Bamvula mingi me luta, ata muntu mosi ve zabaka mvutu na ngiufula yina. Bantu mingi fwaka sambu na bamaladi yina ke sambukilaka bantu. Nsuka-nsuka, bantu ya mayele zabaka kieleka na diambu yai. Bo kwisaka kuzaba nde mbala mingi bantu ke bakaka maladi na nzila ya bamikrobe mu mbandu ba bactéries to bavirisi. Kuzaba kieleka yina me sadisaka bantu na kuditanina mpi na kusansa bamaladi mingi. Yo me sadisaka bantu mingi na kuzinga mingi mpi na sante ya mbote.

Inki beto lenda tuba sambu na bangiufula ya nkaka ya mfunu? Inki mutindu kuzaba kieleka na bangiufula yai ta sadisa nge?

• Nzambi kele nani?

• Yezu Kristu kele nani?

• Kimfumu ya Nzambi kele nki?

• Inki mambu ta salama na bilumbu ke kwisa?

Bantu mingi me zwaka bamvutu na bangiufula yai mpi bo me kumaka kuzinga mbote kibeni. Bamvutu na bangiufula yai lenda natila nge mpi mambote.

Nge lenda kudiyula nde: ‘Inki mutindu mono lenda zwa kieleka ya me tala kima mosi buna?’ Ya  kieleka, kuzaba kieleka na yina me tala mambu mingi ke kuma kaka mpasi. Sambu na nki?

Bantu mingi ke ndimaka ve nde baluyalu, mumbongo to bima yina ke mwangaka nsangu lenda songa bo mambu ya kieleka. Sambu na bantu yina, yo kele mpasi na kuzaba kana mambu yina bantu ya nkaka ke zabisa bo kele ya kieleka, to bo ke pesa bo kaka bangindu na bo, ke bumbila bo mambu ya nkaka to ke kusa bo. Ata bantu mingi ke tudilaka ve bantu ya nkaka ntima mpi ke monaka nde bansangu ya nkaka kele ya luvunu, bo ke zabaka ve nki mambu kele ya kieleka mpi nki yo ke tendulaka sambu na bo.

Ata nge ke mona mambu yai ya mpasi, nge lenda zwa bamvutu ya kieleka na bangiufula mingi ya mfunu ya luzingu. Inki mutindu? Kana nge ke sala bansosa sambu na kuzwa bamvutu na bangiufula yina kele kibeni mfunu mingi ve.

Bantangu ya nkaka, nge ke sosaka kuzaba kieleka konso kilumbu. Beto tadila mbandu ya Jessica. Yandi ke tuba nde: “Mwana na mono ya nkento ya bamvula 12 ke belaka ngolo kana yandi me dia nguba. Kana yandi me dia kima yina kele ti vitamine ya nguba ata fioti, yandi lenda fwa.” Yo ke lombaka nde Jessica kuzaba mbote madia yina yandi ke sumba sambu yandi tanina sante ya mwana na yandi. Yandi ke tuba diaka nde: “Mono ke tangaka ntete papie yina bo ke tulaka na zulu ya madia sambu na kuzaba mbote bima yina bo tulaka na kati. Na nima mono ke sosaka kuzaba kana bima yina kele ti vitamine ya nguba sambu yo vanda ve kigonsa sambu na sante ya mwana mpi nkutu mono ke sosaka kusolula ti kompani yina ke salaka madia yango. Mono ke salaka mpi bansosa bisika ya nkaka sambu na kundima nde kompani yango ke salaka madia na mutindu ya mbote.”

Ziku bangiufula yina nge ke sosaka kuzwa bamvutu na yo kele ve mfunu mingi bonso yina ya Jessica, kansi bonso Jessica, nge lenda sadila mayele yai ya ke landa sambu na kuzwa bamvutu na bangiufula na nge:

• Sosa kuzaba mambu ya kieleka.

• Sala bansosa ya nkaka.

• Ndima nde bisika yina nge ke sala bansosa ta pesa nge bamvutu ya kieleka.

Kusala mutindu yai lenda sadisa nge na kuzwa bamvutu ya kieleka na bangiufula ya mfunu ya luzingu. Inki mutindu?

Ntangu Jessica vandaka kusosa kieleka ya Biblia, yandi sadilaka mayele ya mutindu mosi bonso yina yandi ke sadilaka ntangu yandi ke sosaka kuzaba bima yina lenda bedisa mwana na yandi kana yo kele na madia. Yandi ke tuba nde: “Kutanga na dikebi yonso mpi kusala bansosa ya me fwana sadisaka mono na kuzaba kieleka yina kele na Biblia.” Bonso Jessica, bantu mingi me zabaka mambu yina Biblia ke tubaka sambu na bangiufula yai:

• Sambu na nki beto kele na luzingu?

• Inki ke kuminaka beto kana beto me fwa?

• Sambu na nki beto ke monaka mpasi?

• Inki Nzambi ke sala sambu na kumanisa bampasi yonso?

• Inki mutindu beto lenda vanda ti luzingu ya kiese na dibuta?

Nge lenda zwa bamvutu ya kieleka na bangiufula yai to na bangiufula ya nkaka ntangu nge ke tanga Biblia mpi ke sala bansosa ya nkaka na Internet na www.pr418.com.