Mu bula bwa myaka mivule, i kutupu wadi uyukile malondololo a kino kipangujo. Mwenda mafuku, misongo ne bipupo bya mbá byaipaya bantu midiyo ne midiyo. Kupwa, befundi ba sianse bayuka bubine. Basokwele amba divule dine misongo itambanga ku bīshi​—mamikrobe, kimfwa oa atelwa bu mabacteri ne mavirise. Kusokola buno bubine’tu bumo kwakweshe bantu bepuke misongo mivule ne kwiyundapa, kine kyalengeje bantu midiyo ne midiyo bekale’ko kitatyi kilampe kadi bakomo ku ngitu.

Le bipangujo bikwabo bya mvubu nabyo? Molangila, kukimba bubine bwa bipangujo bilonda’ko’bi kukutala nobe namani?

• Lelo Leza i ani?

• Lelo Yesu Kidishitu i ani?

• Lelo Bulopwe bwa Leza i bika?

• Lelo i bika bitutengēle kumeso’ku?

Bantu midiyo ne midiyo batene malondololo ku bino bipangujo, balumbulula būmi bwabo. Nobe ano malondololo abwanya kukukwasha.

Padi ubwanya kwiipangula’mba, ‘le bibwanika’tu namani kusokola bubine bwa kintu kampanda?’ Shako, kusokola bubine bwa kintu kampanda kumweka bu kukomo bininge. Mwanda waka?

Mwanda bantu bavule kebakikulupilepo amba baludiki, bansunga, ne ba ku bisanji babwanya kwibalombola bubine. I bakomenwe kushiañanya myanda ya bine na milangwe ya bantu, bubine kipindi, ne bubela bwa patōkelela bulombolwa pamo bwa myanda ikulupilwa. Bantu byokebakikulupilepo binena bakwabo, kadi myanda mivule byoikalanga ya bubela, kino kibalengejanga bapatanye myanda ya bine ne mvubu yayo mine.

Nansha byokudi ano makambakano, malondololo a bine ku bipangujo bya mvubu mpata mu būmi tubwanya kwiasokola. Namani? Na kwingidija bwino boingidijanga mu būmi bwa difuku ne difuku.

Difuku ne difuku, wikalanga ukimba bubine mu muswelo kampanda. Tala kimfwa kya Jessica. Unena’mba: “Nyumu ibelekanga bininge wami mwana mwana-mukaji, kadi nansha ke nyumu mityetye myele mu byakudya ibwanya’nka ne kumwipaya.” Jessica ukimbanga bidi kuyuka shi byakudya byapota kebisapo kutūla būmi bwa wandi mwana mu kyaka. Ubweja’ko amba: “Dibajinji bidi ntañanga senene bilembelwe pa kikopo nansha kalato mwa kujingulwila bidi munda. Kupwa nalongela’ko bukimbi bukwabo, pakwabo nakokweja’nka ne bene balongele’byo mwa kujingulwila’mba i mutupu kalunyumu nansha katyetye kapityīle’mo. Kadi ntanga mutyima ne ku binena bakwabo pa kuyuka shi sosiete’ya inenenwanga māya pa muswelo oilongolola bidibwa.”

Padi abe kukimbengapo bubine difuku ne difuku na kasuminiji na mulongelanga Jessica, inoko pamo bwa Jessica, ubwanya kulonga bilonda’ko’bi pa kutana malondololo ku bipangujo byobe:

• Kimba kuyuka myanda.

• Longela’ko bukimbi bukwabo.

• Jingulula’mba nsulo ya bukimbi bobe i ikulupilwa.

Kulonga namino kubwanya kukukwasha utane malondololo a bine ku bipangujo bya mvubu mu būmi. Namani?

Jessica paadi ukimba bubine bwa mu Bible, wakimbile’bo enka mwakimbilanga kujingulula byakudya biletela wandi mwana misongo. Unena’mba: “Kutanga biyampe ne kulonga bukimbi busumininwe ko kwankweshe nsokole bubine bwa mu Bible.” Pamo bwa Jessica, bantu midiyo ne midiyo i befunde byobya binena Bible pa bino bipangujo:

• Le kyotwikadile’ko i kika?

• Le twikalanga namani shi tubafu?

• Mwanda waka kudi masusu?

• Le Leza ukapwanga masusu onso namani?

• I muswelo’ka otubwanya kwikala na nsangaji mu kisaka?

Ubwanya kutana malondololo akulupilwa ku bino bipangujo ne ku bikwabo shi utange Bible ne kulongela’ko bukimbi bukwabo pa diteba dya www. jw.org.