Inap planti tausen yia, i no gat wanpela man i save long bekim bilong dispela askim. Kirap long dispela taim, ol bikpela sik we i save kalap hariap long man i bin kilim i dai planti milion manmeri. Bihain, ol saientis i painim as tru bilong dispela hevi. Ol i painimaut olsem planti taim ol sik i kamap long rot bilong ol jem—ol liklik binatang, olsem ol bektiria o vairas. Wok bilong painim as tru bilong dispela hevi i helpim ol man long abrusim sik na kisim ol marasin bilong planti sik, olsem na planti bilion manmeri inap stap laip longpela taim na stap helti.

Olsem wanem long ol narapela bikpela askim? Yu ting wok bilong painim stretpela save long ol dispela askim bai mekim wanem long yu?

• God em i husat?

• Jisas Krais em i husat?

• Kingdom Bilong God em i wanem samting?

• Wanem samting bai kamap long bihain?

Planti milion manmeri i bin kisim bekim bilong ol dispela askim na laip bilong ol i kamap gutpela moa. Bekim bilong ol dispela askim inap helpim yu tu.

Ating yu laik save, ‘Hau bai mi inap painim stretpela save long wanpela samting?’ Em i hatwok moa long painim stretpela save long planti samting. Bilong wanem?

Planti man i no trastim ol gavman, ol wok bisnis, na ol nius samting long mekim tok tru long ol. Ol i hatwok long luksave long wanem em tok tru na wanem em tingting bilong man, hap hap stori, na ol tok giaman em ol man i mekim we i luk olsem tok tru. Long dispela taim we i pulap long pasin bilong i no trastim narapela na ol man i kamapim ol tok i no tru, ol man i no wanbel long ol narapela i kamapim stori long ol samting tru i bin kamap, na tu, long wanem ol samting stret i bin kamap.

Maski i gat ol dispela hatwok, yu inap painim bekim tru bilong ol bikpela askim bilong laip. Hau bai yu painim? Long rot bilong yusim save yu mekim wok long en long olgeta de.

Inap sampela taim nau, yu wok long painim stretpela save long olgeta de. Tingim stori bilong Jessica. Em i tok: “Taim pikinini meri bilong mi i kaikai pinat, skin bilong em i save bagarap tru, maski liklik protin tasol bilong pinat inap kilim em i dai.” Jessica i laik save sapos kaikai em i baim i seif long pikinini meri bilong em. Em i tok: “Fes samting mi mekim, mi save ritim gut ol tok long karamap bilong sekim gut wanem ol samting i stap insait long ol dispela kaikai. Na mi mekim sampela wok painimaut moa, na tu, mi kontektim lain i wokim dispela kaikai bilong save olsem ol i no yusim ol protin bilong pinat we inap kamapim hevi. Mi askim ol narapela lain mi trastim ol em ol i save long dispela kampani i gat gutnem long bihainim gut lo bilong redim kaikai.

Long olgeta de, ating ol samting yu laik kisim stretpela save long en i no bikpela samting olsem bilong Jessica, tasol olsem Jessica, ating yu ken bihainim dispela rot long painim bekim bilong ol askim bilong yu:

• Kisim save long ol samting i tru.

• Mekim sampela wok painimaut moa.

• Yu mas trastim lain yu kisim tingting long ol.

Dispela wankain rot inap helpim yu long painim bekim tru bilong ol bikpela askim long laip. Tasol hau bai yu painim?

Taim Jessica i wok long painim stretpela save bilong Baibel, em i bihainim wankain pasin we em i bin mekim long painimaut ol kaikai i kamapim hevi long skin bilong pikinini meri. Em i tok: “Pasin bilong ritim gut ol tok na mekim gut wok painimaut i helpim mi long painim tok i tru bilong Baibel.” Olsem Jessica, planti milion manmeri i bin kisim save long tok Baibel i mekim long ol dispela askim:

• Yumi stap bilong mekim wanem?

• Wanem samting i kamap taim man i dai?

• Bilong wanem i gat pen na hevi?

• God i mekim wanem bilong pinisim pen na hevi?

• Hau bai famili bilong yu i ken stap amamas?

Yu inap painim bekim tru bilong ol dispela askim na ol narapela askim taim yu ritim Baibel na mekim sampela wok painimaut long Intenet long www.pr418.com.