D bao n bãng sẽn yaa sɩdã
Bãngr n são zɩɩlem. Bũmb kẽer pʋgẽ, f sã n mi sɩdã, tõe n fãaga f yõore. Wala makre, bãngdbã sẽn wa n bãng bãasã sẽn maand to-to n longd nebã, fãaga neb wʋsg yõyã.
Maana yʋʋm tusa tɩ ned baa a ye pa mi bãasã sẽn maand to-to n longdẽ wã ye. Sasa kãnga, bãasã buud toor-toorã kʋʋ neb milyõ-rãmba. Tarẽ-n-tarẽ, siãnsã rãmb wa n bãnga bãasã sẽn longdã võore. B bãngame tɩ bãasã tara biisi, b sẽn boond tɩ mikroob-rãmb la viriis-rãmba, la tɩ tũuda ne rẽ tɩ bãasã longd nebã. B sẽn bãng sɩdã rẽ zugã kɩtame tɩ nebã tõe n kogl b mens ne bãasã, la b bãng n tɩp bãas wʋsgo. Woto sõngame tɩ neb milyaar-dãmb tõe n paam yõ-woko, la b tar keelem.
La bũmb a taab me sẽn tar yõod wʋsg la d segd n bao n bãnge. Y sã n bãng sɩdã bõn-kãens zugu, na n naf-y-la wʋsgo. Wala makre:
-
Bõe la Biiblã yet Wẽnnaam zugu?
-
A Zeezi Kirist yaa ãnda?
-
Wẽnnaam Rĩungã yaa bõe?
-
Vɩɩmã na n yɩɩ wãn beoog-daare?
Neb wʋsg bãnga sogs-kãensã leoore, tɩ sõng-b tɩ b vɩɩmã tar bark masã. Yãmb me sã n bãng sogs-kãensã leoore, na n naf-y-la wʋsgo.
YÃMB ME TÕE N BÃNGA SƖDÃ
Tõe tɩ y sokda y meng yaa: ‘Rẽ yĩnga, m tõe n bãnga sɩdã bũmb fãa zug sɩda?’ Sɩd me, yɩl n bãng sɩdã bũmb wʋsg zug lebgda toog n paasdẽ. Bõe yĩnga?
Nebã pa le tẽed goosneema-rãmbã ne kiba-kɩtbã la patrõonbã sẽn yet-b bũmb ninsã ye. Yaa toog ne nebã tɩ b bãng b sẽn yet-b bũmb ninsã sã n yaa sɩd bɩ yaa b mens tagsgo, pa rẽ bɩ b sã n togs n kellame, wall sã n pʋd n yaa ziri ye. Sẽn mik tɩ nebã pa le kɩs taab sɩdã, tɩ kibay wʋsg nebã sẽn yelgdã me yaa ziri wã, nebã pa le sakd n deeg gomde, baa sã n yaa sɩda, la baa sã n wõnd yaa b neer yĩng ye.
La ne rẽ fãa, y tõe n paama sogsg wʋsg leoore, sogsg neb ka tɛk sẽn sokd b mense. Bõe n na n sõng-yã? Y tog n maana bũmb nebã wʋsg sẽn maand daar fãa.
YÃMB ME BAO N BÃNG SƖDÃ
D tõe n yeelame tɩ daar fãa, d maanda vaeesg n na n bãng bũmb kẽer sã n yaa sɩda. Yaa woto la pag a ye b sẽn boond t’a Zesika maanda. A yeelame: “M biigã sã n dɩ bũmb sẽn ning nanguri, baa yaa bilfu, yaa yelle.” Woto wã, a Zesika sã n na n da bũmb sẽn dɩte, a rengd n gũus n gesa b sã n pa ning nanguri. A paasame: “Nand tɩ m da bũmb butikẽ, m rengd n maaga m yĩng n karem n ges b sẽn tall bũmb nins n maan-a wã. Rẽ poore, m maanda vaeesgo, la m pʋd n bool sẽn maan-b bũmb ning m sẽn dat n da wã, n bãng b sã n pa ning nangur la b pa togse. Sẽn paase, m leb n baooda kibay zĩis a taaba, n bãng sẽn maan-b bũmb ning m sẽn dat n da wã sã n yaa sɩd dãmba.”
Tõe tɩ bũmb nins yãmb sẽn baood n na n bãngã pa yembr ne a Zesika ye. La y tõe n maana wa a sẽn maandã, n tõog n paam y sogsg wʋsg leoore. Ad y sẽn tõe n maane:
-
Rɩ-y kibay.
-
Maan-y vaeesg n paase.
-
Bao-y n bãng-y sẽn kõ-b kibayã sã n yaa sɩd-dãmba.
Y tõe n maana woto me n paam sogsg wʋsg leoore, sogsg neb wʋsg sẽn sokd b mense.
BIIBLÃ N TÕE N SÕNG-D TƖ D BÃNG SƖDÃ
A Zesika tõog n paama a sogsg wʋsg leoore, sogsg neb ka tɛk sẽn sokd b mense, tɩ leoorã be Biiblã pʋgẽ. A maana wãna? A tũu a sẽn maand to-to n paamd n daad rɩɩb sẽn pa ning nangur n kõt a biigã. A yeelame: “Yaa m sẽn maag m yĩng n karem Biiblã, la m maan vaeesg sõma wã n sõng maam tɩ m bãng sẽn yaa sɩdã.” Wa a Zesika, neb milyõ-rãmb tõog n bãnga Biiblã sẽn leokd sogsg kẽer to-to. Wala makre:
-
Bõe yĩng la d sẽn be dũni zugã?
-
Ned kũum poore bõe n maand-a?
-
Bõe yĩng tɩ ninsaalbã namsdẽ?
-
Bõe la Wẽnnaam maanda, sẽn na yɩl tɩ ninsaalbã wa paam b mens ne namsg buud fãa?
-
D maanda wãn tɩ d zakã pʋgẽ vɩɩm yɩ noogo?
Y sã n karemd Biiblã, la y mi n kẽ tõnd sɩtã sẽn yaa www.pr418.com pʋgẽ wã n maan vaeesg n paase, y na n paama sogs-kãensã la a taab leoore.