo omokpokpọ.

Kọ ẹvẹ kpahe enọ efa nọ i wuzou evaọ uzuazọ? Irere vẹ who roro nọ i re te owhẹ nọ whọ tẹ riẹ uzẹme na kpahe enọ nọ e rrọ obotọ na?

• Ono họ Ọghẹnẹ?

• Ono họ Jesu Kristi?

• Eme họ Uvie Ọghẹnẹ?

• Ẹvẹ akpọ na ọ te jọ evaọ obaro?

Ima ahwo buobu a riẹ iyo enọ nana, yọ onana u ru uzuazọ rai woma gaga no. Whẹ omara whọ sai wo erere nọ whọ tẹ riẹ iyo enọ na.

Whọ sae nọ inọ, ‘Kọ o ginẹ lọhọ re ohwo ọ riẹ uzẹme na kpahe oware kpobi nọ ọ gwọlọ riẹ?’ Onọ nana u wuzou keme enẹna o rrọ bẹbẹ re ohwo ọ riẹ uzẹme na kpahe eware buobu. Fikieme o jẹ rrọ ere?

Ahwo buobu a fievahọ egọmeti hi hayo enọ e rẹ thueki gbe itu enọ e rẹ niyẹrẹ keme a riẹ nọ a rẹ ta uzẹme he. O rrọ bẹbẹ re ohwo ọ riẹ sọ amọfa a be ta uzẹme, ko ẹme dhere hayo bi gu ọrue. Fikinọ ahwo a fievahọ ohwo ọvo ho yọ evuẹ buobu e rrọ uzẹme he, ahwo buobu a rẹ rọwo ho nọ whọ tẹ make be vuẹ ae uzẹme na gbe erere nọ uzẹme na o rẹ sae wha se ae.

O make rrọ ere na, ohwo ọ rẹ sae riẹ uzẹme na kpahe enọ nọ e mai wuzou evaọ uzuazọ. Evaọ oghẹrẹ vẹ? Nọ ohwo o te bi ru eware nọ ọ be hai ru nọ ọ tẹ gwọlọ riẹ uzẹme na kpahe eware efa.

Uzẹme riẹ họ, kẹdẹ kẹdẹ whọ be hae kiẹ re whọ riẹ uzẹme kpahe oware jọ. Joma ta kpahe oriruo Jessica. Ọ ta nọ: “Ọmọtẹ mẹ o wo ẹyao jọ nọ ọ rẹ wọ ze nọ ọ tẹ re oghẹrẹ emu jọ, yọ o tẹ make rọnọ ọ re emu na tulo ho, o rẹ sai fi uzuazọ riẹ họ ọza.” Taure Jessica ọ tẹ te dẹ emu, ọ rẹ ruẹ nọ emu na o ti kiehọ ọmọtẹ riẹ oma. Ọ ta nọ: “Oware ọsosuọ nọ me re ru nọ me te kpohọ eki họ, me re se ẹme nọ a kere fihọ uke emu nọ mẹ gwọlọ dẹ re mẹ riẹ eware nọ a ro ru ei. Kẹsena mẹ vẹ gbẹ kiẹ kpahe iẹe je se ekọmpene nọ o ru emu na re u mu omẹ ẹro nọ oware ovo nọ o rẹ wha enwoma ze o rrọ eva riẹ hẹ. Me re je se eware nọ amọfa a kere kpahe ekọmpene na re mẹ riẹ sọ mẹ sai gine fievahọ ekọmpene na.”

O sae jọnọ eware nọ whọ be hae kiẹ kpahe kẹdẹ kẹdẹ i wo ohẹriẹ, rekọ wọhọ Jessica, whọ sai ru eware nọ e rrọ obotọ na re whọ gwọlọ iyo kẹ enọ ra:

• Daoma riẹ uzẹme na.

• Ru ekiakiẹ.

• Jọ u mu owhẹ ẹro nọ a rẹ sai fievahọ eria nọ whọ be jọ ru ekiakiẹ na.

Whọ sae rọ oghẹrẹ ọvona riẹ iyo rọkẹ enọ nọ e mai wuzou evaọ uzuazọ. Evaọ oghẹrẹ vẹ?

Nọ Jessica ọ jẹ gwọlọ riẹ uzẹme na kpahe oware nọ Ebaibol na o wuhrẹ, o ru oware ovona nọ ọ be hai ru rọ gwọlọ emu nọ o re kiehọ ọmọtẹ riẹ oma na. Ọ ta nọ, “Mẹ romatotọ se Ebaibol na je ru ekiakiẹ, yọ onana u fiobọhọ kẹ omẹ riẹ uzẹme na kpahe oware nọ Ebaibol na o gine wuhrẹ no.” Wọhọ Jessica, ima ahwo buobu a wuhrẹ oware nọ Ebaibol na ọ ta kpahe enọ nọ e rrọ obotọ na no:

• Eme họ ẹjiroro uzuazọ?

• Eme ọ rẹ via nọ ohwo o te whu no?

• Fikieme ahwo-akpọ a be rọ ruẹ uye?

• Eme Ọghẹnẹ o bi ru re o si uye-oruẹ no otọ?

• Ẹvẹ ma sai ro wo evawere evaọ uviuwou mai?

Whọ sae riẹ iyo enọ nana gbe enọ efa nọ who te bi se Ebaibol na je ru ekiakiẹ evaọ oria itanẹte mai, www.pr418.com/iso.