Tou Kumi Te Moʼoni
ʼE maʼuhiga ke tou iloʼi te moʼoni ʼo meʼa fuli he ʼe fakalogo ki ai totatou maʼuli. Ohage la neʼe ʼaoga ke tou iloʼi te tali ki te fehuʼi ʼaeni: ʼE feafeaʼi hatatou pikisia ʼi he mahaki?
Lolotoga ni taʼu neʼe mole iloʼi e he tahi pe ʼe mafola feafeaʼi te ʼu mahaki. Neʼe pikisia ai te toko lauʼi miliona hahaʼi ʼo natou mamate ai. ʼO hoko mai leva ki te temi ʼae neʼe maʼu ai e te kau fai sienesia te tupuʼaga ʼo te fepikisiaʼaki ʼo te ʼu mahaki. Neʼe tupu ʼuhi ko te ʼu mikolope ʼi te sino. Neʼe natou maʼu ni faitoʼo ʼo hao ai te toko lauʼi miliale hahaʼi mo natou maʼuʼuli fualoa ai.
Kae kotea ʼape te ʼu tali ki te tahi ʼu fehuʼi maʼuhiga ohage la ko ʼaeni?
-
Ko ai ia te ʼAtua?
-
Ko ai ia Sesu Kilisito?
-
Kotea ia te Puleʼaga ʼo te ʼAtua?
-
ʼE ʼi ai koa hatatou ka haʼu lelei?
Tokolahi kua natou fiafia leva ʼi tanatou iloʼi te ʼu tali ki te ʼu fehuʼi ʼaia pea ʼe feala ke feia mo koe.
ʼE FEALA KOA KE KE MAʼU TE MOʼONI?
ʼE lagi mata faigataʼa kia koe hau iloʼi te moʼoni ʼo ʼuhiga mo meʼa fuli. He koʼe koa kua maʼu gataʼa ia te moʼoni?
ʼE mole kei falala te tokolahi ki te puleʼaga, te kau faikoloa pea mo te ʼu talalogo. ʼE mole kei natou iloʼi pe ko te logo fea ʼae ʼe moʼoni mo ʼae ʼe loi.
Kae logo pe la te ʼu aluʼaga ʼaia ʼe feala pe hau maʼu te ʼu tali moʼoni ʼo ni fehuʼi maʼuhiga. ʼE tonu pe ke ke faʼifaʼitakiʼi tau faʼahiga faifekumi ʼae ʼe ke fai mahani ʼi te ʼaho fuli.
TAU FEKUMI KI TE MOʼONI
ʼE feala pe ke tou ui ʼe tou kumi te moʼoni ʼi te ʼaho fuli. Koʼeni te fakamatala ʼa Jessica: “ ʼE mole ʼaoga ke kai pinati taku taʼahine he ʼe feala pe ke mate ai.” Koia ʼe tonu ke iloʼi e Jessica te meʼa kai ʼae ʼe ʼaoga ki tana taʼahine. ʼE ina ui fenei: “ ʼE au ʼuluaki vakaʼi leleiʼi te ʼu meʼa ʼae ʼi te loto meʼa kai ʼae neʼe au toʼo. ʼOsi ʼaia, ʼe au pauʼi ki te sosiete naʼa neʼe natou ʼai hala he ʼu pinati ki te loto meʼa kai. Pea ʼe au fakaloloto ʼaku fekumi pe ʼe tonu ke au falala katoa ki te sosiete ʼaia.”
ʼE feala pe hau faʼifaʼitakiʼi te faʼahiga faifekumi ʼa Jessica ʼo ke maʼu ai te ʼu tali ki tau ʼu fehuʼi:
-
Haga lau ke ke mahino.
-
Fai hau fekumi loloto.
-
Vakavaka’i pe ʼe tonu tau falala.
ʼE ʼaoga te faʼahiga fai ʼaeni ki te ʼu fehuʼi maʼuhiga ʼae ʼe feala ke ke fai.
KO TE TOHI ʼE MOʼONI
Neʼe faiga ia Jessica ke ina iloʼi te moʼoni ʼo te Tohi-Tapu. Neʼe faifekumi ohage pe ko hana kumi he meʼa kai ki tana taʼahine. ʼE ina ui fenei: “Neʼe au lau te Tohi-Tapu mo fai ai ni fekumi loloto, pea neʼe au maʼu ai te moʼoni.” Ohage pe ko Jessica, neʼe maʼu e te toko lauʼi miliona hahaʼi ʼi te Tohi-Tapu te ʼu tali ki te ʼu fehuʼi ʼaeni:
-
Kotea te ʼuhiga ʼo totatou maʼuli?
-
Kotea ʼae ʼe hoko moka tou mamate?
-
He koʼe koa ʼe tou maʼuli mamahi?
-
ʼE feala koa ke fakagata e te ʼAtua te ʼu mamahi?
-
Kotea ʼae ʼe tonu ke tou fai ke tou maʼuli fiafia ai?
ʼAki tau lau te Tohi-Tapu mo tau faifekumi ʼi te Neti ʼi te www.pr418.com ʼe ke mahino anai ki te ʼu tali ʼe moʼoni.