Фартэ бут бэрша нико на ӷанэнас о атвето пэ кадэва вопросо, и лэ насвалимастар мэрэнас милионоря мануша. Прожыля время и учони полинэ, кай часто о насвалимос лэлпэ через и микробы. Дэсавэ андар лэндэ када бактерии и вирусы. Кадэва чачимос поможысардя лэ манушэнди тэ фэринпэ и тэ личин бут насвалимос. Кадя милиардоря мануша линэ май мало тэ насвавэн и тэ жувэн май долӷо.

Но андэ жызня исин и авэр важни вопросоря.

• Ко када о Дэл?

• Ко када о Иисус Христос?

• Со када лэ Дэвлэско Царство?

• Со авэла англэ?

Милионоря мануша виарақлэ атветоря пэ кадэла вопросоря, и лэндири жызня ашэля май лащи. Када анэна лашимос и тути.

Наверно, ту гиндос: «Хэба можно тэ виарақэс точно атвето по любо вопросо?». Чаче, тэ виарақэс о чачимос андэ бут вопросоря ашэл май ԥарэс. Васо?

Бут миро ужэ на патял кодэлэсти, со ԥэнэн и мануша анда правительство и анда разни арӷанизацыи. Кадяжэ на патял кодэлэсти, со ԥэнэн па телевизоро, па радио, через о интэрнэто и андэ ӷазеты. Адес пэ любо инфармацыя ԥэнэн, кай вой точно, важ када ԥарэс тэ полэс, кай о чачимос. Например, тэ полэс, кадэя инфармацыя ужэ доԥэнди, или када варикастирэ гиндоря, или вой пэ епаш чачуни, или всавори хохавни. Важ кода кай и мануша на патян ек еқэсти, вонэ споринпэ пала кода, со чачимос, ай со най.

Хоть и най вушэро тэ ӷатярэс о чачимос, тэ виарақэс и атветоря пэ важни вопросоря всаек можно. Сар? Если терэса кода, со кажно дес терэс, кай тэ виарақэс атветоря пэ обычни вопросоря.

Можно тэ ԥэнэс, кай ту родэс о чачимос кажно дес. Ек манушни, савя ақарэн Джессика, росԥэнэн: «Кай мэрни бэята фартэ бари аллергия по арахисо. Дажэ если вой хала набут хамос, андэ саво исин арахисо, кадэлэстар вой можэт тэ мэрэл». Кала и Джессика тинэл хамос, лати важно точно тэ ӷанэн, кай лэстар латиря бэятати на авэла вэрыто. Вой ԥэнэн: «Спэрва мэ драго уӷанав, со андо хамос, ай потом родав инке май бут инфармацыя пала лэстэ. Мэ дажэ звонисарав кодэлэнди, ко терэл кадэва хамос и уӷанав, нэ моӷ варисар андэр лэстэ тэ попэрэл о арахисо. Кадяжэ мэ розуӷанав андо интэрнэто или варикай аврэтэ пала кодэла, ко вимэкэл кадэва хамос».

Можэт, кода, со ту камэс тэ уӷанэс, най пэ скати дэ важно. Но ту можэш тэ родэс и атветоря кадя жэ, сар и Джессика.

• Тэ стидэс кода, со ужэ доԥэндо.

• Тэ виарақэс май бут инфармацыя.

• Тэ розуӷанэс, сости можно тэ патяс.

Када поможыя тути тэ виарақэс атветоря и пэ важни вопросоря андэ жызня. Сар?

Кала и Джессика родэлас атветоря пэ авэр вопросоря, савэ слинэ важни важ латэ, вой шутя сама пэ Библия. Вой родэлас атветоря кадя жэ, сар и о лашо хамос, саво можно латиря бэятати. Вой ԥэнэн: «Мэ внимательно адиносаравас и Библия и драго вся продиқавас. Кадя мэ виарақлэм о чачимос». Милионоря мануша, сар и Джессика, виарақлэ андэ Библия атветоря пэ кацавэ вопросоря.

• Состэ амэ жувас?

• Со терэлпэ лэ манушэса посли смэрть?

• Васо лэ манушэндэ ԥаримос и биды?

• Со терэл о Дэл, кай тэ улэл вся о ԥаримос?

• Со трэбуй, кай о ери тэ авэл бахтало?

Ту можэш тэ виарақэс атветоря пэ кадэла и пэ авэр вопросоря, кала адиноса и Библия и розуӷанэса май бут инфармацыя по сайто www.pr418.com.