Mokueenda kuomanima omanyingi, ekumbululo liepulo olio ankho kaliiwe. Iya mokonda yotyo, omauvela elitambuliswa aipaa ovanthu ovanyingi-nyingi. Mahi konyima, ovanongo avavasi otyili. Vaimbuka okuti omauvela aetwa nounyama oututu tuhamono komaiho utiwa ono bakitelia nono vilu. Okunoñgonoka otyili otyo, tyihole okukuatesako ovanthu okulityilika, nokuhakula omauvela omanyingi. Ouwa patyi otyo tyihole okueta? Ovanthu ovanyingi pahe vena ekongoko ewa iya vakalako ehimbwe.

Mahi konthele yomapulo akolela vali? Oñgeni omakumbululo omapulo aa apondola okukukuatesako?

• Huku olie?

• Sesusi Kilisitu olie?

• Ouhamba wa Huku oityi?

• Oityi matyikamoneka komutwe wandyila?

Ovanthu ovanyingi, vavasa omakumbululo omapulo oo iya pahe vena omuenyo ukahi nawa. No ove upondola okuevasa, nokupolako ouwa.

Ove hamwe ukahi nokulipula okuti: ‘Oñgeni ndyipondola okuvasa otyili?’ Hamwe ulipula ngotyo, mokonda pahe tyipuiya unene okuvasa otyili konthele yovipuka ovinyingi. Omokonda yatyi?

Ovanthu ovanyingi kavayumbu onthumbi movatumini, no kovanthu vokulinga ovitanda, no ku etyi tyipopiwa motelevisau no molaliu. Tyivepuiya unene okuimbuka inkha etyi omunthu ekahi nokupopia otyili umwe ine ukahi vala nokupopia etyi asoka. Tupu kavetyivili okupunga tyina omunthu ekahi nokuvekemba. Mokonda omatutu akaka unene iya ovanthu kaveliyumbu onthumbi, pahe tyivepuiya okutavela alo umwe onondaka mbotyotyili. Tyihe-otyo vala, kavayeke otyili tyivekuateseko.

Namphila omatutu eliyandyana unene, tyitavela okuvasa omakumbululo omapulo akolela unene. Ñgeni ngotyo? O mokulinga ovipuka vimwe tulinga-le ononthiki mbatyo ambuho.

Okuti ankho utyii-ale okuti ononthiki mbatyo ambuho ove wovola otyili? Tala ongeleka ya Jessica. Wati: “Omona wange uyelwe nondombe (onkhunwa). Alo umwe otyikulia tyina vala kapi ondombe tyipondola okumuipaa.” Jessica utala nawa okulia alanda opo kuhalinge omapita omona wae. Wayawisako okuti: “Otyipuka tyo tete ndyilinga, okutanga nawa omukanda upopia oñgeni okulia oko kualingwa. Ndyilinga omaovololo, ndyipula-pula iya atee umwe ndyipopia novanthu vokualinga okulia oko opo ndyikale nonthumbi yokuti kakuaile ondombe.”

Hamwe ovipuka wovola okunoñgonoka nawa inkha oviotyotyili umwe vielikalela no vya Jessica. Mahi tuna onthumbi yokuti nga Jessica, no ove ulinga ovipuka evi:

• Unoñgonoka nawa etyi tyaendapo.

• Ulinga omaovololo.

• Ukala nonthumbi yokuti omunthu wapula ine omukanda watanga, upopia umwe otyili.

Okulinga ngotyo tyipondola okukukuatesako okuvasa otyili konthele yomakumbululo omapulo akolela unene. Oñgeni upondola okuevasa?

Etyi Jessica ahimbika okuovola otyili tyo Mbimbiliya, tupu walingile ngetyi ehole okulinga pokuovola okulia kuomona wae. Wati: “Okutanga nokuovolola tyankhuatesako okuvasa otyili mo Mbimbiliya.” Ngetyi tyaendele na Jessica, ovanthu ovanyingi vanoñgonoka etyi Ombimbiliya ipopia konthele yomapulo aa:

• Omokonda yatyi tunela omuenyo?

• Oityi tyimoneka-po tyina tunkhia?

• Omokonda yatyi tumonena ononkhumbi?

• Oityi Huku ekahi nokulinga opo amaneko ononkhumbi?

• Oñgeni tupondola okukala nehambu mombunga?

Ove upondola okuvasa omakumbululo ekahi nawa omapulo oo. Oñgeni moevasi? O mokutanga Ombimbiliya, nokulinga omaovololo mo site www.pr418.com.