Bayal ta mil jaʼbil te ma la yichʼ naʼbeyel te sujtibe, jaʼ yuʼun bayal millón ta tul ants winiketik lajik yuʼun te chamel te oranax ya spuk sbae. Pero te sientifikoetike la stabeyik sujtib ta patil. La staik ta ilel te ay chʼin chanetik te ma jtatik ta ilel te ya sbiilin virus o bacteria, te jaʼ ya yakʼik te chamel te ya xmilawane. Te kʼalal jich la snaʼike, la slebeyik spoxil sok bayal millón ta tul ants winiketik bayalxan tiempo kuxinemik sok maba tsakbilik ta chamel.

¿Bin ya xjuʼ ya kaltik ta swenta te yantik jojkʼoyeletik te mukʼik skʼoplale? ¿Yabal xjuʼ ya sjeltaybat akuxlejal teme ya anaʼbey sujtib te jojkʼoyeletik ini?

• ¿Machʼa-a te Diose?

• ¿Machʼa-a te Jesucristoe?

• ¿Bin-a te Ajwalinel o Wentainel yuʼun te Diose?

• ¿Bin ya jmaliytik ta pajel chaʼbej?

Bayal millón ta tul ants winiketik staojbeyikix sujtib te jojkʼoyeletik ini, jich lekuben te skuxlejalike. Jaʼnix jichat-euk ya xjuʼ ya ata lekilal yuʼun.

Yaniwan ajojkʼoybey aba teme ya xjuʼ ya ata te bin smelelile, melel ta kʼajkʼal ini wokol ta tael. ¿Bin yuʼun?

Bayal ants winiketik ma schʼuunikix te bin ya yalik te ajwaliletik, te empresarioetik o te bintik ya xkʼax ta notisia. Ma snaʼikix teme melel, teme jaʼnax jich ya spukik ta alel o teme lotil ta jkʼaxele. Te bitʼil maʼyuk machʼa ya smukʼulinix yoʼtan te ants winiketike, maʼyuk bin ya schʼuunikix manchukme smelelil te bin ya xkʼot ta pasele.

Manchukme jich ya xkʼot ta pasel, ya xjuʼ ya atabey sujtib te jojkʼoyeletik te mukʼik skʼoplal ta swenta te kuxlejalile. ¿Bin-utʼil? Jichnix te bin-utʼil ya alebey sujtib te yantik jojkʼoyeletik te maʼyuk lek skʼoplale.

Ta melel, ta jujun kʼajkʼal ya jletik te bin smelelile. Jun ejemplo, te Jessica ya skʼan ya snaʼ ta lek teme maʼyuk kaxlan chenekʼ (cacahuate) yichʼoj te weʼeliletik ya smane. Jich ya yal: «Te kantsil-al ya x-utsʼinot yuʼun te kaxlan chenekʼ sok ya xjuʼ ya xmilot yuʼun manchukme jtebnax yichʼoj tal ta weʼeliletik. Jaʼ yuʼun, nail ya kil ta lek te kʼalal ya jman te bintik yichʼoj te weʼeliletike. Patil ya jpas inbestigar ta lek sok ya jkʼopon bael te empresa te ban la yichʼ pasel te weʼelil yuʼun jich ya jnaʼ-a teme maʼyuk jtebuk kaxlan chenekʼ yichʼoje. Jaʼnix jich ya jle ta libroetik o yantikxan te banti ya yal teme lek te weʼeliletik ya schajpan te jun empresae».

Maniwan jujun kʼajkʼaluk ya alebey sujtib te jojkʼoyeletik te mukʼik skʼoplale, pero ya xjuʼ ya akʼayin te bin la spas te Jessica yuʼun jich ya atabey sujtib yantik jojkʼoyeletik:

• Ya xjuʼ ya ale informasion.

• Ya xjuʼ ya apasxan inbestigar.

• Ya xjuʼ ya awil ta lek teme smelelil te bin ya yalike.

Teme jich ya apas ini ya xjuʼ ya skoltayat ta stabeyel sujtib te jojkʼoyeletik te mukʼik skʼoplal ta swenta te kuxlejalile. Kiltik bin-utʼil.

Yuʼun ya stabey sujtib-a te Jessica te jojkʼoyeletik te mukʼik skʼoplal ta swenta kuxlejalile, jichnix la spas te bitʼil la yil ta lek teme maʼyuk kaxlan chenekʼ yichʼoj te jun weʼelile. Jich ya yal: «Te snopel ta lek sok te spasel inbestigar skoltayejon ta snaʼel te bin smelelil ya yakʼ ta nopel te Bibliae». Bayal millón ta tul ants winiketik jich spasojik-euk te bitʼil te Jessica sok staojbeyik sujtib ta Biblia te jojkʼoyeletik ini:

• ¿Bin swentail te kuxlejalile?

• ¿Bin ya xkʼot ta pasel te kʼalal ya xlajotike?

• ¿Bin yuʼun te ay bayal wokolile?

• ¿Bin yak ta spasel te Dios yuʼun ya slajin te wokoliletike?

• ¿Bin-utʼil ya xjuʼ ya jtatik tseʼel-oʼtanil ta jfamiliatik?

Ya xjuʼ ya atabey sujtib te jojkʼoyeletik ini sok yantikxan jojkʼoyeletik te kʼalal ya akʼopon te Biblia sok teme ya ale informasion ta pajina yuʼun Internet www.pr418.com.