Yikipia miak xiuitl miakej oixpolikej porque amo okimatiayaj tlen kichiuaskej ijkuak okinmajsiaya se kokolistli. Satepan ixtlamatkej okimatkej tlen uelis tikchiuaskej. Okitakej miak kokolistli otechajsiaya porque katej sapanoua miakej okuilintsitsintin tlen techpanoltiliaj kokolistli. Tlen okitakej ixtlamatkej sapanoua tlapaleuia porque axkan kimatij ken tlapajtiskej uan techiluiaj tlen moneki tikchiuaskej uan ijkon ayakmo okachi timokokoskej.

Pero onka okseki tlamantli tlen okachi tiknekij tikmatiskej. ¿Mitspaleuis tla tikmatis intlanankilis ninmej tlajtlanilmej?

• ¿Akin toTajtsin Dios?

• ¿Akin Jesucristo?

• ¿Tlen kijtosneki iTekiuajkayo toTajtsin Dios?

• ¿Tlen panos satepan?

Sapanoua miakej yikimatij intlanankilis ninmej tlajtlanilmej uan axkan okachi yolpakij. Tejuatsin noijki tiyolpakis tla ijkon tikchiuas.

Xamo timotlajtlania kox uelis tikajsis tlen tikneki tikmatis. Porque axkan okachi tlakajkayauaj uan ayakmo ikaj kijtoua tlen melauak. ¿Tleka ijkon panoua?

Miakej ayakmo kineltokaj tlen kijtouaj tekiuajkej, ayakmo kinneltokiliaj akinmej tekipanouaj itech empresas nion akinmej kitematiltiaj nochi tlen panoua. Miakej ayakmo kimatij kox melauak tlen kinmiluiaj noso san kinmiluiaj tlen mokuayejyekouaj. Noijki xamo amo nochi kinmiluiaj tlen opanok uan san tlakajkayauaj. Miakej ayakmo kineltokaj kox melauak tlen opanok.

Maski axkan san tlakajkayauaj, uelis tikmatiskej tlen okachi ipati timotlajtlaniaj. ¿Ken moneki tikchiuaskej? Ijkon ken ijkuak tiknekij itlaj tikmatiskej.

Tinochtin nochipa tiknekij itlaj tikmatiskej. Se siuatl itoka Jessica ijkuak kikoua tlen ika motlakualchiuis achto kita amo ma kipia kakauatl. Ye okijto: “Nokone amo kikua tlen kipia kakauatl porque uelis mikis. Ik non, ijkuak nimotlakouia nikita amo ma kipia kakauatl tlen ika nimotlakualchiuis. Satepan nimotlapouia iuan akinmej kiyektlaliaj tlen nikkoua kox melauak tlen ompa kijtoua. Noijki nikintlajtlania oksekimej kox melauak kuali kiyektlaliaj tlen kinemaka non empresa”.

Xamo amo moneki nochipa titlajtlantinemis ken Jessica ijkuak tikneki tikmatis tlen okachi ipati pero uelis tikchiuas nin tlamantli:

• Xikita kox melauak tlen moijtoua.

• Okachi xitlatemo.

• Xikintlajtlani oksekimej kox uelis tikneltokas tlen moijtoua.

Nin tlamantli mitspaleuis xikajsi intlanankilis tlajtlanilmej tlen okachi inpati. Ma tikitakan ken uelis tikchiuas.

Jessica ijkuak opejki momachtia Biblia, okichi ijkon ken ijkuak kimokouia tlen ika tlakualchiuas tlen amo kipia kakauatl. Ye okijto: “Kuali niktlajtoltia Biblia uan kuali nimomachtia. Non onechpaleui ma nikneltoka melauak tlen tlamachtia Biblia”. Miakej yokichijkej ken Jessica uan yokitakej Biblia kinnankilia ninmej tlajtlanilmej:

• ¿Tleka tiyoltokej?

• ¿Tlen techpanoua ijkuak tiixpoliuij?

• ¿Tleka titlajyouiaj?

• ¿Ken kipojpolos toTajtsin Dios nochi tlen techtlajyouiltia?

• ¿Ken uelis yolpakiskej akinmej inmiuan tichantij?

Tikajsis intlanankilis ninmej tlajtlanilmej tla tiktlajtoltis Biblia uan tla okachi titlatemos itech www.pr418.com.