Ku hundze malembe yo tala ku nga ri na munhu la tivaka nhlamulo ya xivutiso lexi naswona vuvabyi lebyi tlulelaka byi dlaye vanhu va ntsandza vahlayi. Eku heteleleni, van’wasayense va kume xivangelo xa kona. Va kume leswaku vuvabyi lebyi, byi vangiwa hi xitsongwatsongwana lexi nga vonakiki hi mahlo ya nyama, lexi vuriwaka baktheriya. Ku tiva nhlamulo ya xivutiso lexi ntsena, swi endle leswaku vanhu va kota ku sivela ni ku tshungula mavabyi yo tala, leswi endleke leswaku vanhu va va ni rihanyo lerinene ni ku hanya nkarhi wo leha.

Kambe ku vuriwa yini hi swivutiso swin’wana swa nkoka? Xana u vona onge ku lavisisa ntiyiso mayelana ni swivutiso leswi landzelaka swi ta ku vuyerisa njhani?

• Xikwembu i mani?

• Yesu Kreste i mani?

• Mfumo wa Xikwembu i yini?

• Xana vumundzuku byi ta va njhani?

Vanhu vo tala va ti kumile tinhlamulo ta swivutiso leswi naswona va antswise vutomi bya vona. Na wena swi nga ku vuyerisa ku kuma tinhlamulo ta swivutiso leswi.

U nga ha tivutisa, ‘Xana swa koteka leswaku munhu a kuma ntiyiso hi mhaka yo karhi?’ Phela, ku kuma ntiyiso hi mhaka yin’wana ni yin’wana swi ya swi tika swinene. Hikwalaho ka yini?

Vanhu vo tala a va yi tshembi mimfumo, van’wamabindzu, ni va haxi va mahungu hikuva a va wu kumi ntiyiso eka vona. Swa va tikela ku vona loko munhu a vulavula ntiyiso, a vula mavonelo yakwe, a tumbeta rungula ro karhi kumbe a hemba. Namuntlha a ka ha tshembaniwi hikuva ku hembelana i tshamelo maxelo lerova vanhu a va ha swi tivi leswaku ntiyiso i yini naswona a va ha swi koti ku hambanisa ntiyiso ni mavunwa.

Ku nga khathariseki swiphiqo leswi, ku kuma tinhlamulo ta swivutiso swa nkoka evuton’wini swa olova. Njhani? Hi ku endla leswi u swi endlaka loko u lava ntiyiso emhakeni yo karhi.

Hinkwerhu ka hina hi lavisisa ntiyiso eka swilo swo hambanahambana swa siku ni siku. Xiya xikombiso xa Jessica. U ri: “Xinhwanyatana xa mina a xi dyi timanga hikuva ta xi vavisa, hambi ko va titsongo ti nga va ni khombo.” Jessica u lava ku tiva loko swakudya leswi a nga ta swi xava swi ta n’wi khoma kahle n’wana wakwe. U ri: “Ndzi sungula ndzi kambisisa leswaku swakudya sweswo swi endliwe hi yini leswaku swi nga n’wi vavisi loko a dya. A swi heleli kwalaho ndzi tlhela ndzi endla ndzavisiso lowu engetelekeke hi ku fonela khamphani leyi endleke swakudya sweswo, ndzi vutisa loko va nga chelanga timanga hi xihoxo. Ndzi tlhela ndzi cheka loko khamphani yoleyo yi landzela swiletelo loko ku endliwa swakudya.”

Swi nga ha endlaka swivutiso swa wena swi nga ri swa nkoka ku fana ni swa Jessica kambe ku fana na Jessica u nga hava u endla leswi landzelaka leswaku u kuma tinhlamulo ta swivutiso leswi u nga na swona.

• Kuma rungula ra ntiyiso.

• Endla ndzavisiso lowu engeteleke.

• Tiyiseka leswaku vuxokoxoko lebyi u byi kumeke bya tshembeka.

Swiringanyeto leswi swi nga tlhela swi ku pfuna ku kuma tinhlamulo leti tshembekaka mayelana na swivutiso swa nkoka swinene evuton’wini. Njhani?

Leswaku a kuma ntiyiso lowu nga eBibeleni, Jessica u tirhisa swiringanyeto leswi a swi tirhisaka loko a chekela n’wana wakwe swakudya leswi nga riki na khombo. U te, “ku hlaya hi vukheta ni ku endla ndzavisiso swi ndzi pfune ku kuma ntiyiso lowu nga le Bibeleni.” Ku fana na Jessica vanhu vo tala va kume tinhlamulo ta swivutiso leswi landzelaka eBibeleni.

• Ha yini hi ri laha?

• Ku endlaka yini loko hi fa?

• Ha yini ku ri ni ku xaniseka?

• Ha yini Xikwembu xi nga herisi ku xaniseka?

• Hi nga endla njhani leswaku hi va ni ndyangu lowu tsakeke?

U nga kuma tinhlamulo ta swivutiso leswi na swin’wana hi ku hlaya Bibele ni ku endla ndzavisiso lowu engetelekeke eka website ya www.pr418.com.