Par tanti ani, milioni de persone le ze morte par via dele malatie parché nissuni savea la risposta a questa domanda. Fin che i studiosi i ga peschisà e i ga visto che tante malatie le ze passade de un al altro par causa dele bactèrie e dei vìrus. Saver de questo pol proteger le persone e fin curar tante malatie. Cossita, bilioni de persone le pol gaver una salute meio e viver de pi.

Ma ghen’è altre domande importante. Càtito che te giutaria saver la risposta a queste domande?

• Chi che l’è Dio?

• Chi che l’è Gesù Cristo?

• Cossa l’è el Regno de Dio?

• Cossa che sucederà nel futuro?

Saver la verità sora questi assunti ga giutà tante persone e pol giutar anca ti a gaver una vita meio.

Fursi te te domandi: ‘Sarà che se pol pròpio catar la verità?’ Ancoi l’è cada volta pi fadiga saver la verità sora qualche roba. Parché?

Tanti no i se fida nel governo, nel comèrsio o in quel che i vede nela television o nel ràdio. Lori i cata fadiga saver se le persone le ze pròpio drio dir tute le informassion, se le ze drio dir le so idee o sol busie. Ancoi, ghen’è tante informassion false e le persone no le sà pi in chi fidarse. Par quela, no le ze intese sora quel che l’è verità o se ghen’è pròpio una verità.

Ancora cossita, se pol catar risposte de fidarse ale domande pi importante dela vita. Come che te pol catarle? Fando le medèsime robe che te fè quando te vol saver qualcossa.

Tuti i giorni noantri volemo saver la verità sora qualche assunto. Varda quel che Jessica la fà. Ela la ga dito: “La me fiola la ze alèrgica a mandolini. La ga tanta alergia che se la magna sol una scianta de mandolini la pol fin morir. Alora, cossa che mi fao? Prima, proo saver tuto quel che ghen’è in quel che la va magnar. Dopo, fao ancora de pi peschisa e proo parlar cola empresa che la ga fato el magnar par saver se no ghen’è gnente de mandolini. E anca proo saver con persone de fidarse se la maniera che el magnar l’è parecià no ghe farà mal ala me fiola.”

Fursi le domande che te fè tuti i di no le ze tanto importante come quele de Jessica. Ma par catar le risposte ale domande pi importante dela vita, te pol:

• Saver tute le informassion.

• Peschisar ancora de pi.

• Esser sicuro che le ze informassion de fidarse.

Far cossita te giutarà catar le risposte pi importante dela vita. Come?

Jessica la fà tanta peschisa sora la alergia dela so fiola. E la fà una roba someiante par ndar in serca dela verità dela Bìblia. Ela la spiega: “Leder e peschisar tanto me ga giutà a catar la verità nela Bìblia.” Compagno Jessica, tante persone le cata la risposta dela Bìblia a domande come queste:

• Parché che semo qua?

• Cossa che sucede quando morimo?

• Parché che ghen’è sofrimento?

• Cossa che Dio l’è drio far par finir col sofrimento?

• Come che la me fameia la pol esser felice?

Se te vol catar risposte de fidarse a queste e altre domande, te pol leder la Bìblia e far peschise nel site www.pr418.com.