Ho fhela miṅwaha ya maḓana hu si na ane a nga fhindula yeneyo mbudziso ngeno malwadze a tshi khou bvela phanḓa na u vhulaya vhathu vha dzimiḽioni. Nga u ya ha tshifhinga, vhorasaintsi vho wana phindulo. Vho wana uri kanzhi malwadze a vhangwa nga zwitzhili. U wanulusa yeneyo ngoho zwo ita uri vhathu vhanzhi vha kone u thivhela na u alafhiwa malwadze manzhi, zwa ita uri vhathu vha dzibiḽioni vha tshile tshifhinga tshilapfu nahone vhe na mutakalo wavhuḓi.

Hu pfi mini nga dziṅwe mbudziso dza ndeme dzi ngaho idzo dzi tevhelaho?

• Mudzimu ndi nnyi?

• Yesu Kristo ndi nnyi?

• Muvhuso Wa Mudzimu ndi mini?

• Hu ḓo itea mini tshifhingani tshi ḓaho?

Vhathu vha dzimiḽioni vho wana phindulo, zwa ita uri vha tshile vhutshilo ha khwine. Na inwi ni nga vhuyelwa nga u ḓivha phindulo.

Ni nga ḓivhudzisa uri: ‘Naa zwi a konadzea u wana ngoho?’ Ano maḓuvha u wana ngoho nga ha tshiṅwe na tshiṅwe zwi vho konḓa vhukuma. Ndi ngani?

Vhathu vhanzhi a vha fhulufheli uri mivhuso, dzikhamphani kana vhoramafhungo vha amba ngoho. Zwi a vha konḓela u ḓivha arali muthu a tshi khou amba ngoho, a tshi khou amba mavhonele awe, a tshi khou dzumba maṅwe mafhungo kana a tshi khou zwifha. Vhathu a vha tsha tenda zwoṱhe, naho i ngoho, zwi tshi itiswa nga u sa fhulufhedzea ha vhathu na u sa amba ngoho yo fhelelaho.

Naho zwo ralo, zwi a konadzea u wana phindulo dza mbudziso dza ndeme. Nga nḓila ḓe? Nga u ita zwithu zwe wa ḓowela u zwi ita ḓuvha na ḓuvha musi u tshi ṱoḓa phindulo dza mbudziso dzo leluwaho.

Roṱhe ri ṱoḓa u ḓivha ngoho tshifhinga tshoṱhe. Humbulani nga ha vhuimo ha Jessica. U ri: “Nḓuhu a dzi fari ṅwananyana wanga zwavhuḓi, a nga fa naho a dzi ḽa zwiṱukuṱuku.” Jessica u tea u ita vhungoho ha uri zwiḽiwa zwine a mu rengela a zwi na nḓuhu. U ri: “Musi ndi tshi renga zwiḽiwa, ndi thoma nda sedza uri zwo itwa nga mini kana hani. U bva hafho, ndi ita ṱhoḓisiso na u kwama vhane vha ita zwenezwo zwiḽiwa u itela u ḓivha arali zwi si na nḓuhu zwa vhukuma. Ndi dovha nda ita ṱhoḓisiso yo engedzeaho u itela u vha na vhungoho ha uri ndi nga fhulufhela nḓila ine vha ita ngayo zwiḽiwa.”

Khamusi zwine inwi na ṱoḓa u ḓivha ngoho khazwo a si zwa ndeme u fana na zwa Jessica, fhedzi ni nga shumisa nḓila ye Jessica a i shumisa u itela u wana phindulo. Ni tea:

• U guda nga hazwo.

• U ita ṱhoḓisiso yo engedzeaho.

• U ita vhungoho ha uri hune na khou ita hone ṱhoḓisiso hu a fhulufhelea.

Yeneyi nḓila i nga ni thusa u wana phindulo dza mbudziso dza ndeme. Nga nḓila ḓe?

Musi Jessica a tshi ṱoḓa ngoho i re Bivhilini, o shumisa nḓila i fanaho na ine a i shumisa musi a tshi ita ṱhoḓisiso nga ha zwiḽiwa zwa ṅwananyana wawe. O amba uri: “U vhala Bivhili nga vhuronwane na u ita ṱhoḓisiso zwo nthusa uri ndi wane ngoho i re Bivhilini.” Vhathu vha dzimiḽioni vha fanaho na Jessica vho wana phindulo dzi bvaho Bivhilini dza mbudziso dzi tevhelaho:

• Ri khou tshilela’ni?

• Hu itea mini musi muthu o fa?

• Ndi ngani ri tshi tambula?

• Mudzimu u ḓo ita mini u itela u fhelisa u tambula?

• Miṱa yashu i nga ita hani uri i takale?

Ni nga wana phindulo dza ngoho dza dzenedzi mbudziso nga u vhala Bivhili na u ita ṱhoḓisiso kha www.pr418.com/ve.