Kwa vyaka vinandi kumanyuma, palije uyo wakamanyanga umo matenda agha ghakuthandazgikira, ndipo ŵanthu mamiliyoni ghanandi ŵakafwanga. Pamanyuma ŵasayansi ŵakasanga unenesko. Ŵakamanya kuti majeremusi, mabakiteriya kweniso mavayirasi ndiyo kanandi ghakwambiska matenda. Ivi vyawovwira kuti ŵanthu ŵakhalenge umoyo uwemi kweniso utali chifukwa ŵasanga munkhwala kweniso nthowa zakujivikilira ku matenda agha.

Wuli pakuyowoya za mafumbo ghanyake ghakuzirwa? Kasi mukughanaghana kuti pangaŵa uwemi wuli para mwamanya mazgoro gha mafumbo ghakulondezgapo agha?

• Kasi Chiuta ni njani?

• Kasi Yesu Khristu ni njani?

• Kasi Ufumu wa Chiuta ni vichi?

• Kasi ntchivichi chichitikenge munthazi?

Ŵanthu mamiliyoni ghanandi ŵali kusanga mazgoro gha mafumbo agha ndipo pasono mbakukondwa. Namweso mungakondwa para mungamanya mazgoro gha mafumbo agha.

Nyengo zinyake mungajifumba kuti, kasi vingachitika kuti munthu wamanye unenesko pa chilichose? Nakuti ntchakusuzga kuti munthu  wamanye unenesko pa nkhani zinandi. Chifukwa wuli?

Ŵanthu ŵanandi ŵakugomezga yayi kuti maboma, ŵamalonda, manyuzipepara, panji mawayilesi ŵangaŵaphalira unenesko. Ŵakuwona kuti ntchakusuzga kumanya usange ivyo ŵanthu aŵa ŵakuyowoya ni vyaunenesko panji yayi. Chifukwa chakuti ŵanthu ŵanandi ivyo ŵakuyowoya vikuŵa vyaunenesko yayi, vyapangiska kuti ŵanthu ŵaleke kukolerana kweniso kutondeka kumanya unenesko weneko.

Nangauli vili nthena, kweni tingasanga mazgoro gha mafumbo ghakuzirwa agho tikujifumba. Tingayasanga wuli? Umo tikuchitira kuti tisange mazgoro gha mafumbo ghapusu ndimo tingachitiraso pakupenja mazgoro ghakuzirwa agha.

Zuŵa lililose taŵanthu tikupenja unenesko pa vinthu vinyake. Wonani umo wakuchitira Jessica. Iyo wakuti: “Mwana wane msungwana wakulwara chomene para warya peanut (chimphonde) nanga wangarya pachoko waka.” Nyengo zose Jessica wakuwoneseska kuti wakugura chakurya icho chingaleka kupweteka mwana wake. Iyo wakuti: “Pambere nindagure chakurya nkhuŵerenga dankha kuti nimanye ivyo ŵali kusazgako. Kufuma apo nkhufufuzaso ku awo ŵali kupanga chakurya icho kuti nimanye vinandi. Nkhufufuzaso mwakukwana kuti nisimikizge kuti ivyo kamupani iyo yayowoya ni vyaunenesko.”

Nangauli nyengo zinyake vinthu ivyo mukukhumba kufufuza kuti mumanye unenesko vingaŵa vyakuzirwa chomene yayi, kweni namwe mungachita nga umo wakuchitira Jessica. Mungachita vinthu vyakulondezgapo ivi kuti musange mazgoro gha mafumbo ghakuzirwa agho muli nagho:

• Manyani makora nkhani yose.

• Fufuzani.

• Fufuzani uko mungasanga nadi unenesko.

Nthowa zakuyana waka izi, zingamovwirani kusanga mazgoro gha mafumbo ghakuzirwa pa umoyo winu. Zingamovwirani wuli?

Apo Jessica wakapenjanga unenesko wa mu Baibolo, wakachita mwakuyana waka nga umo  wakachitiranga pakufufuza chakurya cha mwana wake. Iyo wakuti: “Kuti nisange unenesko wa mu Baibolo, nkhaŵerenganga mwakupwelelera na kuchita kafukufuku.” Nga ni Jessica ŵanthu mamiliyoni ghanandi ŵali kusanga mazgoro gha mafumbo ghakulondezgapo agha kufuma mu Baibolo:

• Chifukwa wuli Chiuta wali kutipa umoyo?

• Kasi para munthu wafwa wakumanya kalikose?

• Chifukwa wuli tikusuzgika?

• Kasi Chiuta wakuchita vichi kuti wawuskepo masuzgo?

• Kasi tingachita wuli kuti tiŵe ŵakukondwa mu banja lithu?

Mungasanga mazgoro ghaunenesko gha mafumbo agha na ghanyake mu Baibolo kweniso mungafufuza pa www.pr418.com.