Durante tinan barak nia laran, ema la hatene resposta ba pergunta neʼe, no ema rihun ba rihun mate tanba moras oioin daʼet ba ema. Maibé ikusmai, matenek-naʼin sira buka-hatene lia-loos. Sira haree katak baibain moras sira mosu tanba baktéria no virus. Hatene lia-loos kona-ba neʼe ajuda atu prevene no halaʼo tratamentu ba moras oioin, no rezultadu mak agora ema rihun ba rihun iha moris neʼebé saudavel liu.

Maibé oinsá ho pergunta importante seluk? Se Ita hatene lia-loos kona-ba pergunta sira tuirmai, oinsá mak neʼe sei kona Ita?

• Sé mak Maromak?

• Sé mak Jesus Kristu?

• Saida mak Maromak nia Ukun?

• Saida mak sei akontese iha futuru?

Ema rihun ba rihun hetan ona resposta ba pergunta sira-neʼe, no agora sira iha moris neʼebé kontente liu. Ita mós bele hetan benefísiu hodi hatene ninia resposta sira.

Karik Ita hanoin, ‘Oinsá mak ita bele hatene lia-loos kona-ba buat ruma?’ Tanba tuir loloos, hatene lia-loos kona-ba buat barak ohin loron sai susar liután. Tanbasá?

Ema barak la fiar katak governu sira, kompañia sira, ka média sei konta buat neʼebé loos. La fasil atu hatene se ema konta buat neʼebé loos duni, ka sira fó sai opiniaun deʼit, subar informasaun ruma, ka koʼalia bosok. Tanba ema la fiar malu, no informasaun barak mak falsu, ema la konkorda malu laʼós deʼit kona-ba oinsá atu esplika faktu sira, maibé kona-ba saida mak loos.

Maski nuneʼe, ita bele duni hetan resposta neʼebé loos ba pergunta importante sira kona-ba ita-nia moris. Oinsá? Hodi halo buat neʼebé baibain Ita halo iha ita-nia moris.

Loroloron, ita buka lia-loos kona-ba buat ruma. Ezemplu ida mak kona-ba Jessica nia situasaun. Nia hatete: “Haʼu-nia oan-feto alerjia boot tebes ho fore-rai. Maski nia han uitoan deʼit nia bele mate.” Jessica presiza hatene ai-han neʼebé nia hola ba ninia oan perigu ka lae. Nia dehan: “Buat primeiru haʼu halo bainhira hola ai-han mak lee didiʼak lista hodi haree saida mak sira uza. Depois, haʼu mós kontaktu kompañia neʼebé halo ai-han neʼe hodi husu didiʼak se la iha posibilidade ruma katak ai-han neʼe kahur ho fore-rai uitoan. Haʼu mós husu ema seluk neʼebé bele tau fiar se kompañia neʼe iha naran diʼak kona-ba dalan neʼebé sira prepara ai-han ka lae.”

Karik resposta sira neʼebé Ita buka loroloron la boot hanesan Jessica nian, maibé karik ita mós uza dalan tuirmai neʼe atu buka resposta ba pergunta balu:

• Hatene kona-ba faktu sira.

• Buka tan informasaun.

• Haree didiʼak katak informasaun neʼe ita bele tau fiar.

Prosesu neʼe mós bele ajuda Ita atu hetan resposta ba pergunta sira neʼebé importante kona-ba moris. Oinsá?

Bainhira Jessica buka lia-loos kona-ba Bíblia, nia uza dalan neʼebé atu hanesan bainhira nia buka informasaun kona-ba ninia oan-feto nia alerjia. Nia dehan: “Lee didiʼak no buka didiʼak informasaun ajuda haʼu atu hetan lia-loos iha Bíblia.” Hanesan Jessica, ema rihun ba rihun aprende ona buat neʼebé Bíblia hatete kona-ba pergunta sira-neʼe:

• Tanbasá mak ita moris?

• Saida mak akontese bainhira ita mate?

• Tanbasá mak iha terus?

• Saida mak Maromak halo daudaun atu halakon terus?

• Oinsá mak ita bele halaʼo moris neʼebé kontente nuʼudar família?

Ita bele hetan resposta ba pergunta neʼe no pergunta seluk tan hodi lee Bíblia no buka informasaun liután iha www.pr418.com/tdt.