L’edja k’ɛnɔnyi nunu, ndooko onto lakeyaka mɛtɛ okadimwelo wa dimbola sɔ. Koko hemɔ yasambemɛ yekɔ lo nshila miliyɔ y’anto oshiki. Kɛnɛ kele mɛtɛ ele, ase siansɛ wamboyosholaka mɛtɛ ka dui sɔ. Vɔ wakashola dia mbala efula, hemɔ ndjaka oma lo mikrɔbɛ. Woho wambowoshola mɛtɛ ka dui sɔ ambokimanyiya di’anto mbewɔ ndo nsaka hemɔ efula ndo dui sɔ diambokonya dia miliyara y’anto nsɛna edja ndo monga la yoonge ya dimɛna.

Kayotota di’ambola akina w’ohomba wayela anɛ?

• Ele Nzambi?

• Ele Yeso Kristo?

• Diolelo diaki Nzambi kɛdikɛdi na?

• Kakɔna katokongɛ lo nshi yayaye?

Miliyɔ y’anto wakakondja ekadimwelo lo ambola asɔ ndo wakalowanya nsɛnɔ yawɔ. Wɛ la wɔ koka nkondja wahɔ oma l’ekadimwelo ɛsɔ.

Wɛ koka ndjambola ɔnɛ: ‘Ngande wakoka onto mbeya kɛnɛ kele mɛtɛ l’oseka dui tshɛ?’ Aha la taamu, mbeya kɛnɛ kele mɛtɛ l’awui efula mbeyaka ndeka monga wolo efula. Lande na?

Anto efula hawoyoyaɛkɛ le ewandji wa lɛɛta, amundji w’okanda kana lo tita nsango dia mbatɛ kɛnɛ kele mɛtɛ. Vɔ mongaka l’okakatanu dia ntshikitanya kɛnɛ kele mɛtɛ la kɛnɛ kafɔnya anto lɔfɔnya, awui wele bu tshɛ mɛtɛ ndo awui wele tshɛ kashi wɛnyawɔ oko wekɔ mɛtɛ. Lam’ele anto hawoyɛkanɛ etema ndo woho waya nsango efula kashi, anto efula hawoyetawɔ kɛnɛ kele mɛtɛ ndo shɛngiya yakoka monga la dui sɔ le wɔ.

Kaanga mbele ekakatanu ɛsɔ wekɔ, onto koka ntana ekadimwelo wa mɛtɛ lo ambola w’ohomba efula wa lo lɔsɛnɔ. Lo nsala na? Lo nsala awui akɔ waamɛ watoyosalaka dia ntana ekadimwelo lo ambola wele bu ohomba efula.

Lo yɛdikɔ mɔtshi, wɛ toyangaka dia mbeya kɛnɛ kele mɛtɛ lushi tshɛ. Tɔshi ɛnyɛlɔ ka Jessica. Nde mbutaka ate: “Ɔnami la womoto ekɔ la ehetsha k’alowa, kaanga yema ya prɔtɛinɛ tshitshɛ y’alowa koka mbokadia waale.” Ntondo ka nde nsomba diangɔ dia ndɛ, Jessica pombaka teyi dia kana diangɔ diakɔ hadiotonga waale le ɔnande. Nde mbutaka ate: “Dui dia ntondo diatomosalaka ele, mbadia la yambalo tshɛ akatshi wafundawɔ wɛnya kɛnɛ kosanganyishawɔ la diangɔ dia ndɛ dialangami nsomba. Dimi salaka eyangelo ekina ndo mbelɛka wanɛ wakasale ɛngɔ kakɔ dia nshikikɛ dia prɔtɛinɛ y’alowa bu lɔkɔ. Ndo nto, dimi mimbolaka anto akina wokeyaka kɔmpanyi kakɔ dia dimi nshikikɛ woho wasalawɔ diangɔ diakɔ.”

Ambola watoyoyangaka dia ntana ekadimwelo awɔ lo lɔsɛnɔ layɛ la lushi la lushi mbeyaka mɛnama oko bu ohomba. Koko, l’ɛnyɛlɔ ka Jessica, wɛ koka nkamba la toho tayela tɔnɛ dia ntana ekadimwelo lo ambola ayɛ:

• Yanga dia mbeya kɛnɛ kele mɛtɛ.

• Sala eyangelo ekina.

• Yashikikɛ di’ahole wasalayɛ eyangelo wekɔ amɛna.

Nsala ngasɔ ayokokimanyiya dia ntana ekadimwelo lo ambola w’ohomba wa lo lɔsɛnɔ. Lo ngande?

Etena kayangande akambo wa mɛtɛ wa lo Bible, Jessica kambaka la yoho yakɔ yaamɛ yakamba la nde dia nyangɛ ɔnande lele la ehetsha k’alowa mbo ya ndɛ. Nde mbutaka ate: “Wadielo wa la yambalo tshɛ ndo eyangelo wa lotshimola wakakimanyiya dia ntana akambo wa mɛtɛ wa lo Bible.” L’ɛnyɛlɔ ka Jessica, miliyɔ y’anto wakeke kɛnɛ kata Bible lo ambola anɛ:

• Lande na keso la nkɛtɛ?

• Kakɔna katomba l’ɔkɔngɔ wa nyɔi?

• Lande na kasowaso?

• Kakɔna kasala Nzambi dia nkomiya asui tshɛ?

• Ngande wakokaso monga la lɔsɛnɔ la nkumbo l’ɔngɛnɔngɛnɔ?

Wɛ koka ntana ekadimwelo w’eshika lo ambola asɔ ndo akina lo mbadia Bible ndo lo nsala eyangelo lo sitɛ ka www.pr418.com.