Kwaminyaka myiingi, taakwe wakazizi pe kuti malwazi atabukila biyeni alubo akajaya bantu biingi. Mukuya kwachiindi, bazyasayensi bakazooyijana nsandulo yamubuzyo ooyu. Bakaamba kuti malwazi apangwa aatuzunda. Kuziba zyakali kupanga malwazi zyakagwasya bantu biingi kuti balikwabilile kumalwazi akuti bajane busilisi bupa kuti bantu biingi bapone kwachiindi chilamfu kabali aamibili iisimide.

Kutegwani atala ayimwi mibuzyo iiyandikana? Kuziba nsandulo yamibuzyo iitobela kukugwasya biyeni?

• Leza ngwani?

• Jesu Kristu ngwani?

• Bwaami bwaLeza niinzi?

• Mazuba aalikunembo anooli biyeni?

Mamiliyoni aabantu akajana nsandulo zyamibuzyo eeyi alubo balikubotelwa mubuumi bwabo. Anduwe ulakonzya kubotelwa kuti waziba nsandulo zyamibuzyo eeyi.

Kujana wakaziba biyeni kasimpe kali atala achimwi chintu? Kuyanduula kasimpe atala achimwi chintu kubonekaanga nkuyumu. Nkamboonzi nikuli boobo?

Bantu biingi tabachisyomi pe zyaambwa aamfulumende, basimabbizinesi naakuti zizwa kuli basimubweza twaambo. Kulabayumina kubasyoma nkaambo ngatabazi pe kuti nzibali kwaamba nzyachoonzyo na, baamba maboneno aabo luzutu na, nzyakubeja na naakuti kuli tumwi twaambo ntubasisa. Akaambo kakuti bantu tabachisyomani, eezi zyapa kuti baleke kusyoma nzibamvwa nikuba kazili zyachoonzyo.

Nikuba boobo, tulakonzya kujana nsandulo zyachoonzyo zyamibuzyo iiyandikana mubuumi. Nga tulazijana biyeni? Tulakonzya kuchita mbuuli mbutuchita nituyanda kuziba chimwi chintu.

Kulakonzeka kuti uyanda kuziba kasimpe buzuba abuzuba. Muchikozyano, mwanakazi uutegwa Jessica wakaamba kuti: “Mwanaangu musimbi nga wachiswa kuti walya mandongo, nikuba kuti walya mache nga wachisilwa kufwa.” Katanawula chakulya Jessica, ngawaba aachoonzyo chakuti chakulya nchawula tachipi kuti mwanaakwe achiswe. Wakayungizya kuti: “Ngandalanga aakapepa kalembedwe zintu zyakaswaanizigwa kukupanga chakulya nchindiyanda kuula. Ngandabuzya kubantu bapanga chakulya kuti ndibe aachoonzyo chakuti teebakaswaanizya mandongo na. Alubo ngandayanduulisisya makani aachoonzyo kuli bamwi bayizi kabotu kkampani kuti ipanga chakulya chilikabotu na.”

Kulakonzeka kuti kuyanduulisisya kasimpe nkulikuchita kulisiyene azyakachitwa aaJessica, pesi ulakonzya kubelesya nzila zitobela kuti ujane nsandulo yamibuzyo njulaayo:

• Jana makani aachoonzyo.

• Yanduulisisya.

• Baachoonzyo chakuti zintu nzubelesya kukujana makani zilasyomeka.

Nzila eezi zilakonzya kukugwasya kuti ujane nsandulo yamibuzyo iiyandikana mubuumi. Kujana wazichita biyeni?

Nzila njaakabelesya Jessica kuyanduula chakulya chamwanaakwe, ilikozyenie anzila njaakabelesya chiindi naakatalika kuyanduula kasimpe kamuBbayibbele. Wakaamba kuti: “Kubala akuyanduulisisya kwakandigwasya kuti ndijane kasimpe kamuBbayibbele.” Mbuuli Jessica, mamiliyoni aabantu bakajana nsandulo iizwa muBbayibbele atala amibuzyo yakuti:

• Nkamboonzi nitupona?

• Niinzi chichitika muntu naafwa?

• Nkamboonzi nitufwaba?

• Niinzi Leza nzyayoochita kuti akamaninsye mapenzi?

• Niinzi chinga chilapa kuti mpuli yanu ibotelwe?

Anduwe, ulakonzya kujana nsandulo yamibuzyo eeyi ayimwi njulaayo kuti wabala Bbayibbele naakuti kunjila aawebbusayiti yajw.org.