May chhika watasta ashkha runas wañorqanku millay onqoykuna kasqanrayku. Imaraykuchus mana yacharqankuchu imaynatachus onqoykunamanta jarkʼakunata. Tiemponmantaj cientificosqa yacharqanku imaraykuchus onqoykuna yapakusqanta. Cientificosqa ninku ashkha onqoykuna yapakusqanta mana rikukoj chʼichi khuritus kasqanrayku. Chayta yachayqa runasta yanaparqa mana onqonankupaj imastachus ruwanankuta, onqoykuspataj imawanchus jampikunankuta. Chantapis yanapallarqataj ashkha runas aswan unayta kausanankupaj, nitaj anchata onqonankupaj.

Waj imasmantapis yachanallanchejtaj tiyan, imajtinchus kausayninchejpi yanapawasunman. Kay tapuykunata jina:

• ¿Imaynataj Diosninchej?

• ¿Pitaj Jesucristo?

• ¿Maypitaj kashan Diospa Gobiernon?

• ¿Imaynataj kausay qhepaman kanqa?

May chhika runasqa chay imasta yachankuña, aswan allintataj kausakushanku. Qantapis kausayniykipi yanapallasunkimantaj.

Imamantapis cheqa kajta yachayqa mana atikullanchu. Imaraykuchus runasqa mana cabaltachu parlanku.

Ashkha runasqa mana confiankuchu gobiernospi, empresaspi, ni noticiaspipis. Runasqa mana yachankuchu gobiernos, empresas nisqanku, noticiaspi nikusqan ima verdadchus manachus kasqanta. Ichá paykunaqa allinpaj qhawachikuyta munaspalla imatapis nishankuman. Chayrayku, kay mundo llulla runasmanta juntʼa kasqanrayku runasqa, manaña imatapis creenkuchu cheqapuni kajtinpis.

Chaywanpis yachayta atisunman imaraykuchus kausayninchejpi wakin imas kasqanta, imaynatachus waj imasmanta yachayta atinchej, ajinata.

Sapa día tukuy imamanta cheqa kajta yachayta munanchej. Jessicamanta parlarina. Payqa alimentosta rantishaspa sumajta qhawarinan tiyan mana maniyniyoj kananta. Pay nin: “Wawayqa mana maniyta mikhuyta atinchu. Imajtinchus uj chhikan maniywan chajrusqa mikhunata mikhuykuspaqa wañupunman. Chayrayku niraj imatapis rantishaspa etiquetantaraj sumajta leeni imasniyojchus kasqanta yachanaypaj. Chantataj astawan investigani, chay alimentosta ruwaj empresatapis tapurini mana maniywan chajrusqa kananta yachanaypaj. Chantá wajkunatapis tapurikullanitaj chay empresa mana llullakushawasqanta yachanaypaj”, nispa.

Ichá mana Jessica jinapunichu sapa día imatapis investigana tiyan. Chaywanpis pay jina waj imasta yachanapaj kallpachakusunman.

• Ñaupajtaqa allintaraj yachana.

• Astawan investigana.

• Jinapunichus manachus kasqanta yachanapaj wajkunata tapurikuna.

Ajinata ruwaspaqa imatachus yachayta munasqanchejta yachasunchej.

Jessicaqa uj alimentota rantinanpaj allintaraj investigan. Ajinallatataj Bibliamanta cheqa kajta yachakunanpajpis ruwan. Pay nin: “Bibliamanta cheqa kajta yachanaypajqa sumajta leesqay, investigasqay ima yanapawarqa”, nispa. May chhika runaspis Jessica jinallataj ruwarqanku, tarerqankutaj imatachus Biblia yachachisqanta kay urapi rikhurej tapuykunamanta jina:

• ¿Kay kausayllachu kanman?

• ¿Maymantaj wañupuspa rinchej?

• ¿Imaraykú ñakʼarinchej?

• ¿Imaynatataj Dios ñakʼariykunata tukuchenqa?

• ¿Imaynatá familias kusisqa kausakunkuman?

Qanpis Bibliata leespa chaykunata, waj imastawan yachawaj. Astawan yachayta munaspataj yaykuwaj Internetpi www.pr418.com nisqaman.