Ipan miak xiuitl amo aka kimatiyaya, yeka kokolistli kinmiktik miakej maseualmej. Teipa, ixtlamatinij kimatkej kenke mokokolismakayayaj. Kiitakej nopa tlamantsitsij tlen kichiua ma timokokokaj eli nopa bacterias uan sekinok tlamantli tlen temaua. Pampa kimatkej nopa, techpaleuijtok amo nima ma timokokokaj uan ma tijmatikaj kenijkatsa uelis timochikauasej. Uan nojkia kinpaleuijtok tlauel miakej maseualmej amo tlauel ma mokokokaj uan amo nima ma mikikaj.

¿Tlake sekinok tlajtlanili tlen tlauel ipati uelis tijnankilisej? ¿Timoiljuia mitspaleuis ipan monemilis tlaj tijmatis kenijkatsa monankilia ni tlajtlanili?

• ¿Ajkia toTeotsij?

• ¿Ajkia Jesucristo?

• ¿Tlake nopa toTeotsij iTlanauatijkayo?

• ¿Kenijkatsa tiitstosej teipa?

Miakej kimatkej kenijkatsa monankilia ni tlajtlanili uan yeka kuali itstokej. Ta nojkia uelis mitspaleuis tlaj tijmatis kenijkatsa monankilia.

Ipan ni tonali tlauel ouij tijmatisej tlaj se tlamantli eli melauak, pampa miakej tlauel istlakatij. ¿Kenke kiampa pano?

Miakej maseualmej amo motemachiaj ipan tlen kiijtouaj tlanauatianij, katli kiyakanaj se ueyi tekitl o katli tematiltia se tlamantli tlen panok. Amo kimatij tlaj kiijtouaj tlen melauak o san tlen inijuantij moiljuiaj, tlaj kiijtouaj nochi tlen panotok o san istlakatij. Ipan ni tonali ayokmo tleno eli temachtli uan amo aka kiijtoua tlen melauak, yeka maseualmej ayokmo ma motemachikaj ipan sekinok uan amo kimatij ipan tlake kineltokasej.

Maske kiampa pano, ta uelis tijmatis kenijkatsa monankilia se keski tlajtlanili tlen tlauel ipati. ¿Kenijkatsa uelis tijchiuas? Xijchiua kej kema tijneki tijmatis sekinok tlamantli.

Nochi tijneki tijmatisej tlen melauak. Ma tikitakaj tlake kichiua Jessica, ya moneki kuali kiitas tlen kikoua amo ma kipia kakauatl. Jessica kiijtoua: “Nosiuapil amo ueli kikua yon se tlamantli tlen kipia kakauatl maske san se kentsi, pampa nopa uelis kichiuas ma miki. Yeka, kema nijneki nijkouas se tlenijki, achtoui kuali nijpoua ipan iamayo tlake kitlalilijtokej. Nojkia nitlanojnotsa kampa kichijchijkej uan nikintlajtlania tlaj nelia yon se kentsi kitlalilijkej kakauatl. Nojkia nijtemoua sekinok tlamantli tlen nechpaleuia ma nimotemachi tlaj kampa kichijchiuaj nopa tlakualistli nelia eli temachtli”.

Maske ta amo moneki mojmostla tijmatis tlake tlamantli eli melauak, kena uelis tijchiuas kej Jessica uan kiampa tijmatis sekinok tlamantli.

• Tijtemos tlen tijneki tijmatis.

• Nojua xijtemo sekinok tlamantli.

• Tikitas tlaj kampa tijkixtik tlen tijtemok eli temachtli.

Tlaj kiampa tijchiuas mitspaleuis tijmatis kenijkatsa tijnankilis tlajtlanili tlen tlauel ipati. Xikita kenijkatsa uelis tijchiuas.

Kema Jessica kinejki kimatis sekinok tlamantli tlen nelia tlauel ipati, kichijki sanse kej kema kineki kimatis tlaj se tlakualistli kipia se kentsi kakauatl. Ya kiijtoua: “Pampa kuali nimomachtia uan nojua nijtemoua sekinok tlamachtili, nechpaleuijtok ma nijmati tlen melauak tlamachtia Biblia”. Miakej maseualmej kichijtokej kej Jessica uan nama kimatij kenijkatsa Biblia kinankilia ni tlajtlanili:

• ¿Kenke tiitstokej?

• ¿Tlake techpano kema timikij?

• ¿Kenke onka miak tlaijiyouilistli?

• ¿Kenijkatsa toTeotsij kitlamiltis tlaijiyouilistli?

• ¿Kenijkatsa uelis tiyolpakis ininuaya mochampoyouaj?

Ta nojkia uelis tijmatis kenijkatsa monankilia ni uan sekinok tlajtlanili, tlaj tijpouas Biblia uan tijtemos sekinok tlamachtili ipan www.pr418.com/nch.