Diad nilibon taon, anggapoy makaamta no anton talagay ebat ed satan ya tepet, kanian minilyon so inatey lapud salot tan epidemya. Sinmabi panaon, naamtaan na saray scientist no antoy tua. Adiskobre da ya onlelesa iray sakit lapud germs—saray mikrobyo, singa say bakterya tan virus. Lapud naamtaan la itan ya katuaan, dakel la natan so makakaiwas ed saray sakit tan natatambal la iratan, kanian mas andukey lay bilay tan mas mabiskeg lay laman na binilyon ya totoo.

Panon to balet iray arum nin importantin tepet? Antoy epekto ed sika no naamtaan mo ray ebat ed sarayan tepet?

• Siopa so Dios?

• Siopa si Jesu-Kristo?

• Anto so Panarian na Dios?

• Antoy nagawa ed arapen?

Naamtaan na minilyon ya totoo so ebat ed saratan ya tepet tan nagmaliw ya maliket so bilay da. Nagunggonaan ka met no antam iray ebat ed saratan.

Ompan isipen mo, ‘Posible kasin naamtaan so katuaan nipaakar ed amin ya bengatla?’ Lalo la ta mas mairap la natan ya anapen so katuaan nipaakar ed dakel iran bengatla. Akin?

Dakel ya totoo so agmantitiwala ya ibagad sikara na saray gobierno, kompanya, odino media so tua. Mairap dan ibiig so tuan impormasyon ed saray opinyon labat, ontan met ed saray impormasyon ya walay katuaan to balet aliwan kompleto, tan saray direktan tila ya papapawayen na arum ya napantiwalaan kunon impormasyon. Diad sayan mundo ya anggapoy tiwala na totoo ed sakey tan sakey tan dakel so impormasyon ya aliwan tua, agmakapanpaknaan iray totoo no anton talaga so tua tan no antoy labay ya ibaga na saratan.

Balet anggano ontan lay nagagawa natan, posiblin naamtaan mo so ebat ed saray importantin tepet ed bilay. Panon? No gawaen mo met iray paraan ya gagawaen mo la pian amtaen iray ebat ed saray simplin tepet.

Diad tua, kada agew et aanapen moy katuaan. Imanoen so situasyon nen Jessica. “Grabe so allergy na anak ko ed mani,” so imbaga to, “no walay naakan ton alaokan na anggan dagdaiset labat ya mani, nayarin ipatey to.” Kaukolan ya seguroen nen Jessica ya saray sasaliwen ton naakan et nayarin kanen na anak to. “Babasaen ko nin unona iray ingredients ya akasulat ed label na sasaliwen ko. Insan ak man-research tan kontaken ko ni ingen so manufacturer pian nasegurok ya anggapon talagay laok ton mani. Ikokonsiderak met so arum ya napantiwalaan ya lapuan na impormasyon ya mangiiter na garantiya ya talagan tutumboken na kompanya iray dugan paraan na panaggaway naakan.”

Ompan saray tepet mo et aliwan ontan kaseryoso ed saray tepet nen Jessica. Balet singa si Jessica, sarag mon usaren iyan paraan pian naamtaan so ebat ed saray tepet mo:

• Amtaen iray impormasyon.

• Man-research.

• Seguroen ya napantiwalaan iray pangaalaan moy impormasyon.

Makatulong itan ya paraan pian naamtaan moy ebat ed saray importantin tepet ed bilay. Panon?

Nen manaanap si Jessica na katuaan na Biblia, inusar to met so paraan ya gagawaen to no manre-research nipaakar ed allergy na anak to. Imbaga to, “Akatulong ed siak so maalwar ya pambasa ed Biblia tan makulin pan-research pian naalmok so katuaan.” Singa si Jessica, naamtaan na minilyon a totoo no antoy ibabaga na Biblia ed sarayan tepet:

• Akin et wadia tayo?

• Antoy nagawa no ompatey so too?

• Akin et maniirap so totoo?

• Antoy gagawaen na Dios pian naekal so amin ya kairapan?

• Panon tayon nawalaan na maliket a pamilya?

Naamtaan mo so ebat ed saraya tan arum nin tepet no basaen moy Biblia tan man-research online diad www.pr418.com.