Dusudusu jaa longi, na wan sëmbë bi sabi unfa di soni dë ta pasa tuutuu, nöö a bi ta mbei taa so siki bi ta kii milionmilion sëmbë. Ma bakaten, dee öndösukuma ko sabi unfa di soni dë ta pasa. De ko si taa sëmbë ta kisi siki u di wanlö pikipiki soni de kai bacterie, ku di soni de kai virus ta mbei de ta suwaki. Di sabi di de ko sabi di soni aki, mbei taa sëmbë sa ta köni ku so siki, de sa ta kula sömëni siki, nöö di soni aki mbei taa milionmilion sëmbë ta libi möön longi, söseei de ta möön dë gösöntu tu.

Unfa a dë ku woto fanöudu soni di u musu ko sabi? Un wini joo feni ee i ko sabi unfa dee soni dee sikifi a basu aki dë tuutuu?

• Ambë da Gadu tuutuu?

• Ambë da Jesosi Keesitu?

• Andi da di Könuköndë u Gadu?

• Andi o pasa a di ten di ta ko?

Milionmilion sëmbë ko sabi dee soni aki, nöö de ko abi wan möön bunu libi. Iseei sa feni wini te i ko sabi dee soni aki tu.

Kandë i ta hakisi iseei taa: ’Unfa mi sa ko sabi fa soni dë tuutuu?’ Hiniwan daka a ta ko möön taanga fuu ko sabi fa sömëni soni dë tuutuu. Faandi mbei u taki sö?

Sömëni sëmbë an ta futoou dee politikima, de an ta futoou dee sëmbë dee ta bai soni ta sei, söseei de an ta futoou dee sëmbë dee ta taki soni a teefei nasö a ladio. De ta si kuma dee sëmbë dë an ta taki tuutuu soni da de. A ta taanga da sëmbë u sabi na un ten wotowan ta taki tuutuu soni nasö na un ten de ta ganjan de. U di sëmbë an ta futoou wotowan, söseei u di gaansë u dee soni di wotowan ta taki an ta dë sö tuu, mbei sëmbë an ta biibi tuutuu soni möön, söseei de an ta kë ko sabi un wini dee soni dë sa tja ko da de.

Hii fa di soni aki dë sö, tökuseei sëmbë sa ko sabi dee möön fanöudu soni di sëmbë ta kë sabi a di libi. Unfa de sa ko sabi de? Wë, te de ta du dee seei soni di de ta du te de kë ko sabi soni.

Hii daka sëmbë ta du soni u ko sabi fa soni dë tuutuu. Luku fa soni bi dë da Jessica. A bi taki taa: „Di mujëë mii u mi abi pinda tjina. Wan pikisö pinda nöö tjika u kii ën.” Jessica musu köni ku dee soni dee a ta bai da di mujëë mii fëën faa njan. A bi taki söseei taa: „Di fosu soni di mi ta du, hën da mi ta lesi dee soni dee sikifi a di soni di mi o bai sinkii bumbuu, u mi sa sabi ku andi de mbei ën. Söseei mi ta öndösuku soni möön fini. Mi ta bëli dee sëmbë dee mbei di soni di mi bai u mi sabi ee de an misi buta wan pikisö pinda a di soni dendu. Baka di dë, nöö mi ta hakisi luku a woto kamian u ko sabi ee mi sa futoou dee sëmbë dee mbei di soni.”

Kandë dee soni dee i ta mbei möiti u ko sabi hiniwan daka, an dë sö fanöudu kuma dee u Jessica. Ma leti kuma Jessica, i sa wooko ku dee soni dee u kai a basu aki u ko sabi fa soni dë tuutuu:

• Suku u ko sabi fa soni dë tuutuu.

• Öndösuku soni möön fini.

• Öndösuku soni a wan kamian di i sabi taa ta taki tuutuu soni.

I sa öndösuku soni a di lö fasi aki tu, fii ko sabi dee möön fanöudu soni di sëmbë ta kë sabi a di libi. Unfa i sa du di soni dë?

Di Jessica bi kë ko sabi soni u Bëibel, nöö a bi öndösuku soni a di seei fasi fa a ta öndösuku soni te a kë sabi andi a musu bai da di mujëë mii fëën faa njan. A bi taki taa: „U di mi bi ta tei ten u lesi di Bëibel, söseei u di mi bi ta öndösuku soni finifini nëën, mbei mi bi ko sabi andi di Bëibel ta taki tuutuu.” Leti kuma Jessica, milionmilion sëmbë ko sabi andi di Bëibel ta taki tuutuu u dee soni dee sikifi a basu aki:

• Faandi mbei u dë a libi?

• Andi ta pasa ku wan sëmbë te a dëdë?

• Faandi mbei libisëmbë ta tja fuka?

• Andi Gadu o du u puu hii dee fuka dee ta miti libisëmbë?

• Unfa u sa ko abi wan piizii wosudendu libi?

I sa ko sabi dee soni aki ku woto soni jeti, te i ta lesi di Bëibel ku te i ta öndösuku soni finifini a www.pr418.com a Internet.