Teti angu saki mingi, zo oko ahinga lani kiringo tënë ni ape, na gbâ ti azo akui na lege ti asioni kobela ni so. Me na nda ni, awandara ahinga tâ tënë na ndö ni. Ala ga ti bâ so mingi ni amicrobe, na tapande abactérie wala avirus, la ayeke na gunda ti akobela ni so. Tâ tënë oko so ala hinga ni so amû lege na azo ti kpe akobela mingi nga ti soigné ambeni mingi, a sara si azo mingi awara lege ti vivre aninga nga ti duti na nzoni seni.

Me aye ti nzoni wa la mo yeke wara tongana mo wara kiringo tënë na ahunda tongana:

• Nzapa ayeke zo wa?

• Jésus Christ ayeke zo wa?

• Royaume ti Nzapa ayeke nyen?

• Kekereke ti e ayeke duti ande tongana nyen?

Gbâ ti azo awara akiringo tënë ni, na gigi ti ala akiri aga nzoni mingi. Mo nga kue mo lingbi ti wara aye ti nzoni na lege ti akiringo tënë ni so.

Mo peut ti hunda terê ti mo: ‘Eskê a yeke tâ possible ti hinga tâ tënë na ndö ti aye kue?’ Kozoni kue, ti hinga tâ tënë na ndö ti ambeni ye akiri aga ngangu. Ngbanga ti nyen?

Mingi ti azo ayeke na confiance ape na tënë ti azo ti gouvernement, azo ti dengo-buze, wala azo so ayeke vunga asango. A yeke ngangu na ala ti hinga wala amba ti ala ayeke tene na ala tâ tënë wala ala yeke fa gï pensé ti ala, ala honde ambeni sango wala même ala tene na ala mvene. Ndali ti so azo ayeke na confiance na mba ape nga so mingi ti asango ayeke tâ tënë ape, azo ayeke ke ti yeda na aye so ayeke biani tâ tënë nga même aye ti nzoni so ala peut fade ti wara na lege ni.

Atâa akpale ni so, lege ayeke dä ti wara atâ kiringo tënë na akota hunda so ahon atanga ni kue. E yeke wara ni tongana nyen? Tongana e sara a-oko ye so e yeke sara ka ti wara kiringo tënë na ahunda ti e.

E peut ti tene so, lâ oko oko e yeke gi ti hinga tâ tënë. Bâ ye so asi na Jessica. Lo tene: “Tongana molenge ti mbi ti wali ate karako, a yeke sara lo nzoni ape, lo te même gï kete, a peut ti fâ lo.” Jessica agi ti hinga kobe wa la lo peut ti vo si molenge ti lo apeut ti te ni senge. Lo tene: “Kozoni, mbi yeke diko ambeti so ayeke na terê ti aboîte wala acarton ti akobe ti hinga aye so a sara na ni. Na pekoni mbi yeke sara arecherche na ndö ni mbi iri même ndokua so a sara kobe ni dä ti hinga wala karako atï na yâ ti kobe ni sân ti tene ala hinga. Mbi yeke sara recherche na ndö ti internet wala na ambeni ndo nde ti bâ wala zo apeut ti sara confiance na akobe ti ndokua ni.”

Peut-être ahunda so mo yeke gi ti wara kiringo tënë na ni lâ oko oko na yâ ti fini ti mo apeut ti duti ambeni tënë so ayeke kota ye tongana ti Jessica ape, me tongana ti so lo sara, mo peut ti sara kua na aye so afa ge so ti wara kiringo tënë na ahunda ti mo:

• Gi ti hinga ye nzoni na ndö ti tënë ni.

• Sara ambeni recherche na ndö ni.

• Duti sûr na ando so mo sara recherche ni dä.

Ti sara kua na oko kode so apeut ti aidé mo ti wara atâ kiringo tënë na akota hunda so abâ gigi ti zo. Na lege wa?

Na ngoi so Jessica ayeke gi lani atâ tënë ti Bible, lo sara kua na mara ti kode so lo yeke sara kua na ni ti gi na kobe so molenge ti lo apeut ti te. Lo tene: “Dikongo ye nzoni nga na sarango recherche a-aidé mbi ti wara tâ tënë ti Bible.” Tongana ti Jessica, azo kutu mingi ahinga ye so Bible afa na ndö ti ahundango tënë tongana:

• Ngbanga ti nyen la e yeke na fini?

• Nyen la ayeke si na zo tongana lo kui?

• Ngbanga ti nyen la pasi ayeke mingi tongaso?

• Nyen la Nzapa ayeke sara ti hunzi na apasi kue?

• Nyen la e lingbi ti sara ti tene sewa ti e aduti na ngia?

Mo lingbi ti wara atâ kiringo tënë na ahundango tënë so nga na ambeni nde tongana mo diko Bible nga mo sara arecherche na ndö ti site www.pr418.com.