Kwa magole mazinji, palibe munthu omwe akhakwanisa kutawira mbvunzoyu. Napo bzikhali tenepo, wanthu azinji akhafa thangwe ra matendayo. Na kupita kwa nthawe, apfunzi wa siyensiya adadzagumana cadidi cace. Iwo adazindikira kuti matenda mazinji yambayambisidwa na tulombo na mabakiteriya. Thangwe ra kuzindikirako, mpsakukwanisika kutcenkha na kulapa matenda mazinji. Bzimwebzi bzikucitisa wanthu azinji kukhala na moyo utali na thanzi labwino.

Pana mibvunzo inango yakufunika ninga iyi:

• Kodi Mulungu Mbani?

• Kodi Jezu Kristu Mbani?

• Kodi Umambo bwa Mulungu N’ciyani?

• Kodi n’ciyani cin’dzacitika kutsogoloku?

Wanthu azinji adagumana mitawiro ya mibvunzoyi, ndipo moyo wawo udacinja kwene-kwene. Imwepombo mukadziwa mitawiro ya mibvunzo imweyi mun’dzakhala na moyo wabwino.

Pinango mungabzibvunze kuti: ‘Kodi bzingakwanisike kugumana cadidi ca nkhani inango?’ Kulewa mwakusaya kupenukira, ntsiku zino kugumana cadidi ca nkhani inango mpsakunesa kwene-kwene. Thangwe ranyi bzimwebzi bzikucitika?

Wanthu azinji ambakhulupira lini bzomwe maboma, wanthu wa malonda na anyakumwaza nkhani ambalewa. Thangwe ranyi? Wanthuwo bzimbawanesa kudziwa kuti bzomwe bzikulewedwabzo mpsacadidi ayai akundolewambo nkhani, akubisa cinthu cinango ayai kulewa bzakunama. Tsono, thangwe ra kudzala kwa nkhani zakunama na kusaya kukhulupirana, kwacitisa wanthu kukhala na makumbukidwe yakusiyana pa nkhani ya cadidi na kupenukira kuti cadidico ciripo ayai ne.

Napo bziri tenepo, mpsakukwanisika kugumana mitawiro ya mibvunzo yakufunika kwene-kwene pa moyo wathu. Mwa njira iponi? Mwa kucita bzinthu bzomwe timbacita kuti tigumane mtawiro wa mbvunzo omwe timbakhala nawo ntsiku na ntsiku.

Bzikuwonekeratu kuti imwepo mumbafufudza ntsiku zentse kuti mugumane cadidi. Ciratizo pa nkhaniyi ni Jéssica. Iye adati: “Mwana wangu akadya manduyi ambaduwala. Napo iye adye pang’ono manduyiyo ambaduwala basi.” Tenepo, Jéssica akayenda kukagula cakudya ambawonesesa kuti cakudyaco cin’duwalisa lini mwanaceyo. Iye adalewa kuti: “Cinthu cakuyamba comwe nimbacita ni kuwerenga bzinthu bzomwe abziphatisira basa kuti akonze cakudyaco. Ndikamala, nimbafufudza mpaka nimbafika pakubvunza omwe akonza kuti nditsimikizire kuti palibe ngozi iri-yentse kuna mwanangu akadya cakudyaco. Ndipo nimbafufudzambo kwa wanthu winango omwe nimbawakhulupira kuti nditsimikizire kuti omwe ambakonza cakudyawo ambacikonzadi bwino.”

Mibvunzo yomwe imwepo mumbayeza kugumana mitawiro yace, pinango ingakhale lini yakufunika kwene-kwene ninga ya Jéssica. Koma mungaphatise basa njira ibodzi-bodziyi kuti mugumane mitawiro ya mibvunzo iri-yentse:

• Dziwani cadidi ca nkhaniyo.

• Fufudzani mwakukwanira.

• Tsimikizani kuti wanthu omwe mwawabvunza bza nkhaniyo mbakukhulupirika.

Njira imweyi ingakuthandizeni kugumana mitawiro ya mibvunzo yakufunika kwene-kwene pa moyo wanu. Kodi mungacite tani bzimwebzi?

Pakufufudza cadidi ca m’Bibliya, Jéssica adaphatisa basa njira ibodzi-bodzi yomwe adaiphatisa basa pakufufudza cakudya comwe cingadaduwalisa mwanace. Iye adati: “Kuwerenga na kufufudza kudandithandiza kugumana cadidi ca m’Bibliya.” Ninga Jéssica, wanthu azinji akugumana mitawiro ya mibvunzo yomwe imbatawiridwa m’Bibliya yakuti:

• Thangwe ranyi tina moyo?

• Kodi n’ciyani cimbacitika tikafa?

• Thangwe ranyi timbabonera?

• Kodi n’ciyani comwe Mulungu akucita kuti amalise mabvuto yentse?

• Kodi banja lathu lingakhale tani lakukondwa?

Imwepo mungagumane mitawiro ya mibvunzo yakufunikayi na inango, mwa kuwerenga Bibliya na kufufudza pa webisaite ya jw.org.