Ba zi ngahönö fakhe, lö aboto ba dödö niha hewisa wa tola fatöfa ba niha wökhö niha böʼö. Lua-luania, zuta niha si mate. Ba gafuriata, mofozu ira ilmuwan ba wanöndra hadia mbörönia. No lasöndra wa sasesenia börö dungö simane bakteri mazui virus wa tola so wökhö. Daʼa zanolo niha sato ba wotimbagö hegöi ba wodalu-daluni ngawalö wökhö. Buania, miliaran niha lö alio göna wökhö ba tola anau nosora.

Hewisa göi sanandrösa ba wanofu-nofu sabölö moguna, simane . . .

• Haniha Lowalangi?

• Haniha Yesu Keriso?

• Hadia Wamatörö Lowalangi andrö?

• Hewisa waʼaurida ba zi so miföna?

Zuta niha no lasöndra wanema li sanandrösa ba wanofu-nofu daʼö. Buania, itugu ohahau dödöra ba waʼauri. Tola göi ötema mbuania na ösöndra wanema linia.

Tola manö ömane tödöu, ’Hadia tola usöndra fefu informasi zatulö sanandrösa ba ngawalö hadia ia?’ Na tafaigi iadaʼa, itugu ara itugu abua ba niha ba wanöndra informasi satulö. Hadia mbörö?

Ato niha lö saʼae faduhu dödöra khö zamatörö, sokhö bisnis, mazui ba berita ba ginötö laʼalui informasi satulö. Lö aboto ba dödöra hadia sindruhu-ndruhu atulö duria nifaʼema andrö, mazui ha mbua wangera-ngera si samösa niha, matonga atulö mazui ha walimosa. Ato niha lö hadöi fahasara dödö sanandrösa hezo zatulö hegöi si lö atulö, börö me faoma manahö-nahö dödöra khö nawöra, ba gofu hezoso so informasi si lö atulö.

Hewaʼae simanö, tola ösöndra informasi satulö sanandrösa ba ngawalö sabölö moguna ba waʼauri. Hewisa wanöndra yaʼia? Tola öʼogunaʼö lala si toʼölö niʼogunaʼömö ba wangalui sindruhu.

Sindruhunia, ero maʼökhö öʼalui informasi satulö. Nehegö duma-duma Jessica. Imane, ”Alergi ba kacang nonogu alawe. Na iʼa gö si no labeʼe kacang hewaʼae na ha maʼifu, tola mate ia börö me abölö-bölö alerginia ba kacang.” Andrö moguna itatugöi Jessica hadia gö niʼölinia tola iʼa nononia mazui löʼö. ”Si oföna ubaso sakali hadia zi no tesura ba guli gö daʼö, hadia manö wamaruka ba gö daʼö. Aefa daʼö, uʼalui nasa informasinia. Itaria uhubungi perusahaan samazökhi gö daʼö, enaʼö uʼila hadia lö nifarukara kacang ba gö daʼö hewaʼae na tenga niʼodödögöra ba wameʼe. Uʼalui nasa informasi tanö böʼö si tola mameʼe faduhu dödögu wa baga perusahaan daʼö.”

Tola manö informasi niʼaluimö lö moguna sibai ia simane niʼalui Jessica. Hizaʼi, tola öʼoʼö duma-duma Jessica ba wangalui informasi satulö, yaʼia daʼö:

• Owuloi zindruhunia.

• Oyaʼö ba wangalui informasi.

• Tatugöi wa tola öfaduhusi tödö informasi nisöndramö.

Na öfalua daʼa, tola ösöndra informasi satulö sanandrösa ba ngawalö sabölö moguna ba waʼauri. Hewisa lalania?

Me iʼalui Jessica sindruhu moroi ba Zura Niʼamoniʼö, iʼogunaʼö lala si fagölö me iʼalui sanandrösa ba alergi nononia. Imane, ”Börö me uhaogö ba wombaso ba owölö-ölö ndraʼo ba wangalui informasi tanö böʼönia, daʼa sanolo yaʼo ba wanöndra sindruhu si so ba Zura Niʼamoniʼö.” Simane Jessica, zuta niha no lafahaʼö ira hadia niwaʼö Zura Niʼamoniʼö sanandrösa ba wanofu-nofu simane:

• Hana wa so ita ba gulidanö?

• Hadia zalua ba niha si no mate?

• Hana wa tefakao niha?

• Hadia nifalua Lowalangi dania enaʼö lö saʼae tefakao niha?

• Hewisa enaʼö so waʼohahau dödö yomo ba nomo?

Tola öʼila fefu wanema li moroi ba wanofu-nofu daʼö na öbaso Zura Niʼamoniʼö ba öʼalui informasinia nasa ba www.pr418.com.