സത്യം തേടി. . .
സത്യം അറിയുന്നതു നമ്മുടെ ജീവൻ രക്ഷിച്ചേക്കും. ഉദാഹരണത്തിന്, സാംക്രമികരോഗങ്ങൾ എങ്ങനെയാണു പകരുന്നതെന്നു മനസ്സിലാക്കിയത് ആളുകളുടെ ജീവൻ രക്ഷിക്കുന്നത് എങ്ങനെയെന്നു ചിന്തിച്ചുനോക്കൂ!
ആയിരക്കണക്കിനു വർഷങ്ങളായിട്ട് ആർക്കും ഈ ചോദ്യത്തിന് ഉത്തരം അറിയില്ലായിരുന്നു. പകർച്ചവ്യാധികളും സാംക്രമികരോഗങ്ങളും ലക്ഷക്കണക്കിന് ആളുകളുടെ ജീവൻ കവർന്നെടുത്തു. ഒടുവിൽ ശാസ്ത്രജ്ഞർ സത്യം മനസ്സിലാക്കി. രോഗങ്ങൾക്കു കാരണം കീടാണുക്കൾ—സൂക്ഷ്മാണുക്കളായ ബാക്ടീരിയയും വൈറസും—ആണെന്ന് അവർ കണ്ടെത്തി. ആ സത്യം മനസ്സിലാക്കിയതു പല രോഗങ്ങൾ തടയുന്നതിനും ചികിത്സിക്കുന്നതിനും ഉപകാരപ്പെട്ടു. അങ്ങനെ കോടിക്കണക്കിന് ആളുകൾക്ക് ആരോഗ്യത്തോടെ കൂടുതൽ കാലം ജീവിച്ചിരിക്കാനും അതിലൂടെ കഴിഞ്ഞു.
അങ്ങനെയെങ്കിൽ മറ്റു പ്രധാനപ്പെട്ട ചോദ്യങ്ങളെക്കുറിച്ചുള്ള സത്യമോ? താഴെ കൊടുത്തിരിക്കുന്ന ചോദ്യങ്ങളെക്കുറിച്ചുള്ള സത്യം അന്വേഷിക്കുന്നതു നിങ്ങൾക്ക് എങ്ങനെ ഗുണം ചെയ്യും?
-
ദൈവം ആരാണ്?
-
യേശുക്രിസ്തു ആരാണ്?
-
ദൈവത്തിന്റെ രാജ്യം എന്താണ്?
-
ഭാവിയിൽ എന്തു സംഭവിക്കും?
ലക്ഷക്കണക്കിന് ആളുകൾ ഈ ചോദ്യങ്ങൾക്കുള്ള ഉത്തരം കണ്ടെത്തി അവരുടെ ജീവിതം മെച്ചപ്പെടുത്തിയിരിക്കുന്നു. നിങ്ങളുടെ ജീവിതവും മെച്ചപ്പെടുത്താം.
സത്യം കണ്ടെത്താനാകുമോ?
‘ഒരു കാര്യത്തെക്കുറിച്ചുള്ള സത്യം, അതായത് അതെക്കുറിച്ചുള്ള കൃത്യമായ വസ്തുതകൾ, കണ്ടെത്തുക അത്ര എളുപ്പമാണോ’ എന്നു നിങ്ങൾ ചിന്തിക്കുന്നുണ്ടാകും. കാരണം മിക്ക കാര്യങ്ങളെക്കുറിച്ചും കൃത്യമായ വസ്തുതകൾ കണ്ടെത്തുന്നത് ഇന്ന് കൂടുതൽക്കൂടുതൽ ബുദ്ധിമുട്ടായി വരികയാണ്.
പലയാളുകൾക്കും ഗവൺമെന്റിലും ബിസിനെസ്സുകാരിലും മാധ്യമപ്രവർത്തകരിലും ഒന്നും വിശ്വാസമില്ല. അവർ പറയുന്നതു സത്യമായ കാര്യങ്ങളാണോ? ചില വിവരങ്ങൾ അവർ മറച്ചുപിടിക്കുന്നുണ്ടോ? നുണ പറയുകയാണോ? ഇതൊന്നും മനസ്സിലാക്കാൻ ആളുകൾക്കു കഴിയുന്നില്ല. പരസ്പരം വിശ്വാസമില്ലാത്തതുകൊണ്ടും ലഭിക്കുന്ന വിവരങ്ങളിൽ മിക്കതും വിശ്വസിക്കാൻ പറ്റാത്തതുകൊണ്ടും ആളുകൾ ആകെ ആശയക്കുഴപ്പത്തിലാണ്. കൃത്യമായ വസ്തുതകൾ എന്നു പറഞ്ഞാൽ എന്താണ് എന്നതിനെക്കുറിച്ചും അതിന്റെ വ്യാഖ്യാനങ്ങളെക്കുറിച്ചും ആളുകൾക്ക് പല അഭിപ്രായങ്ങളുണ്ട്.
ഇത്തരം ബുദ്ധിമുട്ടുകളുണ്ടെങ്കിലും ജീവിതത്തിലെ പ്രധാനപ്പെട്ട ചോദ്യങ്ങൾക്ക് വസ്തുനിഷ്ഠമായ ഉത്തരം കണ്ടെത്താൻ നമുക്കു കഴിയും. എങ്ങനെ? നമ്മുടെ സാധാരണ ജീവിതത്തിൽ നമ്മൾ ചെയ്യുന്ന ചില കാര്യങ്ങൾ ഇക്കാര്യത്തിലും ചെയ്താൽ മതി.
സത്യത്തിനുവേണ്ടിയുള്ള നിങ്ങളുടെ അന്വേഷണം
ചുരുക്കിപ്പറഞ്ഞാൽ, നമ്മൾ എല്ലാ ദിവസവും സത്യത്തിനുവേണ്ടി, അതായത് വസ്തുനിഷ്ഠമായ വിവരങ്ങൾക്കുവേണ്ടി, അന്വേഷിക്കാറുണ്ട്. ഉദാഹരണമായി, ജസിക്കയുടെ കാര്യം നോക്കാം. “എന്റെ മകൾക്കു നിലക്കടല അലർജിയുണ്ട്. ചെറിയ ഒരളവിൽപോലും നിലക്കടലയുടെ പ്രോട്ടീൻ ചെന്നാൽ മതി കാര്യം ഗുരുതരമാകാൻ” എന്ന് ജസിക്ക പറയുന്നു. താൻ വാങ്ങിക്കുന്ന ഭക്ഷണം മകൾക്കു പറ്റുന്നതാണോ എന്ന് ജസിക്കയ്ക്കു പരിശോധിക്കേണ്ടിവരും. “ഭക്ഷണത്തിൽ എന്തൊക്കെ ചേർന്നിട്ടുണ്ടെന്നു സൂക്ഷ്മതയോടെ വായിച്ചുനോക്കുന്നതാണു ഞാൻ ചെയ്യുന്ന ആദ്യത്തെ കാര്യം. പിന്നെയും ഞാൻ ചില അന്വേഷണങ്ങൾ നടത്തും. ഉൽപാദകരുമായി ബന്ധപ്പെട്ട്, നിലക്കടലയിലെ പ്രോട്ടീൻ ഏതെങ്കിലും വിധത്തിൽ ചേർന്നിട്ടുണ്ടോ എന്ന കാര്യം ചോദിച്ച് മനസ്സിലാക്കും. ഇനി ആ കമ്പനി തയ്യാറാക്കുന്ന ഭക്ഷണം നല്ലതാണോ എന്ന കാര്യം ഉറപ്പിക്കാൻ, വിശ്വസിക്കാൻ കൊള്ളാവുന്ന മറ്റ് ഉറവിടങ്ങളിലും അന്വേഷിക്കും.”
നിത്യജീവിതത്തിലെ നിങ്ങളുടെ പല ചോദ്യങ്ങളും ജസിക്കയുടെ അത്രയും വരില്ലായിരിക്കും. എങ്കിലും ചില ചോദ്യങ്ങൾക്കുള്ള ഉത്തരം കണ്ടെത്താൻ ജസിക്ക ചെയ്ത ചില കാര്യങ്ങൾ നിങ്ങളും ചെയ്തിട്ടുണ്ടാകും:
-
വസ്തുതകൾ ശേഖരിച്ചു.
-
കൂടുതലായ ഗവേഷണം നടത്തി.
-
വിശ്വാസയോഗ്യമായ ഇടങ്ങളിൽ അന്വേഷിച്ചു.
ഇതേ വിധത്തിൽ ജീവിതത്തിലെ പ്രധാനപ്പെട്ട ചോദ്യങ്ങൾക്കുള്ള ഉത്തരവും നിങ്ങൾക്കു കണ്ടെത്താൻ കഴിയും. പക്ഷേ എങ്ങനെ?
സത്യം വെളിപ്പെടുത്തുന്ന അതുല്യഗ്രന്ഥം
ഭക്ഷണത്തിലെ അലർജിയെക്കുറിച്ച് അന്വേഷിക്കാൻ ഉപയോഗിച്ച അതേ സമീപനരീതിയാണു ജീവിതത്തിലെ പ്രധാനപ്പെട്ട ചോദ്യങ്ങളെക്കുറിച്ചുള്ള സത്യം അന്വേഷിക്കാനും ജസിക്ക ഉപയോഗിക്കുന്നത്. ജസിക്ക പറയുന്നു: “ശ്രദ്ധാപൂർവമുള്ള വായനയും നല്ല ഗവേഷണവും ബൈബിളിലെ സത്യം മനസ്സിലാക്കാൻ എന്നെ സഹായിച്ചു.” ജസിക്കയെപ്പോലെ ലക്ഷക്കണക്കിന് ആളുകൾ, താഴെ കൊടുത്തിരിക്കുന്ന ചോദ്യങ്ങൾക്കു ബൈബിൾ നൽകുന്ന ഉത്തരം എന്താണെന്നു മനസ്സിലാക്കിയിരിക്കുന്നു.
-
നമ്മൾ ഇവിടെയായിരിക്കുന്നത് എന്തുകൊണ്ട്?
-
മരിക്കുമ്പോൾ എന്തു സംഭവിക്കുന്നു?
-
കഷ്ടപ്പാടുകൾ ഉള്ളത് എന്തുകൊണ്ട്?
-
കഷ്ടപ്പാടുകൾ അവസാനിപ്പിക്കാൻ ദൈവം എന്താണു ചെയ്യുന്നത്?
-
സന്തോഷകരമായ ഒരു കുടുംബജീവിതം നമുക്ക് എങ്ങനെ നയിക്കാൻ കഴിയും?
ഈ ചോദ്യങ്ങൾക്കും ഇതുപോലുള്ള മറ്റു ചോദ്യങ്ങൾക്കും ഉള്ള കൃത്യമായ ഉത്തരം ബൈബിളിലുണ്ട്. കൂടാതെ www.pr418.com-ൽ നിന്ന് ഓൺലൈനായി കൂടുതൽ വിവരങ്ങൾ ഗവേഷണം ചെയ്യാനാകും.