Fa dusende Joaren wisten de Menschen daut nich, un doawäajen sent Millionende aun Krankheiten jestorwen. Met de Tiet haben de Forscha dan de Woarheit doaräwa jefungen. Dee weeten nu, daut Krankheiten foaken von kjlienet Ojjezeffa häakomen, waut nich to seenen es, soo aus Baktierieen ooda von soont, waut sikj Virus nant. De Woarheit äwa dit to weeten halpt, daut eena väl Krankheiten väabieejen ooda doamet doktren kaun. Väl dusent Millionen Menschen kjennen doaderch lenja un jesunda läwen.

Woo steit et met aundre Sachen? Waut denkjst du, waut kunn daut aun dien Läwen doonen, wan du de Woarheit fungst äwa de Froagen:

• Wäa es Gott?

• Wäa es Jesus Christus?

• Waut es Gott sien Kjennichrikj?

• Woo woat daut lota noch mol sennen?

Millionende Menschen haben de Woarheit äwa dise Froagen jefungen un haben doaderch äa Läwen vebätat. Die wudd de Woarheit äwa dise Froagen uk halpen.

Veleicht wundascht du: “Woo es daut mäajlich, de Woarheit äwa eene jewesse Sach to finjen?” Daut späat je sikj soo, daut et bie välet emma schwanda woat, de Woarheit to finjen. Wuarom?

Väle vetruen nich opp de Rejierungen, Jeschaftsmana ooda opp daut, waut em Tellewizhen un Rädio jesajcht woat. Daut es schwoa fa de Menschen to weeten, aus se äant de Woarheit sajen, aus daut bloos Iedeeen sent, aus daut bloos de haulwe Woarheit es ooda aus daut Läajes sent. Wäajen dee kjeen Vetruen mea haben un doa soo väl Faulschet es, sent de Menschen sikj nich mol eenich, woo se de Woarheit vestonen sellen ooda waut verheipts de Woarheit es.

Wan daut uk schwoa es, es daut oba mäajlich, de Auntwuaten fa dee Froagen to finjen, waut Menschen aul emma hauden. Woo? Krakjt soo, aus eena aundre Sachen em Läwen rutfinjt.

Eenje motten jieda Dach no Woarheit sieekjen. Woo es daut biejlikj bie Jessica? See sajcht: “Miene Dochta kaun nich Pienats vedroagen, un daut es soo schlemm, daut see wudd kjennen von daut kjlanste Beskje stoawen.” Jessica mott doano kjikjen, daut daut Ätwoa, waut see kjaft, äare Dochta nich schoden woat. See sajcht: “Daut ieeschte läs ekj mie no, waut doa aules mank es. No daut sieekj ekj mie daut noch wieda no un froag mau rajcht dee, waut daut jemoakt haben, aus doa nuscht von Pienats mankjekomen es. Ekj unjasieekj mie daut uk noch opp aundre Städen, aus ekj werkjlich doaropp vetruen kaun, woo de Kompanie äa Ätwoa moakt.”

Veleicht sent de Auntwuaten, no waut du jeweenlich sieekjst, nich soo wichtich aus Jessica äare. Oba soo aus Jessica kaust du daut veleicht soo aus dit doonen:

• Unjasto die de Sach.

• Forsch die daut noch oppoat no.

• Moak secha, daut et soo es, waut du die nosieekjst.

Dautselwje kaust du doonen, om de Auntwuaten fa dee Froagen to finjen, waut Menschen aul emma hauden. Woo?

Aus Jessica no de biblische Woarheit socht, deed see daut biejlikj soo, aus see daut bie daut Ätwoa fa äare Dochta deit. See sajcht: “Oppmoakjsom to läsen un werkjlich notoforschen holp mie, de biblische Woarheit to finjen.” Soo aus Jessica haben millionende Menschen de Auntwuaten jefungen fa de Froagen:

• To waut läw wie?

• Waut passieet, wan wie stoawen?

• Wuarom mott wie lieden?

• Waut deit Gott, om met daut Lieden een Enj to moaken?

• Woo kjenn wie een schaftjet Famieljenläwen haben?

Du kaust de Auntwuaten fa soone un aundre Froagen finjen, wan du de Schreft läst un die Sachen opp www.pr418.com nosieekjst.