Pɩnzɩ kudokiŋ sakɩyɛ nzɩ sɩɖɛwa yɔ sɩ-taa, nɔɔyʋ taapɩzɩɣ se ɛtɩlɩ ɛzɩma kʋdɔmɩŋ kɩɖɛɖɛŋ ɖɛɣ ɛyaa yɔ. Nɛ alɩwaatʋ ndʋ tɩ-taa, kɩjɩkpɩŋ yaa kʋdɔmɩŋ kɩɖɛɖɛŋ kʋ ɛyaa miiliyɔɔwaa sakɩyɛ. Pʋwayɩ lɛ, lɛɣtʋ ñɩnɩyaa kɔm nɛ patɩlɩ toovenim pɩlɩɩnɩ kʋdɔmɩŋ ɛnɩ ɩ-yɔɔ. Lɛɣtʋ ñɩnɩyaa kɔm nɛ pana se kʋdɔmɩŋ pee ɛzɩ tuliŋ yaa microorganisme, cɛkaɣ yaa bactérie, kʋdɔŋ sɔtʋ yaa virus yekina nɛ kʋdɔmɩŋ ɖɛɣ ɛyaa. Lɛɣtʋ ñɩnɩyaa lɩ toovenim tɔm ndʋ tɩ-yɔɔ lɛ, pɩsɩnɩ ɛyaa nɛ patɩlɩ ɛzɩma pɛfɛɛ kʋdɔmɩŋ ɛnɩ yɔ, nɛ piyele nɛ ɛyaa miiliyaarɩwaa wɛɛnɩ tɔnʋʋ taa alaafɩya nɛ pacakɩ wezuu kɩɖaɣlʋʋ.

Nɛ ye ɖɩtɩlɩ wezuu caɣʋ taa tɔm kɩcɛyɩtʋ lɛɛtʋ yɔɔ toovenim yɔ, pɩwazɩɣ-ɖʋ mbʋ ɖɔɖɔ na? Ye ŋtɩlɩ toovenim pɩlɩɩnɩ tɔm pɔzʋʋ mbʋ pɩkɔŋ yɔ pɩ-yɔɔ yɔ, ɖoŋ weyi pɩpɩzɩɣ nɛ pɩwɛɛnɩ ñɔ-yɔɔ?

• Akɛ Ɛsɔ toovenim tʋ?

• Anɩ Yesu Krɩstʋ kɛnaa?

• Ɛbɛ Ɛsɔ Kewiyaɣ kɛnaa?

• Ɛbɛ cee wayɩ kaɣ-ɖʋ kɔnʋʋ?

Ɛyaa miiliyɔɔwaa sakɩyɛ hiɣ tɔm pɔzʋʋ mbʋ pɩ-yɔɔ cosuu nɛ pɩñɔɔzɩ pe-wezuu caɣʋ nɛ pɩkɩlɩ. Ye ŋhiɣ tɔm pɔzʋʋ mbʋ pɩ-yɔɔ cosuu yɔ, pɩpɩzɩɣ nɛ pɩwazɩ ña ɖɔɖɔ.

Pɩtɩla, ŋpɩzɩɣ nɛ ŋpɔzɩ ña-tɩ se: ‘Ɛzɩ ɛyʋ pɩzɩɣ nɛ ɛtɩlɩ paa mbʋ lɛ, pɩ-yɔɔ toovenim na?’ Toovenim lɛ, pɩpɩzɩɣ nɛ pɩwɛɛ kaɖɛ se ɛyʋ ɛtɩlɩ paa mbʋ lɛ, pɩ-yɔɔ toovenim. Ɛbɛ yɔɔ?

Ɛyaa sakɩyɛ ɩɩtasɩɣ taʋ liu kominawaa, tadɩyɛ agbaa nɛ teelee nɛ raadiyoowaa yɔɔ tɔm yɔɔdɩyaa se peheyi-wɛ toovenim. Alɩwaatʋ ndʋ nɔɔyʋ yɔɔdʋʋnɩ-wɛ yɔ, pɩwɛ-wɛ kaɖɛ se patɩlɩ se, ɛ-maɣmaɣ ɛ-lɩmaɣza eheyiɣ-wɛ, ɛmɛsɩɣ-wɛ natʋyʋ, ɛcɛtɩɣ-wɛ kɩcɛtʋ yaa toovenim eheyiɣ-wɛ. Ðɩwɛ alɩwaatʋ ndʋ tɩ-taa ɛyaa ɩɩtasɩɣ taʋ ɖama liu nɛ cɛtɩm tɔm tɔyaa yɔ, pʋyɔɔ ɛyaa kiziɣ tɔm tɩŋa pɩkpɛndɩnɩ ndʋ tɩkɛ toovenim yɔ.

Paa pɩwɛ kaɖɛ yɔ, ɛyʋ pɩzɩɣ nɛ ɛtɩlɩ wezuu caɣʋ taa tɔm kɩcɛyɩtʋ ndʋ ɛpɔzʋʋ ɛ-tɩ yɔ, tɩ-yɔɔ toovenim tɔm. Ɛzɩma tɩyɛ? Ŋpɩzɩɣ nɛ ŋtɩlɩ-tʋ ye ŋñakɩ pana ɛzɩ ŋlakʋʋ paa ɖooye, alɩwaatʋ ndʋ ŋtazɩɣ tɔm natʋyʋ taa se ŋna se tɩkɛ toovenim yɔ.

Pɩtʋʋ fɛyɩ se ŋñɩnɩɣ toovenim paa evemiye nɖɩ. Maɣzɩ Jessica kɩɖaʋ yɔɔ nɛ ŋna. Ɛyɔɔdaa se: “Mɛn-pɛlɛ tɔkɩ tɔɔnaɣ ŋga ka-taa nɛ kɛtʋʋ yɔ lɛ, pɩhaɣ-ɩ mʋyʋsʋʋ nɛ halɩ pɩpɩzɩɣ pɩkɔnɩ-ɩ sɩm.” Pʋyɔɔ Jessica ñakɩ pana se tɔɔnasɩ nzɩ ɛyakɩ ɛ-pɛlɛ yɔ kɛtʋʋ ɛtaawɛɛ sɩ-taa. Ɛtɔm se: “Kajalaɣ lɛ, mankalɩɣ tɔɔnasɩ nzɩ pɛpɛdɩɣ yɔ sɩ-yɔɔ takayɩsɩ camɩyɛ se mana mbʋ mbʋ pɩwɛ tɔɔnasɩ nzɩ sɩ-taa yɔ. Pʋwayɩ lɛ, mañɩnɩɣ se mana se petisidi kɛtʋʋ ññɩɩ tɔɔnasɩ nzɩ sɩ-taa. Mantɩŋɩɣnɩ ɖɔɖɔ intɛrnɛɛtɩ nɛ tɔm ñɩnʋʋ nʋmɔŋ lɛɛŋ yɔɔ se mana se papɩzɩɣ pataa liu mba pɛpɛdɩɣ tɔɔnasɩ nzɩ yɔ.”

Pɩtɩla, tɔm ndʋ tɩ-yɔɔ ŋñɩnɩɣ se ŋtɩlɩ toovenim paa evemiye nɖɩ yɔ, tɩ-tɔm tɩcɛyɩ ɛzɩ Jessica ñɩndʋ yɔ, ɛlɛ ŋpɩzɩɣ nɛ ŋkpɛzɩ nɩŋgbanzɩ nzɩ ɛkpɛzaa yɔ, nɛ ŋhiɣ tɔm kɩcɛyɩtʋ ndʋ ŋpɔzʋʋ ña-tɩ yɔ, tɩ-yɔɔ toovenim tɔm. Nɩŋgbanzɩ nzɩ yɔ:

• Ñɩnɩ mbʋ pɩkɛ toovenim yɔ.

• Tazɩ pɩ-taa camɩyɛ tete.

• Tazɩ nɛ ŋna se papɩzɩɣ nɛ pataa liu intɛrnɛɛtɩ lona yaa nʋmɔŋ lɛɛŋ weyi ɩ-yɔɔ ŋtɩŋɩɣna se ŋñɩnɩ toovenim tɔm yɔ.

Nɩŋgbanzɩ kʋɖʋmsɩ nzɩ pɩwɛɛ se ŋkpɛzɩ alɩwaatʋ ndʋ ŋñɩnɩɣ wezuu caɣʋ taa tɔm kɩcɛyɩtʋ yɔɔ toovenim tɔm yɔ. Ɛzɩma tɩyɛ?

Nɩŋgbanzɩ nzɩ Jessica kpɛzɩɣ se ɛtɩlɩ se tɔɔnasɩ nzɩ ɛyakɩ ɛ-pɛlɛ yɔ, sɩɩkɔŋnɩ ɛlɛ kaɖɛ yɔ, nzɩ ɖɔɖɔ ɛkpɛzaa alɩwaatʋ ndʋ ɛñɩnaɣ wezuu caɣʋ taa tɔm kɩcɛyɩtʋ yɔɔ toovenim tɔm yɔ. Ɛyɔɔdaa se: “Ɛzɩma mankam ñʋʋ nɛ Bibl kalʋʋ nɛ mantazɩ tɔm taa tete yɔ, pɩsɩnɩ-m nɛ malɩɩ Bibl taa toovenim tɔm yɔɔ.” Ɛyaa miiliyɔɔwaa sakɩyɛ laba ɖɔɖɔ ɛzɩ Jessica labʋ yɔ, nɛ patɩlɩ tɔm ndʋ Bibl wɩlɩɣ pɩlɩɩnɩ tɔm kɩcɛyɩtʋ tʋnɛ tɩ-yɔɔ yɔ:

• Ɛbɛ yɔɔ ɖɩwɛ wezuu?

• Ɛyʋ sɩkɩ lɛ, ɛbɛ pɩtɛŋnɩ-ɩ?

• Ɛbɛ yɔɔ kʋñɔmɩŋ wɛ ɛjaɖɛ yɔɔ?

• Ɛbɛ Ɛsɔ ɖiɣni labʋ se eyele nɛ kʋñɔmɩŋ sɩɩ tɩnaɣ?

• Ɛbɛ pɩwɛɛ se ɖɩla nɛ ɖihiɣ koboyaɣ hɔʋ taa?

Ŋpɩzɩɣ nɛ ŋhiɣ tɔm pɔzʋʋ mbʋ nɛ tɔm pɔzʋʋ lɛɛbʋ yɔɔ cosuu, ye ŋkalɩɣ Bibl nɛ ŋñɩnɩɣ tɔm lɛɛtʋ pɩtɩŋnɩ www.pr418.com yɔɔ yɔ.