Kwaphela iminyaka leminyenti solo bantfu bangayati imphendvulo yalombuto. Ngesikhatsi lesifanako, letifo tabulala bantfu labanyenti kakhulu. Ekugcineni, bososayensi balitfola liciniso. Batfola kutsi tifo tibangwa ngemagciwane. Kutfolakala kwaleliciniso kusite bantfu bativikela etifweni letinyenti, bakhona nekutilapha letifo, lokwente bantfu labanyenti baphila sikhatsi lesidze.

Kutsiwani ngaleminye imibuto lebalulekile? Kwati emaciniso ngalemibuto lelandzelako kungakutsintsa njani kuphila kwakho?

• Ungubani Nkulunkulu?

• Ungubani Jesu Khristu?

• Uyini uMbuso waNkulunkulu?

• Likusasa lisiphatseleni?

Bantfu labanyenti batitfolile timphendvulo talemibuto futsi tibasitile bashintja indlela labaphila ngayo. Nawe tingakusita letimphendvulo.

Ungahle utibute, ‘Lisatfolakala yini liciniso?’ Ngobe sekuya ngekuya kuba matima kakhulu kutfola liciniso ngetintfo letinyenti. Leni?

Bantfu labanyenti ababetsembi bohulumende, emabhizinisi, nobe betindzaba kutsi bangabatjela liciniso. Bantfu bakutfola kumatima kubona kutsi loko labatjelwa kona kuliciniso, kungumbono walomunye umuntfu, kungemanga nobe lamanye emaciniso afihliwe. Ngenca yekutsi bantfu abasetsembani futsi netindzaba letinyenti setingemanga, bavame kungavumelani ngekutsi liyini liciniso nekutsi lingabasita njani.

Ngisho nangetulu kwaletinkinga, singatitfola timphendvulo letiliciniso temibuto lebaluleke kakhulu. Kanjani? Ngekwenta tintfo lovame kutenta kute utfole timphendvulo temibuto levamile.

Ngandlela tsite, liciniso ulifuna onkhe malanga. Cabanga ngesimo saJessica. Utsi: “Indvodzakati yami itondvwa kudla emantongomane, kangangekutsi ingafa nekufa nayingadla nome yini lenemantongomane.” Jessica kufanele ati kutsi kudla lakutsengela indvodzakati yakhe kute emantongomane. Utsi: “Intfo yekucala lengiyentako, kufundza kutsi lokudla lengikutsengako kwentiwe ngani. Ngibese ngenta lolunye lucwaningo, ngishayele nefemu leyente lokudla kute ngitfole sicinisekiso sekutsi abakawafaki yini emantongomane ngesiphosiso. Ngiphindze ngibute kuleminye imitfombo leyetsenjwako lengangenta ngiyetsembe indlela lefemu leyenta ngayo kudla.”

Timphendvulo temibuto lotifuna malanga onkhe kungenteka atikabaluleki kangako njengetaJessica. Kepha njengaJessica, nawe ungasebentisa lendlela lelandzelako kute utfole timphendvulo temibuto lonayo:

• Tfola onkhe emaciniso.

• Yenta lucwaningo lolwengetiwe.

• Ciniseka kutsi imitfombo loyisebentisako yetsembekile.

Lendlela ingakusita utfole timphendvulo letiliciniso temibuto lebalulekile. Kanjani?

Ngesikhatsi afuna liciniso leliseBhayibhelini, Jessica wasebentisa indlela lefana naleyo layisebentisako nakacwaninga ngekudla lokugulisa indvodzakati yakhe. Utsi: “Kufundza nekucwaninga kungisitile ngatfola liciniso leliseBhayibhelini.” NjengaJessica, bantfu labanyenti bafundze lokushiwo liBhayibheli ngalemibuto lelandzelako:

• Kungani silapha?

• Yini leyentekako ekufeni?

• Kungani kunekuhlupheka?

• Yini Nkulunkulu layentako kuze acedze konkhe kuhlupheka?

• Singaba njani nemndeni lojabulako?

Ungatfola timphendvulo letiliciniso talemibuto naleminye ngekufundza liBhayibheli nangekucwaninga usebentisa i-www.pr418.com.