Kumara emyaka nyingi, busaho muntu akaba amanyire eky’okugarukamu eky’ekikaguzo eki. Kandi kinu kikaletera abantu baingi kwitwa endwaire ez’akabi. Hanyuma y’akasumi, abanyasayansi bakasobora kumanya amananu agarukukwata ha kujanjaara kwendwaire. Bakakizoora ngu endwaire zaletwaga obuhuka obutasobora kurorwa n’amaiso oburukwetwa bacteria rundi viruses. Kumanya amananu agarukukwata ha ndwaire kikonyire abantu kuzetantara n’okuzijanjaba. Kandi kinu kiretiire obukaikuru n’obukaikuru bw’abantu kuba n’obwomeezi oburungi n’okuhangaara.

Kandi obukirukuhika ha bikaguzo ebindi ebikuru? Notekereza kuserra amananu agarukukwata ha bikaguzo binu nikisobora kukukwataho kita?

• Ruhanga nuwe oha?

• Yesu Kristo nuwe oha?

• Obukama bwa Ruhanga nikyo kiki?

• Kiki ekiraabaho omu busumi obw’omu maiso?

Obukaikuru n’obukaikuru bw’abantu basoboire kutunga eby’okugarukamu eby’ebikaguzo binu, kandi kinu kiretiire obwomeezi  bwabo kuhinduka. Naiwe eby’okugarukamu eby’ebikaguzo binu nibisobora kukugasira.

Nosobora kwekaguza, ‘Nikisoboka kuzoora amananu agarukukwata ha kintu kyona?’ Kasumi kanu, kusobora kutunga amananu agarukukwata ha buli kimu, nikyeyongera kuguma. Habwaki?

Abantu baingi tibesiga amagavumenti, eby’obusubuzi, rundi abanyamakuru kubagambira amananu. Kibagumira muno kwahukaniza amananu n’entekereza z’abantu, amananu ag’ebicweka rundi ebisuba ebirukuzooka nk’amananu. Nk’oku abantu batesigangana kandi n’ebintu ebingi ebirukubazibwa tibihikire, kibaletiire kuhakaniza amananu gonyini n’okutafaaho omulingo gasobora kubagasiramu.

N’obukiraaba kitanguhire, nikisoboka kuzoora amananu agarukukwata ha bikaguzo ebikuru ebikira kukaguzibwa omu bwomeezi. Mulingo ki? Kurabira omu kukora ebintu eby’okora buli kiro obworukuba noserra amananu agarukukwata ha bintu ebyorukwenda kumanya.

Haihi buli kiro, oserra amananu. Tekerezaaho enyikara ya Jessica, nagamba ati: “Muhara wange obwalya ebinyobwa bimukora kubi muno, kandi n’okulyaho kataito nikasobora kumwita.” Jessica ayegendereza muno kurora ngu eby’okulya ebyagurra muhara we tibirumu binyobwa. Nayongera nagamba ati: “Ekimbanza kukora nukwo kusoma kurora ebintu ebitairwe omu by’okulya. Nyeyongera kuseruliiriza n’okuhika ha kubaza n’abantu ababikora kurora ngu tibirumu binyobwa byona. Nkora okuseruliiriza kukigumya ngu ikorro ly’eby’okulya linu niribazibwaho kurungi ha mulingo bakoramu eby’okulya byabo.”

Okuseruliiriza okw’okora kutunga eby’okugarukamu, nikusobora kutahika ha rulengo orwa Jessica, baitu nosobora kukozesa emiringo eiyakozeseze kutunga eby’okugarukamu:

• Manya amananu gonyini agarukukwata ha kintu.

• Kora okuseruliiriza okurukukiraho.

• Rora ngu nambere orukukorra okuseruliiriza nihesigwa.

Emiringo enu n’esobora kukukonyera kutunga eby’okugarukamu ebihikire eby’ebikaguzo ebikuru ebitwekaguza omu bwomeezi. Omu mulingo ki?

Jessica obwakaba naserra amananu agali omu Baibuli, akakozesa omulingo oguyakozeseze ha kuseruliiriza eby’okulya ebikaba nibikora kubi muhara we. Nagamba ngu: “Kusoma n’obwegendereza hamu n’okuseruliiriza bikankonyera kuzoora amananu ag’omu Baibuli.” Okusisanaho na Jessica, obukaikuru n’obukaikuru bw’abantu bazoire omulingo Baibuli egarukamu ebikaguzo binu:

• Habwaki tuli omu nsi?

• Kiki ekitubaho obu tufa?

• Habwaki haroho okubonabona kwingi?

• Bintu ki Ruhanga ebyarukukora kumaraho okubonabona?

• Nitusobora tuta kuba n’amaka agarumu okusemererwa?

Nosobora kutunga eby’okugarukamu eby’amananu eby’ebikaguzo binu hamu n’ebindi kurabira omu kusoma Baibuli hamu n’okuseruliiriza n’okozesa omukura gwaitu ogwa www.pr418.com.