Kwamyaka minji, kunyina naba omwe iwakazyi bwiinguzi bwamubuzyo ooyu, calo icakapa kuti mamiliyoni aabantu bafwe akaambo kamalwazi aayambukila. Mukuya kwaciindi, basayaansi bakaazyiba masimpe. Bakazikuzyiba kuti malwazi kanji-kanji alaboola akaambo katuzunda naa tuuka tuniini kapati. Ikuzyiba masimpe kujatikizya makani aaya kwapa kuti bantu bacikonzye kweeleba malwazi manji naa kwaasilika, calo capa kuti mabbiliyoni aabantu kabapona kwamyaka minji alimwi akuba abuumi buli kabotu.

Ino mbuti kujatikizya mibuzyo iimbi iiyandika kapati mbuli yeeyi iitobela?

• Ino Leza nguni?

• Ino Jesu Kristo nguni?

• Ino Bwami bwa Leza ninzi?

• Ino zintu ziyooba buti kumbele aamazuba?

Bantu banji babujana bwiinguzi bwamibuzyo eeyi alimwi lino bapona buumi bulaampindu. Andinywe mulakonzya kugwasyigwa abwiinguzi bwamibuzyo eeyi.

Ambweni mulakonzya kulibuzya kuti, ‘Ino inga cakonzyeka buti kuzyiba masimpe kujatikizya cintu cili coonse?’ Kayi kuzyiba masimpe kuboneka kuti ciyaabukatazya kapati. Ino nkaambo nzi?

Bantu banji tabazisyomi mfwulumende, basimakwebo naa basimubweza twaambo kuti balakonzya kubagwasya kuzyiba masimpe. Kayi tacili cuuba-uba ikuzyiba naa bantu bamwi baamba masimpe naa baamba buyo mbobayeeya akusisa makani aamwi naa kubeja buya. Akaambo kakuti bantu tabasyomani akuti bunji bwamakani aaliko ngakubeja, bantu balakazyanya kujatikizya makani aabonwa kuti ngamasimpe ncobeni alimwi ambwaabajatikizya balo kubagama.

Nokuba kuti kuli buyumuyumu buli boobo, cilakonzyeka kujana bwiinguzi buluzi kujatikizya mibuzyo iiyandika kapati mubuumi. Ino inga twabujana buti? Kwiinda mukubelesya nzila nzyomubelesya ikujana bwiinguzi kumakani aalibonya kuti taayandiki kapati.

Bwini mbwakuti, buzuba abuzuba mulaayandaula masimpe. Amubone bukkale bwaba Jessica. Bakaamba kuti: “Mwanaangu musimbi zyakamukaka ndongwe, cakuti ikuti wazilya noziba buyo zisyoonto, zilamupenzya kapati cakuti mane inga zyamujaya buya.” Aboobo ba Jessica beelede kuba masimpe kuti zyakulya nzyobaula tazikonzyi kumubikka muntenda mwanaabo. Bakayungizya kuti: “Kanditanaula zyakulya zimwi, ndeelede kulanga cakulomya kutegwa ndibone nzyobakasanganya. Mpoonya ndilavwuntauzya, mane buya zimwi ziindi ndilabuzya kuli basikupanga zyakulya eezyo kutegwa ndisinizye naa taakwe nobakasanganya andongwe. Kuyungizya waawo, ndilazumanana kubuzya basyaazibwene mumakani aazyakulya kutegwa ndibe masimpe kuti basikupanga zyakulya balazitobela nzila zyeelede zyakupanga zyakulya mukkampani yabo.”

Mibuzyo njomusola kujanina bwiinguzi mubuumi bwanu bwabuzuba abuzuba inga kaitayandiki kapati mbuli yaba Jessica, pele mbubwenya mbuli ba Jessica, mulakonzya kubelesya nzila zitobela ikujana bwiinguzi bwamibuzyo njomujisi:

• Amuzyibe twaambo twamasimpe.

• Amuvwuntauzye.

• Amube masimpe kuti bantu naa mabbuku ngomubelesya kujana makani alasyomeka.

Nzila izyaambwa atala aawa zilakonzya kumugwasya kujana bwiinguzi bwamasimpe bwamibuzyo iiyandika kapati mubuumi. Munzila nzi?

Ciindi ba Jessica nobakali kuyandaula kasimpe kamu Bbaibbele, bakabelesya nzila iikonzyenye ayeeyo njobabelesya ciindi nobayandaula zyakulya nzyobeelede kuulila mwanaabo. Bakaamba kuti: “Kubala cakulomya alimwi akuvwuntauzya cakusitikila kwakandigwasya kukajana kasimpe kamu Bbaibbele.” Mbubwenya mbuli ba Jessica, bantu banji bazyiba ncolyaamba Bbaibbele kujatikizya mibuzyo eeyi iitobela:

• Ino tuponena nzi?

• Ncinzi cicitika muntu afwa?

• Nkaambo nzi ncokuli kupenga?

• Ino ncinzi Leza ncacita lino kutegwa amane mapenzi oonse?

• Mbuti mbomukonzya kuba abuumi bukkomanisya mumukwasyi?

Mulakonzya kubujana bwiinguzi bwamasimpe bwamibuzyo eeyi alimwi amibuzyo iimbi kwiinda mukubala Bbaibbele akuvwuntauzya awebbusaiti ya www.pr418.com.