Unë witsankunaqa manam ni pï musyarqantsu imapita y imanö qeshya tsarikunqanta, tsëmi mëtsikaq nunakuna wanuyarqan. Kananqa alli estudiarmi musyayashqa imapita y imanö qeshya tsarikunqanta. Tsëmi kananqa musyantsik qeshya mana tsarimänapaq imata ruranapaq kaqta, y tsarimashqaqa ima kachakätsimänapaq kaqta. Tsëmi yanapakushqa alli saloryoq kanapaq y ichik mas tiempu kawanapaq.

Musyanqantsiknöpis, imatapis alli y rasumpa kaqta musyanqantsikqa alläpam yanapakun. Kananqa këman pensari: ¿imallachöpis yanapamashwantsuraq këkunata musyanqantsik?

• ¿Imanötaq Kamakoq Yayantsik?

• ¿Jesucristuqa Diosku?

• ¿Imanötaq Diospa Gobiernun?

• ¿Imanöraq warë warätin kawakushun?

Mëtsika nunakunam rasumpa kaqta yachakuyashqa, tsëmi kananqa mas allina kawakuyan. Qampis rasumpa kaqta yachakurirqa mas allinam kawakunki.

Kanan witsanqa manam llapan nunakunatsu rasumpa kaqta parlayan. Tsëmi höraqa, “¿imanöraq rasumpa kaqta musyäman?” nintsik.

Gobernaqkuna, rantikoqkuna y noticiata willakoqkunapis manam rasumpa kaqtaqa willakuyannatsu. Tsëmi imata wiyarpis o leyirpis kënö nintsik: “¿Rasumpa kaqtatsuraq nikan o kikin pensanqanllatatsuraq? ¿Llapan ninqantsuraq rasumpa o ulikïkantsuraq (llullakuykantsuraq)?”. Jinamampis, wakin nunakunaqa imëpis mana kaqtam parlayan.

Tsënö kaptimpis, puëdintsikmi rasumpa kaqta musyëta y yachakuyta. Y ¿imanötaq rasumpa kaqta yachakuyta puëdintsik? Tsëta rikärishun.

Wakinqa cada junaqmi rasumpa kaqta musyëta munayan. Jëssica jutiyoq warmipaq parlarishun. Pëpa warmi wamranqa manam ichikllatapis manïta (imtsikta) mikuyta puëdintsu. Tsëmi ima mikïtapis rantirqa, manïwan rurashqataqa mana rantintsu. Kënömi nin: “Warmi wamrä ichikllatapis manïta mikuriptinqa, tsëllanam wanuynin kanman. Tsëmi imatapis mercädupita rantita munarqa qaranchö imata ninqantaraq leyi y alliraq tapupakü. Y imanöpapis manïwan takukashqa kananta mantsarmi hörataqa kikin fabricamampis qayakü. Y rantinäpaq kaqta ruramoqkunapaq wakinkuna ima niyanqantam alli musyapakü”.

Imëkachöpis, rasumpa kaqta musyanapaqqa noqantsikpis Jëssicanöllam ruranantsik:

• Alli yachakuytaran tïranantsik.

• Alliran musyapakunantsik.

• Mëpita y pipita yachakikanqantsiktam cuentaman churanantsik.

Tsënö ruranqëkim yanapashunki rasumpa kaqta yachakunëkipaq. Tsëta rikärishun.

Jëssicaqa manïyoq mikuyta mana rantinampaq musyapakunqannöllam, Bibliapita yachakunqanchöpis rurashqa. Kënömi nin: “Bibliata leyir kallpachakunqä y yachakunqäkunapita masta musyëta munanqämi yanapamashqa rasumpa kaqta musyanäpaq”. Jëssicanöllam mëtsika nunakunapis rurayashqa këkunapita yachakuyänampaq:

• ¿Imanö kawanatataq Diosnintsik munarqan?

• ¿Imataq wanurishqa pasamantsik?

• ¿Imanirtaq imëka sufrimientukuna kan?

• ¿Imanöraq sufrimientukunata Dios ushakätsinqa?

• ¿Imanöraq familiakuna kushishqa kawayanman?

Këkunapita yachakïtaqa qampis puëdinkim, Bibliata leyirnin y www.pr418.com internet päginaman yëkur.