Mu pyaka pizinji nee munthu m’bodzi akhadziwa ntawiro wa mbvundzo unoyu, ndi thangwi yace mautenda akuthapulisana apha anthu azinji. Mukupita kwa ndzidzi, asiyentista adziwa undimomwene thangwi ya mautenda akuthapulisana. Iwo apangiza kuti mautenda anewa akhabwereswa kazinji kene na pirombo ping’ono-ping’ono ninga mabhakiterya. Dziwani kuti undimomwene unoyu waphedza anthu toera kucalira, peno kukondza mautenda mazinji, pontho pyenepi pyacitisa kuti anthu azinji akhale na ungumi wadidi.

Ndiye tani thangwi ya mibvundzo inango yakufunika? Kodi kusaka kudziwa undimomwene wa mibvundzo inatowera kunakukhuyani tani?

• Mulungu mbani?

• Yezu Kristu mbani?

• Umambo wa Mulungu ninji?

• Ndi cipi cidikhiro ciri na ife thangwi ya ntsogolo?

Anthu azinji agumana matawiro a mibvundzo ineyi, pontho umaso wawo wacinja. Imwembo munakwanisa kuphedzeka na matawiro a mibvundzo ineyi.

Panango munabvundzika: ‘Pinakwanisika tani kugumana undimomwene wa pinthu pyonsene?’ Kusiyapo pyenepi, kugumana undimomwene wa pinthu pyonsene kusaoneka ninga ndi kwakunentsa kakamwe. Thangwi yanji?

Toera kudziwa undimomwene wa pinthu, anthu azinji nkhabe kunyindira mautongi, anyamalonda, mphangwa za mu radhyo, televizau peno interneti. Mphyakunentsa kuna anthu toera kudziwa kuti anango akulonga undimomwene, akulonga maonero awo, akubisa pinthu ngakhale akulonga uthambi. Nakuti anthu azinji nkhabe nyindirana, pontho mphangwa zizinji ndi zauthambi, natenepa iwo asakhonda undimomwene, maseze ukhale wakufunika kuna iwo.

Mwakukhonda tsalakana pinentso pyenepi, mphyakukwanisika kugumana matawiro a mibvundzo yakufunika kakamwe mu umaso. Munjira ipi? Mungacita pinthu pibodzi pyene pinacita imwe toera kugumana matawiro a mibvundzo yakukhonda funika mu umaso.

Toera kubvesesa undimomwene, musafunika kuufufudza ntsiku zonsene. Onani pinacitikira Jessica. Iye alonga: “Mwananga wantsikana asanentseka kakamwe angadya mandui peno cakudya cakuikhwa mandui.” Jessica asafunika kudziwa mwadidi cakudya cinafuna iye kugula toera kupasa mwanace. Iye alonga: “Mbandidzati kugula cakudya, ndisaleri mphangwa zinapangiza pinthu pidaikhwa mwenemo. Buluka penepo, ndisasaka mphangwa zakuthimizirika, ngakhale kupita ncibverano na ale adacita cakudya ceneci toera kudziwa khala ndi cakuthema kuna mwananga. Pontho ndisasaka kudziwa na anthu anango toera ndikhale na cinyindiro cakuti cakudya cinafuna ine kugula ndi cadidi.”

Ninga pinacita Jessica kusaka kwanu undimomwene ntsiku zonsene panango nee kunakhala kwakunentsa kakamwe. Mbwenye ninga Jessica, imwe munakwanisa kuphatisira ntsonga zinatowera toera kugumana matawiro a mibvundzo iri na imwe:

• Sakani kudziwa pinthu pyonsene.

• Fufudzani mphangwa zinango.

• Khalani na cinyindiro cakuti mphangwa zinasaka imwe ndi zakunyindirika.

Njira zenezi zinakwanisa kukuphedzani kugumana undimomwene wa matawiro a mibvundzo yakufunika kakamwe mu umaso. Munjira ipi?

Pakusaka undimomwene wa Bhibhlya, Jessica asaphatisira njira ibodzi ene pakusaka cakudya toera kupasa mwanace. Iye alonga: “Kuleri na kufufudza mwadidi kwandiphedza toera kugumana undimomwene wa m’Bhibhlya.” Ninga Jessica, anthu azinji apfundza kuti Bhibhlya isatawira tani mibvundzo iyi:

• Thangwi yanji tiri pano?

• Ninji pinacitika tingafa?

• Thangwi yanji tisathabuka?

• Kodi Mulungu akucitanji toera kumalisa nyatwa zonsene?

• Tinakhala tani na banja yakutsandzaya?

Munakwanisa kugumana undimomwene wa matawiro a mibvundzo ineyi na inango mungaleri Bhibhlya na kufufudza mu saiti www.pr418.com.