Erein sounpar kid kei, sohte emen me uhdahn ese pasapengpen peideko. Erein ahnsowo, soumwahu lusulus kan kemelahr aramas rar kei. Kedekedeo, saintis kan diarada me mehlelo. Irail diarada me soumwahu kan kalapw kohsang ni mwahs akan​—kisin mwahs tikitik kan me duwehte bacteria de virus kan. Arail diarada ire mehlelo me sewesehier aramas akan ren irehdi soumwahu oh kamwahwihala soumwahu tohto kan me kahrehda aramas lik kei ren mour werei oh mour kehlail.

A ia duwen peidek kesempwal teikan? Dahme ke medewe me pahn wiawihong uhk ma ke diarada me mehlelo duwen pasapengpen peidek pwukat?

• Ihs Koht?

• Ihs Sises Krais?

• Dahkot Wehin Koht?

• Dahme pahn wiawi ni ahnsou kohkohdo?

Aramas rar kei diaradahr pasapengpen peidek pwukat oh kamwahwihalahr arail irair en mour. Ke pil kak paiekihda pasapeng pwukat.

Ele ke kin medewe, ‘Aramas kak diarada me mehlel duwen mehkot sohte lipilipil?’ En pil diarada me mehlel duwen soahng tohto kin mwomwen apwahpwalla. Dahme kahrehda?

Aramas tohto sohte kin koapworopworki koperment, pesines kan, de pelien nuhs ren padahkihong irail me mehlel. E sohte mengei ong irail ren ese ma meteikan kin ndaiong irail me mehlel de ma irail ndaiongirailte arail madamadau, ahpw re kin ekihla ekei ire, de pil kin likilikamw. Pwehki aramas akan sohte kin likih emenemen oh ire tohto kin likamw, aramas kin sapwungki duwen dahme uhdahn mehlel oh pil ia wehwehn met ong irail.

Mendahki soangen kahpwal pwukat, pasapengpen peidek kesempwal kan ong mour kak dierekda. Ia duwen? Sang ni omw kin wia soahngohte me ke kin wiewia pwehn diarada pasapengpen ekei peidek ehuehu rahn.

Ke kin rapahki me mehlel rahn koaros. Medewehla en Jessica irairo. E nda: “Nei serepeino eh kin suwediong kang peanut uhdahn laud, pwe menda ma pil kisin peanut tikitik kis me e kang kak kemehla ih.” Jessica anahne ese me mwenge me e kin pwainda pahn sohte keper ong nah serepeino. “Me I kin tepin wia iei I kin tehk kanahieng doaloapen mwenge me mi ni kilin mwenge ko. Eri I doula wia roporop oh pil idek rehn wasa me wiahda mwenge ko ma sou mie kisin peanut kis iang doaloahda mwenge ko. I pil kin tehk mehn kadehde teikan me kak kadehdehda mehlelpen adamwahu en pesineso duwen arail kin idawehn koasoandi en kaunopada mwenge me sohte keper.”

Peidek kan me ke kin songosong rapahkihda pasapengpe kan nan omw mour ehuehu rahn ele sohte nohn kesempwal duwehte en Jessica irairo, ahpw duwehte Jessica, ke ele pahn doadoahngki soahngohte pwehn diarada pasapengpen peidek kan me ke kin ahneki.

• Esehla dahme uhdahn mehlelo.

• Kalaudehla omw wia roporop.

• Tehk me ire kan me ke doadoahngki en likilik.

Soangen wiepe pwukat kak seweseiuk ken diarada pasapeng mehlel kan ong peidek kesempwal kan nan omw mour. Ia duwen?

Ni ahnsoun wia roporop ong padahk mehlel en Paipel kan, Jessica doadoahngki soangen wiepe ehute ong me e kin doadoahngki ni eh kin raparapahki mwenge ko me suwediong nah serepeino. E koasoia, “Wadawad ni keneinei oh doadoahk laud wia roporop me sewesei ie ien diarada me mehlelo nan Paipel.” Duwehte Jessica, aramas rar kei sukuhlkiher dahme Paipel mahsanihki duwen peidek pwukat:

• Dahme kahrehda kitail mie?

• Dahme kin wiawi mwurin mehla?

• Dahme kahrehda mie lokolok?

• Dahme Koht kin ketin wiewia pwehn kauhdi lokolok koaros?

• Ia duwen atail kak ahneki mouren peneinei nsenamwahu?

Ke kak diarada pasapeng mehlel kan ong peidek pwukat oh peidek teikan sang ni omw kin wadek Paipel oh kalaudehla omw wia roporop nan online nan www.pr418.com.