Tuka mvu miayingi, ke vena muntu ko wazaya e mvutu za kiuvu kiaki, wantu ayingi bafwa mu kuma kia vuku. Kuna kwalanda, akwa ngangu basolola e mvutu za kiuvu kiaki. Babakula vo e vuku mu mimvidi miakete-kete kitukanga, i sia vo, microorganismos, bactérias yovo vírus. O zaya e ludi kiaki, diasadisa wantu mu kuyitanina yo wuka yimbevo yayingi. Ediadi difilanga wantu ayingi mu zinga mvu miayingi yo kala ye vimpi wambote.

Adieyi tuvova mu kuma kia yuvu yankaka yamfunu nze eyi ilende?

• Nani i Nzambi?

• Nani i Yesu Kristu?

• Nki i Kintinu kia Nzambi?

• Aweyi ukala e zingu kuna sentu?

Mafunda ye mafunda ma wantu besololanga e mvutu za yuvu yayi yo tomesa e zingu kiau. Ngeye mpe olenda vua e nluta muna mvutu za yuvu yayi.

Nanga olenda vova vo: ‘O solola e ludi mu kuma kia diambu dimosi diampasi dikalanga.’ Ozevo, adieyi tuvova mu kuma kia solola e ludi kia mambu mayingi?

Wantu ayingi ke bevingilanga diaka ko vo ayadi, akwa yinkita yovo amwangi a nsangu babavovesa e ludi. Diampasi kwa wantu mu bakula kana vo mana akaka bekubavovesanga i ludi kikilu yovo ngindu za yau kibeni besonganga, mambu mankaka baswekele yovo luvunu bevovanga. Mu kuma kia lembi bundaziana diaka vuvu yo ulolo wa nsangu za luvunu, wantu ke bekwikilanga diaka mu ludi ko ye nluta kilenda kubatwasila.

Kana una vo diampasi, olenda solola e mvutu zakieleka za yuvu yamfunu ya zingu. Aweyi olenda zo sololwela? Muna sadila e ndekwa osadilanga mu solola e mvutu muna mambu ma lumbu ke lumbu.

Muna vova e ludi, e lumbu yawonso ovavanga zaya e ludi kana mu diambu dimosi. Tala dina Jessica kevanganga. Wavova vo: “Mwan’ame ankento obakamanga alergia avo odidi konso lekwa kiasiwa e nguba, kana nkutu fiakete filenda kumvonda.” Jessica ovavanga zaya kana vo e madia kesumba ke mevanga mbi kwa mwan’andi ko. Wakudikila vo: “E diambu diantete ivanganga i tanga e papela yalamikwa muna lekwa kia dia mu zaya kana nki kiasiwa mo. I bosi, ivavululanga yo bokela ana bevanganga lekwa yoyo mu kala ye ziku vo ke musangilu nguba ko. Ivavululanga diaka mu nzila zankaka mu zaya kana vo ndenda bunda e vuvu muna mpila ina e kompani diodio divangilanga o madia mau.”

E mambu ovavanga zayila e ludi malenda kala maswaswana ye ma Jessica, kansi nze Jessica, olenda sadila ndekwa zilende mu solola e mvutu za yuvu yaku:

• Vava zaya e ziku kia diambu.

• Toma vavulula.

• Kala ye ziku kana vo e fulu ovavulwilanga kiafwana bundwa e vuvu.

E ndekwa zazi zilenda kusadisa mu solola e mvutu zakieleka za yuvu yamfunu ya zingu. Mu nkia mpila?

E ndekwa kesadilanga o Jessica mu vava madia mambote mu kuma kia mwan’andi una ye alergia i zau mpe kesadilanga mu vavulula e ludi muna Bibila. Wavova vo: “Otoma tanga yo vavulula ye fululu kiawonso, dikunsadisanga mu solola e ludi muna Bibila.” Nze Jessica, mafunda ye mafunda ma wantu besololanga e mvutu za Bibila mu kuma kia yuvu eyi:

• Ekuma twinina ova nza?

• Adieyi dibwilanga wantu vava befwanga?

• Ekuma wantu bemwenanga e mpasi?

• Adieyi Nzambi kevanganga muna fokola e mpasi zawonso?

• Aweyi tulenda kadila ye zingu kia nzo kiakiese?

Ongeye mpe olenda solola e mvutu zakieleka za yuvu yayi ye yuvu yankaka muna tanganga e Bibila yo vavulula muna nzil’eto ya internete www.pr418.com.