Lowo kume ikkanno diro tenne xaˈmora dawaro anfikkinni keeshshinoonni. Hatte mereero lowo miliyoone ikkanno manni taraawanno dhibbinni goofino. Yannate gedensaanni kayinni, sayinsete egennaammi tenne daafira halaale affino. Insa, duucha woyite dhibbu taraawannohu baakteeriyunna vayiresete gedeete dhibba abbitannote shiimmaadda lubbuwanni ikkinota buuxxino. Taraawanno dhibbi daafira halaale afa, lowo dhibba gargarranninna xaginsanni gede kaaˈlitino; konninni kainohunni lowo biliyoone ikkanno manni fayyimma afiˈre seeda diro heeˈra dandiino.

Lowo geeshsha huluullitannonkete wole xaˈmuwara dawaro afiˈra dandiinanniyya? Aante noo xaˈmuwara dawaro afiˈrakki ateno kaaˈlitannohehu hiittoonniiti?

• Maganu ayeti?

• Yesuusi Kiristoosi ayeti?

• Maganu Mangiste maati?

• Albillitte heeshsho hiittoota ikkitanno?

Lowo miliyoone ikkanno manni kuri xaˈmuwara dawaro afiˈransa, hagiirru noo heeshsho heeˈranno gede kaaˈlitinonsa. Kuri xaˈmuwara dawaro afiˈrakki, ateno kaaˈlitahera dandiitanno.

‘Mittu coyi daafira halaale afa dandiinannihu hiittoonniiti?’ yite hedattoha ikkara dandaanno. Qoleno, mittu mittunku coyi daafira halaale afa roore qarra ikkitara dandiitanno. Mayira?

Batinyu manni halaale dikultanno yee hedanno daafira gashshaasine, daddalaano woy tuqu xaadooshshe diammananno. Uminsa hedo, woy gama adda gama kapho, woy woˈmunni woˈma kapho coyiˈranno manni batiˈrino daafira, halaalu hiikkonneetiro afa qarra ikkitanni daggino. Tenne yawaawullenna kaphu batiˈrino alamera halaale anfe gara ikkinore assa agurina, halaalu maatiro huwata nafa qarra ikkitino.

Ikkirono, huluullitannonke xaˈmuwara halaalaancho dawaro afiˈra dandiineemmo. Hiittoonni? Barru barrunkunni shiimmaadda coyibba daafira halaale afate horoonsiˈneemmo hayyo horoonsiˈra dandiineemmo.

Ajo batiˈro barru baala halaale hasiˈneemmo. Hanni Jesika lawishsha laˈno. Ise togo yitino: “Qaaqqoˈya ocholoone itturo baasa dhiwannose; shiima ocholoone karsantinore nafa itturo shaasera dandaanno.” Hakko daafira, Jesika qaaqqosera sagale hidhitanno woyite lowo geeshsha qorophitanno. Ise togo yitino: “Ashshagantino sagale hidheemma woyite, balaxe sagale mayinni qixxeessinoonnitero afate aanaho borreessinoonnire qorophe nabbaweemma. Hakkiinni hattee sagale daafira lede xiinxalleemma; isinni, hili ocholoone nafa karsinoonnikkita buuxate qixxeessitino dirijjite xaˈmeemma. Qoleno hatti dirijjite sagale qixxeessitanno gari fayyimma gawajjannoronna teˈee buuxate wole ammannanni mashalaqqe afiˈrate woˈnaaleemma.”

Barru baala halaale afiˈrate sharrammeemmo coyi Jesikahu geeshsha qarrisannoha ikka hoogirono, xaˈmonkera dawaro afate ise gede aane noore assa dandiineemmo:

• Mashalaqqe hasiˈri.

• Ledde xiinxalli.

• Afiˈrootto mashalaqqe adda ikkase buuxi.

Togo assa, heeshshonke giddo lowo geeshsha huluullitannonke xaˈmuwarano halaalaancho dawaro afiˈrate kaaˈlitannonke. Hiittoonni?

Jesika Qullaawu Maxaafi halaale afa hasidhu yannarano, qaaqqose fayyimma gawajjitannokki sagale afate horoonsidhino doogga kaaˈlitinose. Ise, “Qullaawa Maxaafa seekke nabbawaˈyanna diinaggaawe xiinxallaˈya halaale afeemma gede kaaˈlitinoe” yitino. Jesikano ikko wolu lowo miliyoone ikkanno manni aante noo xaˈmuwara Qullaawu Maxaafinni dawaro afiˈrino:

• Kalaqammoommohu isi mayiraati?

• Reyineemmo woyite ma ikkineemmo?

• Qarru iillannonkehu mayiraati?

• Maganu qarra baala hunannohu hiittoonniiti?

• Maatenke hagiirru noota assiˈra dandiineemmohu hiittoonniiti?

Kuri xaˈmuwara halaalaancho dawaro afiˈrate, Qullaawa Maxaafa nabbawanna www.pr418.com/sid horoonsidhe ledde xiinxalla dandaatto.