Hadi yayaaka yayivulu yinahitihu, kwosi niwumu welukili chatandaña nyisoñu nawa antu amavulu afwili nayipupu. Nkumininaku, asayantisiti elukili chalala. Awanini nawu nyisoñu yenzaña muloña watububu twanyanya nankashi twaletaña yikatu. Ichi chalala chelukiliwu chinakwashi antu kukañesha yikatu yayivulu nawa anakuyuuka nikushakama yaaka yayivulu.

Tukuhoshahu netudi hamalwihu amakwawu alema? Munakutoñojoka nenu kukeñakeña ñakwilu yalala yamalwihu adi heshina kunateli kuyikwasha?

• Nzambi hinyi?

• Yesu Kristu hinyi?

• Wanta waNzambi hichumanyi?

• Yumanyi yikamwekana kumbidi?

Antu mavulu anawani ñakwilu yanawa malwihu nawa chihandilu chawu chinawahiliku. Ñakwilu yanawa malwihu yinateli kuyikwasha ninenu.

Munateli kudihula nenu: ‘Nateli kwiluka ñahi chalala hachuma chidi chejima?’ Nawa neyi munakukeña kwiluka chalala hayuma yayivulu chakalaña nankashi. Muloñadi?

Antu amavulu akuhwelelaña wanyi mwahoshaña jinfulumendi, akwamabizinesi hela hayikuzulemba nawu mwalala. Chayikalilaña kwaambula nsañu kulonda eluki chalala ninsañu yakutwamba muyuma yahoshañawu. Chineli mpinji yitunakushakamamu antu adikuhwelela wanyi nawa atwambaña, antu akaanaña chalala nawa amonaña nawu chinateli kuyikwasha wanyi.

Hela kudi kukala kwamuchidiwu, komana tunateli kuwana ñakwilu yalala yamalwihu alema adihulañawu antu. Tukuyiwana ñahi? Kuhitila muzatisha njila jimwazatishaña mpinji yejima.

Hefuku-hefuku mwakeñakeñaña wunsahu walala. Talenu kukala kunakumonawu aJessica. Nawu: “Mwanami wamumbanda wakataña nankashi neyi yada yakuda mudi nyimu,” chakwila neyi yada yakuda kudi tunyimu hela twantesha yinateli kumujaha.” A Jessica atela kwiluka nawu yakuda yinakulandawu yikumuletela mwanawu kukala wanyi. “Nasambilaña kutaña chinasonekiwu hayakuda hakwila niluki yuma yatuñiliwu nachu oyu yakuda.” Kufumahu nakeñakeñaña wunsahu wukwawu nawa nehulaña atuñili oyu yakuda kulonda niluki neyi kwosi yuma yikwawu yayiliku yikuleta kukala. Nehujolaña cheñi antu eluka kulonda nitiyi neyi oyu kampani mwalala yatuñaña chiwahi yakuda.”

Hadaha njila yimwazatishaña yakuwaninamu chalala yinambuki nayazatishañawu aJessica, zatishenu njila jidi heshina kulonda muwani ñakwilu yamalwihu imukweti.

• Keñakeñenu chalala.

• Keñelenuhu nsañu yikwawu.

• Ihulenu antu eluka.

Dichi mwatela kwila nihakuwana ñakwilu yamalwihu alema. Munjilanyi?

Njila yazatishañawu aJessica kukeñelamu mwanawu yakuda diyi njila yazatishiliwu hakukeña chalala chamuBayibolu. Ahosheli nawu, “Kutaña nakanañachima nikusandujola chikupu kwankwashili kuwana chalala muBayibolu.” Kufwana aJessica, antu amavulu makonu aneluki chahosha Bayibolu hanawa malwihu:

• Muloñadi chitwekalilaku?

• Chumanyi chamwekanaña neyi muntu nafwi?

• Muloñadi chitwakabakenaña?

• Yumanyi yinakwilayi Nzambi kulonda yamanishi makabi?

• Tunateli kwikala ñahi nachisaka chamuzañalu?

Munateli kuwana ñakwilu yanawa malwihu nimalwihu amakwawu neyi mutaña Bayibolu nikusandujola ha www.pr418.com/lun.