Vwẹ ẹgbukpe uriorin buebun, ohwo vuọvo riẹn ẹkpahọnphiyọ rẹ onọ nana-a. Jẹ ega hwe iduduru rẹ ihwo. Ukuotọ rọyen, egbaerianriẹn da rhe riẹn uyota na. Ayen da rhe mrẹvughe nẹ ọke buebun emerọnvwọn itete re rhiẹromrẹ-ẹ yen sua ega, erọnvwọn kerẹ bacteria yẹrẹ virus. Uyota nana ra mrẹvughe na vwẹ ukẹcha kẹ ihwo buebun vwọ vrabọ rẹ ega ji sivwin oma rayen kpo, ihwo rha fobọ ghwẹ-ẹ, ayen ki ji vwo omakpokpọ.

Kẹ enọ eghanghanre efa vwo? Idjerhe vọ yen ẹkpahọnphiyọ rẹ enọ nana se vwo wene akpeyeren wẹn?

• Ono yen Ọghẹnẹ?

• Ono yen Jesu Kristi?

• Die yen Uvie rẹ Ọghẹnẹ?

• Die yen cha phia vwẹ obaro na?

Iduduru rẹ ihwo mrẹ ẹkpahọnphiyọ rẹ enọ nana, ọ da nẹrhẹ akpeyeren rayen yovwinphiyọ. Wọ sa mrẹ erere vwo nẹ ẹkpahọnphiyọ rẹ enọ nana.

Wo se roro, ‘Mavọ yen a sa vwọ mrẹ uyota rẹ orọnvwọn?’ Ọlọhọre ra vwọ riẹn uyota kpahen orọnvwọ-ọn. Diesorọ?

Ihwo buebun vwẹroso eta rẹ ihwo ri suẹ-ẹn, ji te ineki yẹrẹ ekuakua re ghwa iyẹnrẹn. Ayen mrẹ bẹnbẹn ayen vwọ riẹn ofẹnẹ rọhẹ uvwre rẹ uyota na vẹ eta romobọ, kugbe efian re guẹn kẹ ayen. Ọ vwọ dianẹ a rha vwẹroso ihwo na-a, eta rẹ efian je vwọ vọn asan eje na, ihwo ki vwo iroro sansan kpahen uyota na vẹ obo ro mudiaphiyọ kẹ ayen.

Dede nẹ egbabọse nana herọ, o ji fo nẹ a riẹn obọdẹn ẹkpahọnphiyọ rẹ enọ eghanghanre ri shekpahen akpeyeren. Vwẹ idjerhe vọ? Siẹrẹ wọ da vwẹ ena wọ vwọ guọnọ otọ rẹ eta vwo ruo.

Kẹdẹ kẹdẹ yen wọ vwọ hiẹ guọnọ uyota na. Roro kpahen obo re phia kẹ Jessica. Ọ da ta: “Ọrhen rẹ isagwẹ kpokpo ọmọtẹ mẹ mamọ, o de nyo ọmọrhẹn rọyen, o se fuẹwẹn.” Ofori nẹ Jessica riẹn oka rẹ emu ro che shephiyọ oma rẹ ọmọtẹ rọyen. Ọ da je ta: “Ẹsosuọ, me nabọ se ekuakua re vwo ru kemu kemu me cha dẹ. Ki mi ru ehiahiẹ, me tobọ se ihwo ri ruro sẹ ayen phi isagwẹ phiyọ. Me je fuẹrẹn asan efa rere mi se vwo vwo imuẹro nẹ me sa vwẹroso ikọpini ri ru emu na.”

Idjerhe wọ vwọ hiẹ guọnọ uyota na sa fẹnẹ ọ rẹ Jessica na, ẹkẹvuọvo kerẹ Jessica, wọ sa vwẹ ena nana vwọ guọnọ ẹkpahọnphiyọ rẹ enọ wo vwori:

• Guọnọ evuẹ ri muẹro.

• Ru ehiahiẹ efa.

• Vwo imuẹro nẹ wọ sa vwẹroso asan rẹ evuẹ na nurhe.

Ena nana sa chọn wẹ uko vwọ mrẹ ẹkpahọnphiyọ rẹ eno eghanghanre ri shekpahen akpeyeren. Vwẹ idjerhe vọ?

Kirobo rẹ Jessica hiẹ kpahen emu rẹ ọmọtẹ rọyen cha re na, ọtiọyen ọ je hiẹ guọnọ uyota ri Baibol na. Ọ da ta: “Isese ri Baibol na vẹ ẹfuẹrẹn rọyen chọn vwẹ uko vwọ mrẹ uyota ri Baibol na.” Kerẹ Jessica, iduduru rẹ ihwo je riẹn oborẹ Baibol na ta kpahen enọ nana:

• Diesorọ avwanre vwọ hẹ akpọ na?

• Die yen phia siẹrẹ e de ghwu?

• Diesorọ ojaẹriọ vwọ vọn asan eje?

• Die yen Ọghẹnẹ che ru vwo phi oba phiyọ ojaẹriọ?

• Mavọ yen e se vwo vwo omavwerhovwẹn vwevunrẹ orua?

Wọ sa mrẹ obọdẹn ẹkpahọnphiyọ vwọ kẹ enọ nana vẹ efa siẹrẹ wo de se Baibol na ji ru ehiahiẹ vwẹ www.pr418.com.