Sekudlule iinkulungwana zeminyaka, kunganamuntu owaziko ipendulo yombuzo lo. Kodwana amalwelwe bekasolo abulala iingidigidi zabantu. Ngokukhamba kwesikhathi, abososayensi bafumana ukuthi abangelwa yini. Bafumana ukuthi amalwelwe amanengi abangelwa mulwana. Ukufumana iqiniswelo kusize abantu bona bazivikele begodu balaphe amalwelwe amanengi, okwenze amabhiliyoni wabantu ukuthi aphile isikhathi eside.

Kuthiwani ngeminye imibuzo eqakathekileko? Ukufuna ukwazi iqiniso ngemibuzo le kungakuthinta njani?

• Ngubani uZimu?

• Ngubani uJesu Krestu?

• Uyini umBuso kaZimu?

• Ingomuso lisiphatheleni?

Iingidigidi zabantu zifumene iimpendulo zemibuzo le begodu ziphila ukuphila okungcono. Nawe ungazuza eempendulwenezi.

Ungazibuza, ‘Kuyakghonakala na bona ufumane iqiniso ngananyana yini?’ Ngaphezu kwakho koke, kubudisi ukufumana iqiniso ngezinto ezinengi. Kubayini?

Abantu abanengi ababathembi aborhulumende, amabhizinisi, nofana iimbikiindaba bona zibatjele iqiniso. Bakufumana kubudisi ukwazi ukuthi abantu babatjela iqiniso, namkha batjho imibonwabo, bafihla eminye imininingwana, nofana bakhuluma amala. Esikhathini sanje kuzele ukungathembani nelwazi elimamala, abantu abaphikisani ngokuthi liyini iqiniso kodwana baphikisana nangokuthi kuhlekuhle litjho ukuthini kibo.

Naphezu kweentjhijilwezi, kuyakghonakala ukufumana iimpendulo zemibuzo eqakatheke khulu. Njani? Ngokwenza lokho ojayele ukukwenza nawufuna iimpendulo zezinto ezingakaqakatheki kangako.

Ngokwezinga elithileko, silifuna qobe lilanga iqiniso. Cabanga ngesibonelo sakaJessica. Uthi, “indodakazami ine-allergy embi khulu yamantongomani, kangangokuthi nanyana bangawafaka kancani ekudleni angambulala.” UJessica kufuze aqiniseke ukuthi ukudla akuthengako akunamantongomani. “Into yokuthoma engiyenzako nangiyokuthenga ukudla ngiqala ukuthi khuyini abayifake ekudleni. Angipheleli lapho ngifowunela ikhamphani eyenza ukudlokho ukuqinisekisa ukuthi abakafaki amantongomani bangakanqophi. Godu ngenza irhubhululo ngokuthi ngifowunele amakhamphani anokuthenjelwa bona aqinisekise ukuthi ukudla engikuthengako akwenze ngendlela efaneleko.”

Ukulinga kwakho ukufuna iimpendulo eziliqiniso qobe lilanga kungenzeka akukaqakatheki njengokwakaJessica kodwana njengoJessica, ungasebenzisa indlela le ukufumana iimpendulo zemibuzo onayo:

• Funa iqiniso.

• Yenza irhubhululo elingeziweko.

• Qiniseka bona imithombo oyisebenzisako inokuthenjelwa.

Iindlelezi zingakusiza ufumane iimpendulo zemibuzo eqakathekileko. Njani?

UJessica nakafuna iqiniso leBhayibheli usebenzise indlela efanako nakenza irhubhululo ngama-allergy wendodakazakhe. Uthi, “Ukufundisisa nokukhuthalela ukwenza irhubhululo kungisize bona ngifumane iqiniso leBhayibheli.” NjengoJessica, iingidigidi zabantu zifumane iqiniso leBhayibheli ngemibuzo le:

• Kubayini siphila?

• Kwenzekani nasihlongakalako?

• Kubayini sizwa ubuhlungu?

• Khuyini uZimu ozoyenza bona aqede ubuhlungu?

• Singalifumana njani ithabo emndenini?

Ungafumana iimpendulo zemibuzo eqakathekileko le ngokufunda iBhayibheli nangokwenza irhubhululo elingeziweko ku-www.pr418.com.