Wɔ ɛvolɛ dɔɔnwo mɔɔ ɛze la anu, ɛnee awie biala ɛnze kpuya ɛhye anwo mualɛ ne. Wɔ mekɛ zɔhane, ewulenzane hunle menli dɔɔnwo. Nzinlii, abɔdeɛ nwo nrɛlɛbɛvoma nwunle mualɛ ne. Bɛnwunle kɛ ewule ngɛkɛba a fa anwodolɛ ba a​—bɛle ngɛkɛba ngyikyi mɔɔ yɛnva yɛ nye yɛnnwu bɛ la. Nɔhalɛ edwɛkɛ kokye ɛhye mɔɔ bɛnwu ye la ɛboa menli ɛmaa bɛbɔ bɛ nwo bane na bɛyɛ ewule dɔɔnwo ayile. Ɛhye maa menli dɔɔnwo tɛnla aze kyɛ mɔɔ bɛlɛ anwosesebɛ a.

Na kpuya mɔɔ anwo hyia mɔɔ ɛha la noko ɛ? Saa ɛkpondɛ kpuya ɛhye mɔ anwo nɔhalɛ edwɛkɛ a, kɛzi ɔbaha wɔ ɛ?

• Nyamenle a le nwane?

• Gyisɛse Kelaese a le nwane?

• Duzu a le Nyamenle Belemgbunlililɛ ne?

• Duzu a bazi kenle bie a?

Menli mgbe dɔɔnwo ɛnwu kpuya ɛhye mɔ anwo mualɛ ne na yeboa bɛ wɔ bɛ ɛbɛlabɔlɛ nu. Ɛdawɔ noko ɛbahola wɔanyia zolɛ nvasoɛ.

Bie a ɛbabiza kɛ, ‘Asoo ɛbahola wɔanwu debie biala anwo nɔhalɛ edwɛkɛ ɔ?’ Ɔnla aze kɛ ɛbanwu ninyɛne dɔɔnwo anwo nɔhalɛ edwɛkɛ. Duzu ati ɔ?

Menli dɔɔnwo ɛnlie ɛnli kɛ arane, gyima, anzɛɛ amaneɛbɔlɛ ngakyile mɔɔ wɔ ɛkɛ la ka nɔhalɛ. Ɔnla aze kɛ menli banwu kɛ awie mɔ ɛlɛka nɔhalɛ anzɛɛ bɛlɛkile bɛ adwenle ala, bɛlɛka edwɛkɛ ne foa bie anzɛɛ bɛlɛbɔ adalɛ bɛahile bɛ. Kɛmɔ menli ɛnlie bɛ nwo ɛnli na edwɛkɛ dɔɔnwo ne ala mɔɔ bɛte la le adalɛ la ati, ɔmmaa bɛnlie nɔhalɛ edwɛkɛ bɔbɔ bɛnli na bɛanwu kɛzi ɔbaboa bɛ la.

Ɔnva nwo ngyegyelɛ ɛhye mɔ, ɛbahola wɔanyia ɛbɛlabɔlɛ nu kpuya mɔɔ hyia la anwo mualɛ mɔɔ le nɔhalɛ la. Adenle boni azo? Dua adenle mɔɔ ɛdua zo ɛdi ninyɛne ngyikyi nwo gyima la azo.

Wɔ adenle bie azo, alehyenlɛ biala, ɛkpondɛ nɔhalɛ edwɛkɛ bie. Suzu Jessica tɛnlabelɛ ne anwo. Ɔhanle kɛ, “Ahule nee me ra raalɛ ne anwo ɛnli, ɔdi debie biala mɔɔ ahule wɔ nu la a, ɔbahola yeahu ye.” Ɔti ɔwɔ kɛ Jessica nwu ye kɛ aleɛ biala mɔɔ ɔbadɔ la ɛnrɛgyegye ɔ ra ne. “Medimoa mekenga ninyɛne mɔɔ bɛvale bɛyɛle aleɛ ne la. Akee meyɛ neɛnleanu na bɔbɔ mefɛlɛ kɔmpɛlɛ ne mɔɔ yɛle aleɛ ne la mebiza bɛ saa bie a bɛannwu ye na ahule bie rafonlanle nu a. Eza mebizebiza amaa meanwu ye saa edwɛkɛ biala ɛnle kɛzi kɔmpɛlɛ ne yɛ bɛ aleɛ ne la anwo a.”

Bie a ɛnrɛvɛ wɔ nɔhalɛ bie ɛkpondɛlɛ nwo kɛ Jessica la, noko ɛbahola wɔalua ndenle ɛhye mɔ azo wɔakpondɛ kpuya bie mɔ anwo mualɛ:

• Sukoa nwolɛ debie.

• Yɛ nwolɛ neɛnleanu dɔɔnwo.

• Nea kɛ ɛleka mɔɔ ɛlɛkpondɛ edwɛkɛ ne la di munli.

Ɛbahola wɔalua ndenle ɛhye mɔ azo wɔanyia ɛbɛlabɔlɛ nu kpuya nwo mualɛ mɔɔ le nɔhalɛ. Adenle boni azo?

Mɔɔ Jessica kpondɛ Baebolo nu nɔhalɛ ne la, ɔluale adenle ko ne ala mɔɔ ɔvale ɔyɛle ɔ ra raalɛ ne ngyegyelɛ ne anwo neɛnleanu la azo a ɔkpondɛle a. Ɔka kɛ, “Baebolo ne mɔɔ mengengale ye kpalɛ na menyɛle nwolɛ neɛnleanu la boale me maanle menwunle nɔhalɛ ne.” Menli mgbe dɔɔnwo ɛzukoa mɔɔ Baebolo ne ka ye wɔ kpuya ɛhye mɔ anwo la kɛ mɔɔ Jessica yɛle la:

• Duzu ati a yɛwɔ ɛke a?

• Boni a si wɔ ewule nzi a?

• Duzu ati a yɛnwu amaneɛ a?

• Duzu a Nyamenle ɛlɛyɛ ava adu amaneɛnwunlɛ kɔsɔɔti abo a?

• Kɛ ɔkɛyɛ na yɛanyia abusua anyelielɛ ɛ?

Saa ɛkenga Baebolo ne na ɛyɛ neɛnleanu wɔ www.pr418.com/nzi azo a, ɛbahola wɔanyia kpuya ɛhye mɔ yɛɛ kpuya ngakyile nwo mualɛ mɔɔ le nɔhalɛ.