အဲဒီမေးခွန်းရဲ့အဖြေကို မသိခဲ့ချိန်တုန်းက ကူးစက်မြန် ကပ်ရောဂါတွေကြောင့် သန်းနဲ့ချီတဲ့လူတွေ သေဆုံးခဲ့ကြရတယ်။ နောက်ဆုံးတော့ သိပ္ပံပညာရှင်တွေ အဖြေ ရှာတွေ့သွားတယ်။ မျက်စိနဲ့ မမြင်နိုင်တဲ့ ဘက်တီးရီးယား၊ ဗိုင်းရတ် စတဲ့ ရောဂါပိုးတွေကြောင့် ဆိုတာ သူတို့ တွေ့ရှိခဲ့တယ်။ အဲဒီအမှန်တရားတစ်ခုကို ရှာတွေ့ခဲ့လို့ ရောဂါအမြောက်အမြားကို ကြိုတင်ကာကွယ်ဖို့၊ ကုသဖို့ အကူအညီ ဖြစ်စေခဲ့တယ်။ သန်းနဲ့ချီတဲ့လူတွေကို အသက်ပိုရှည်စေ၊ ပိုကျန်းမာစေတယ်။

အရေးကြီးတဲ့ တခြား မေးခွန်းတွေကော။ အောက်ပါမေးခွန်းတွေနဲ့ ပတ်သက်တဲ့ အမှန်တရားကို ရှာတွေ့တာက သင့်အပေါ် ဘယ်လို အကျိုးသက်ရောက်နိုင်မယ်လို့ ထင်သလဲ။

• ဘုရားက ဘယ်သူလဲ။

• ယေရှုခရစ်က ဘယ်သူလဲ။

• ဘုရားသခင့်နိုင်ငံတော်ဆိုတာ ဘာလဲ။

• အနာဂတ်မှာ ဘာတွေ ဖြစ်လာမလဲ။

သန်းနဲ့ချီတဲ့လူတွေဟာ အဲဒီမေးခွန်းတွေရဲ့ အဖြေကို ရှာတွေ့ခဲ့လို့ သူတို့ရဲ့ဘဝတွေ တိုးတက်ပြောင်းလဲလာတယ်။ သင်လည်း အဲဒီအဖြေတွေကနေ အကျိုးရနိုင်ပါတယ်။

‘အကြောင်းအရာတိုင်းရဲ့ အမှန်တရားကို ရှာတွေ့ဖို့ ဖြစ်နိုင်ပါ့မလား’ လို့ သင် တွေးမိပါလိမ့်မယ်။ အကြောင်းအရာများစွာနဲ့ ပတ်သက်တဲ့ အမှန်တရားကို ရှာတွေ့ဖို့ ပိုခက်ခဲလာပုံ ပေါက်နေတယ်။ ဘာကြောင့်လဲ။

လူများစွာဟာ အစိုးရတွေ၊ စီးပွားရေးလုပ်ငန်းတွေ၊ မီဒီယာတွေ ပြောတာကို အယုံအကြည် မရှိကြတော့ဘူး။ ထင်မြင်ယူဆချက်လား၊ မှန်တစ်ဝက် မမှန်တစ်ဝက်လား၊ အလိမ်အညာတွေလားဆိုတာကို ခွဲခြားဖို့ ပိုခက်လာတယ်။ လူတွေဟာ တစ်ယောက်ကိုတစ်ယောက် အယုံအကြည် မရှိကြတော့လို့၊ သတင်းအချက်အလက် အများစုကလည်း မမှန်တော့လို့ တကယ့်အမှန်တရားနဲ့ ပတ်သက်လို့လည်း သဘောထား ကွဲလွဲနေကြတယ်။

အဲဒီလို အခြေအနေတွေ ရှိပေမဲ့ ဘဝနဲ့ပတ်သက်တဲ့ အရေးကြီးဆုံး မေးခွန်းတွေရဲ့ အဖြေမှန်ကို ရှာတွေ့နိုင်ပါတယ်။ ဘယ်လို နည်းနဲ့လဲ။ နေ့စဉ်လုပ်နေတဲ့အတိုင်း လုပ်ခြင်းအားဖြင့်ပါပဲ။

ကျွန်တော်တို့ဟာ နေ့တိုင်း တစ်နည်းနည်းနဲ့ အမှန်တရားကို ရှာဖွေကြတယ်။ ဂျက်စီကာရဲ့ အခြေအနေကို သုံးသပ်ကြည့်ပါ။ “ကျွန်မသမီး မြေပဲနဲ့ ဓာတ်မတည့်ဘူး။ မြေပဲမှာပါတဲ့ဓာတ် နည်းနည်းလေးကတောင် သူ့အတွက် အသက်အန္တရာယ်ရှိတယ်” လို့ သူပြောပြတယ်။ ဂျက်စီကာဟာ သူ ဝယ်မယ့်အစားအစာက သမီးနဲ့ တည့်သလားဆိုတာ အရင်ကြည့်ရတယ်။ “ပထမအဆင့်က အစားအစာမှာ ပါဝင်တဲ့ပစ္စည်းတွေကို သေချာဖတ်တယ်။ ပြီးရင် ထပ်ဆင့် ရှာဖွေလေ့လာတယ်၊ မြေပဲဓာတ် မပါဘူးဆိုတာ သေချာအောင် စက်ရုံကို ဆက်သွယ်မေးမြန်းတယ်။ အဲဒီ အစားအသောက် ထုတ်လုပ်တဲ့ကုမ္ပဏီက စိတ်ချလို့ ရမရဆိုတာကိုလည်း လေ့လာတယ်။”

နေ့စဉ် သင် ရှာဖွေနေတဲ့ မေးခွန်းတွေရဲ့ အဖြေဟာ ဂျက်စီကာရဲ့ အခြေအနေလောက် အရေးကြီးချင်မှ အရေးကြီးမယ်။ ဒါပေမဲ့ ဂျက်စီကာလိုပဲ သင်လည်း မေးခွန်းတွေရဲ့ အဖြေတွေကို ရှာတဲ့အခါ အောက်ပါနည်းတွေကို သုံးနိုင်ပါတယ်–

• အချက်အလက်တွေ ရယူပါ။

• ထပ်ဆင့် ရှာဖွေလေ့လာပါ။

• ယုံကြည်စိတ်ချရတဲ့ ရင်းမြစ်ကနေ ရှာဖွေပါ။

ဒီနည်းတွေက ဘဝအတွက် အရေးကြီးတဲ့ မေးခွန်းတွေရဲ့ အဖြေမှန် ရှာတွေ့ဖို့ ကူညီပေးနိုင်ပါတယ်။ ဘယ်လိုနည်းနဲ့လဲ။

ဂျက်စီကာဟာ ကျမ်းစာအမှန်တရားကို ရှာတဲ့အခါမှာလည်း မြေပဲနဲ့ ဓာတ်မတည့်တဲ့ သမီးအတွက် ရှာဖွေလေ့လာတဲ့ နည်းကိုပဲ သုံးတယ်။ “ကျမ်းစာမှာပါတဲ့ အမှန်တရားကို ရှာတွေ့ဖို့ သေချာဖတ်ရှု၊ ဝီရိယရှိရှိ လေ့လာတာက အကူအညီဖြစ်ခဲ့တယ်” လို့ သူပြောတယ်။ ဂျက်စီကာလိုပဲ သန်းနဲ့ချီတဲ့ သူတွေဟာ အောက်ပါမေးခွန်းတွေနဲ့ ပတ်သက်ပြီး ကျမ်းစာမှာ ဘာပြောထားသလဲဆိုတာ သိရှိခဲ့ကြတယ်–

• ကျွန်တော်တို့ ဘာကြောင့် ဒီကမ္ဘာပေါ်မှာ အသက်ရှင်နေကြသလဲ။

• လူသေရင် ဘာဖြစ်သွားသလဲ။

• ဘာကြောင့် ဆင်းရဲဒုက္ခတွေ ခံစားကြရသလဲ။

• ဆင်းရဲဒုက္ခအားလုံး အဆုံးတိုင်ဖို့ ဘုရား ဘာလုပ်ပေးမလဲ။

• ပျော်ရွှင်တဲ့မိသားစုဘဝ ဘယ်လို ရရှိနိုင်သလဲ။

ကျမ်းစာဖတ်ရှုခြင်း၊ အွန်လိုင်းက www.pr418.com မှာ ထပ်ဆင့်ရှာဖွေခြင်းအားဖြင့် အထက်ပါမေးခွန်းတွေနဲ့ တခြားမေးခွန်းတွေရဲ့ အဖြေမှန်ကို ရှာတွေ့နိုင်ပါတယ်။