Go fetile mengwaga e diketekete go se na motho yo a tsebago karabo ya potšišo ye. Seo se dirile gore malwetši a mantši ao a fetelago a bolaye batho ba bantši. Mafelelong, borasaense ba ile ba hwetša nnete mabapi le potšišo yeo. Ba ile ba hwetša gore malwetši ao gantši a be a bakwa ke ditwatši, tše bjalo ka dipaketheria. Go tseba nnete yeo e tee feela go ile gwa phološa maphelo a batho, ka ge ba ile ba kgona go thibela malwetši a mantši le go a alafa. Se se ile sa dira gore batho ba phele nako e teletšana e bile ba phetše gabotse mmeleng.

Re ka re’ng ka dipotšišo tše dingwe tše bohlokwa? O nagana gore go hwetša dikarabo tša nnete tša dipotšišo tše di latelago go ka go thuša bjang?

• Modimo ke mang?

• Jesu Kriste ke mang?

• Mmušo wa Modimo ke eng?

• Go tlo direga’ng nakong e tlago?

Batho ba bantši ba ile ba hwetša dikarabo tša dipotšišo tšeo gomme seo se ba thušitše gore ba ipshine ka bophelo. Le wena dikarabo tša dipotšišo tšeo di ka go hola.

O ka ipotšiša gore: ‘Na go a kgonega go hwetša nnete ka selo le ge e le sefe?’ Sa go kweša  bohloko le go feta ke gore go bonala go hwetša nnete ka dilo tše dintši go thatafa le go feta. Ke ka baka la’ng go thatafa?

Batho ba bantši ga ba tshepe gore mebušo, borakgwebo goba boraditaba ba ka ba botša nnete. Ga go bonolo gore batho ba tsebe ge e ba ba bangwe ba ba botša nnete goba ge e ba ba no ba botša dikgopolo tša bona. E bile ga go bonolo gore ba tsebe gore ba ba fihlela ditaba tše itšego goba ba ba botša maaka. Ka ge batho ba sa tshepane e bile maaka a tletše gohle, ba feleletša ba sa tsebe gore ke mang a bolelago nnete e bile ga ba na taba le go tseba nnete.

Lega go le bjalo, go a kgonega go hwetša dikarabo tša nnete tša dipotšišo tše bohlokwa bophelong. O ka di hwetša bjang? Ka go dira nyakišišo.

Go ka direga gore letšatši le letšatši o dira nyakišišo gore o tsebe nnete ka dilo tše itšego. Ekwa ka mohlala o latelago wa Jessica. O re: “Morwedi wa ka o lwatšwa dimake, moo e lego gore le ge a ka ja protheine e nyenyane ya tšona a ka hlokofala.” Jessica o swanetše go kgonthišetša gore dijo tšeo a di rekago di ka se lwatše morwedi wa gagwe goba tša mmolaya. O re: “Selo sa mathomo seo ke se dirago pele ke reka dijo ke go lebelela gore di dirilwe ka eng. Ka morago ga moo, ke dira nyakišišo le go founela moo dijo tšeo di dirilwego gona go kgonthišetša gore ga gona le phrotheinenyana ya dimake yeo e ka bago e wetše ka dijong tšeo ka phošo. Le gona ke dira nyakišišo le go batho bao ba tsebago khamphani yeo gabotse go kgonthišetša gore khamphani yeo e dirilego dijo tšeo nka e tshepa.”

Go ka direga gore dipotšišo tšeo o nyakago dikarabo tša tšona ga di swane le tša Jessica. Eupša go swana le Jessica, le wena o ka dira dilo tše di latelago gore o hwetše dikarabo tša dipotšišo tšeo o nago le tšona:

• Thoma pele ka go tseba ditaba ka botlalo.

• Dira nyakišišo.

• Kgonthišetša gore dilo tšeo o dirago nyakišišo go tšona di a tshepagala.

Go dira dilo tše go tla go thuša gore o hwetše dikarabo tša nnete tša dipotšišo tše bohlokwa bophelong. Go ka go thuša bjang?

Ge Jessica a be a nyakišiša gore Beibele e bolela nnete, o ile a diriša mokgwa o swanago le wo a o dirišago ge a nyakišiša ka dijo tšeo di lwatšago morwedi wa gagwe. Jessica o re: “Go bala Beibele ka kelohloko le go dira nyakišišo e tseneletšego, go nthušitše go bona gore e bolela nnete.” Go swana le Jessica, batho ba bantši ba kgonne go hwetša dikarabo tša dipotšišo tše di latelago ka Beibeleng:

• Go tlile bjang gore re be gona?

• Go direga eng ge re ehwa?

• Ke ka baka la eng re tlaišega?

• Modimo o tlo fediša bjang mathata mo lefaseng?

• Re ka dira eng gore re phele re thabile ka gae?

O ka hwetša dikarabo tša nnete tša dipotšišo tše le tše dingwe ka go bala Beibele le go dira nyakišišo wepesaeteng ya www.pr418.com/nso.